9. кон̣д̣ан̃н̃асуттаван̣н̣ана̄

217. евам̣гахитана̄моти ‘‘ан̃н̃а̄си вата, бхо, кон̣д̣ан̃н̃о’’ти саттху вачанам̣ нисса̄йа бхиккхӯхи ан̃н̃ехи кон̣д̣ан̃н̃ана̄макехи висесанаттхам̣ евам̣гахитана̄мо. два̄дасаннам̣ сам̣ваччхара̄нам̣ васена чирассам̣. чхаддантабхаванети чхаддантана̄гара̄джабхаванат̣т̣ха̄не. пан̃н̃ава̄ маха̄са̄вако раттан̃н̃ута̄йа. ‘‘дасасахассачаккава̄л̣е деваманусса̄нанти дасасахассачаккава̄л̣е дева̄нам̣, имасмим̣ чаккава̄л̣е деваманусса̄нан̃ча̄ти евам̣ дасасахассачаккава̄л̣е деваманусса̄на’’нти ваданти. аггантиа̄дито. таттха̄ти манда̄кинитӣре.

вассаггена̄ти вассапат̣ипа̄т̣ийа̄. танти ан̃н̃а̄сикон̣д̣ан̃н̃аттхерам̣. маха̄брахма̄нам̣ вийа локийаманусса̄ хара̄йанти. па̄моккхабхӯто а̄йасма̄ тхеро антарантара̄ таттха таттха джанападе васитва̄ тадануккамена манда̄кинитӣрам̣ упагато, тасма̄ вуттам̣ – ‘‘иччха̄махам̣, бханте, джанападе васиту’’нти.

а̄нубха̄васампанна̄ дибба̄йука̄ те хаттхина̄га̄ти вуттам̣ ‘‘пуббе паччекабуддха̄нам̣ па̄ричарийа̄йа катапаричайа̄’’ти. тхерасса сан̃чаран̣ат̣т̣ха̄не а̄варан̣аса̄кха̄ харитва̄ апанетва̄. мукходакан̃чева дантакат̣т̣хан̃ча т̣хапетӣти сал̣аладевада̄рукат̣т̣ха̄дӣни ан̃н̃аман̃н̃ам̣ гхам̣ситва̄ аггим̣ ниббаттетва̄ джа̄летва̄ таттха па̄са̄н̣акхан̣д̣а̄ни та̄петва̄ та̄ни дан̣д̣акехи ват̣т̣етва̄ тал̣а̄ка̄су удакасон̣д̣ӣсу кхипитва̄ удакасса таттабха̄вам̣ н̃атва̄ на̄галата̄дантакат̣т̣хам̣ упаненто мукходакан̃ча т̣хапети. ваттам̣ каротӣти антокут̣ийа̄ бахи ча памукхепи ан̇ган̣епи са̄кха̄бхан̇гехи саммаджджанто ваккхама̄нанайена а̄ха̄рам̣ упаненто ваттам̣ кароти.

патит̣т̣хаппама̄н̣ети кат̣иппама̄н̣е, айамева ва̄ па̄т̣хо та̄ва махантамева̄ти йа̄ва махантам̣ сетападумаванам̣, та̄ва махантамева. есева найо раттакумудавана̄дӣсу. кха̄данта̄ манусса̄. паккапайогханика̄ вийа̄ти супаккапайогханам̣ вийа. гханабха̄вена пана паккхиттакхуддамадху вийа хоти. тена̄ха ‘‘етам̣ поккхарамадху на̄ма̄’’ти. мул̣а̄ланти сетападума̄нам̣ мӯлам̣. бхисанти тесам̣йева кандам̣. екасмим̣ паббети екекасмим̣ паббантаре. па̄дагхат̣аканти дон̣асса чатубха̄го сан̣т̣ха̄нато кхуддако, тасма̄ па̄дагхат̣акаппама̄н̣анти тумбаматтам̣. сон̣д̣иа̄ва̄т̣ети кхуддакасон̣д̣ийо чева кхуддакаа̄ва̄т̣е ча.

етам̣ бходжананти йатха̄вуттам̣ нирудакапа̄йасабходжанам̣. кечи сан̃джа̄нанти йе тхера̄ вуд̣д̣хатара̄. кечи на сан̃джа̄нанти йе нава̄ ачирапаббаджита̄.

буддха̄нубуддхоти буддхасса анубуддхо. ба̄л̣хавӣрийоти чатуннам̣ саммаппадха̄на̄нам̣ васена чираничитавӣрийо. тин̣н̣ам̣ вивека̄нанти ка̄йачиттаупадхививека̄нам̣ ла̄бхӣти йоджана̄. чатассо вадати ван̇гӣсаттхеро сайам̣пат̣ибха̄нам̣, на сеса̄бхин̃н̃а̄нам̣ абха̄ватоти а̄ха ‘‘итара̄’’тиа̄ди. париса̄ саннисӣди ниссаддабха̄вена тун̣хӣ ахосӣти аттхо. ануджа̄на̄песӣти пат̣хамам̣ аттана̄ н̃а̄там̣ упат̣т̣хитам̣ аттано паринибба̄нака̄лам̣ ану паччха̄ саттха̄рам̣ джа̄на̄песӣти евам̣ еттха аттхо дат̣т̣хаббо.

танти а̄са̄л̣хипун̣н̣ама̄йа исипатане йам̣ дассанам̣, йам̣ ва̄ дуккарачарийа̄йам̣ тумха̄кам̣ упат̣т̣ха̄нам̣ а̄дито дассанам̣, там̣, бханте, пат̣хамадассанам̣. онатавината̄ти хет̣т̣ха̄ упари ча оната̄ вината̄. кампетва̄ти тхокам̣ ча̄летва̄ дассанаттхам̣ еканинна̄до тесам̣ хаттхина̄га̄нан̃чева на̄гайаккхакумбхан̣д̣а̄нам̣ девата̄нан̃ча саддена. брахма̄но дева̄нам̣ адам̣сӯти самбандхо.

саджджха̄йамакам̣су паса̄данӣйесу паса̄давасена саннипатитапариса̄йа паса̄даджананаттхам̣ бхагавати никкхамитва̄ти бхагавати гандхакут̣ито никкхамитва̄. дхаратийева̄ти адут̣т̣хатам̣ патва̄ тит̣т̣хатева.

кон̣д̣ан̃н̃асуттаван̣н̣ана̄ нит̣т̣хита̄.