8. паросахассасуттаван̣н̣ана̄

216. сахассато парам̣ ад̣д̣хатеййабхиккхусатам̣ тада̄ бхагавантам̣ пайирупа̄сатӣти а̄ха ‘‘паросахассанти атирекасахасса’’нти. нибба̄не куточи бхайам̣ наттхӣти куточипи ка̄ран̣ато нибба̄не бхайам̣ наттхи асан̇кхатабха̄вена саббасо кхематта̄. тена̄ха бхагава̄ – ‘‘кхеман̃ча во, бхиккхаве, дхаммам̣ десесса̄ми кхемага̄минин̃ча пат̣ипада’’нтиа̄ди (сам̣. ни. 4.379-408). на куточи бхайам̣ етасмим̣ адхигатети акутобхайам̣, нибба̄нам̣. тена̄ха ‘‘нибба̄наппаттасса̄’’тиа̄ди. випассито пат̣т̣ха̄йа̄ти амха̄кам̣ бхагавато на̄мавасена исӣнам̣ саттамабха̄вадассанаттхам̣ вуттам̣. те хи таттха таттха сутте бахусо киттита̄. исӣнанти ва̄ паччекабуддхаса̄вакаба̄хиракаисӣнам̣ саттамо уттаро сет̣т̣хоти аттхо.

ат̣т̣хуппаттивасена̄ти ка̄ран̣асамут̣т̣ха̄навасена. тадасса ат̣т̣хуппаттим̣ вибха̄ветум̣ ‘‘сан̇гхамаджджхе’’тиа̄ди вуттам̣. пат̣ибха̄насампаннава̄ча̄йа ан̃н̃е ӣсати абхибхаватӣти ван̇гӣсо. тена̄ха ‘‘пат̣ибха̄насампатти’’нтиа̄ди.

килесуммуджджанасата̄нӣти ра̄га̄дикилеса̄нам̣ раджджанадуссана̄динайехи сависайе айонисо ут̣т̣ха̄на̄ни. йади анека̄ни сата̄ни, атха касма̄ ‘‘уммаггапатха’’нти? вуттанти а̄ха ‘‘ват̣т̣апатхатта̄ пана патха’’нти. ра̄гадосамохама̄надит̣т̣хивасена ра̄гакхила̄дӣни пан̃чакхила̄ни. вибхаджантанти вибхаджанавасена катхентам̣. вибхаджитва̄ти н̃а̄н̣ена вивечетва̄.

амате аккха̄тети амата̄вахе дхамме десите. дхаммасса пассита̄ро саччасампат̣иведхена. асам̣хӣра̄ дит̣т̣хива̄техи.

ативиджджхитва̄ти пат̣ивиджджхитва̄. атиккамабхӯтанти атиккаманат̣т̣хена бхӯтам̣. дасаддха̄нанти дасаннам̣ упад̣д̣ха̄нам̣. тена̄ха ‘‘пан̃чанна’’нти. джа̄нантена̄ти дхаммасса судуллабхатам̣ джа̄нантена.

паросахассасуттаван̣н̣ана̄ нит̣т̣хита̄.