4. а̄нандасуттаван̣н̣ана̄

212. ра̄готи еттха а̄йасмато ван̇гӣсасса ра̄гасса уппаттийа̄ ка̄ран̣ам̣ вибха̄ветум̣ ‘‘а̄йасма̄ а̄нандо’’тиа̄ди вуттам̣. танти а̄нандаттхерам̣. а̄рамман̣ам̣ париггахетунти ка̄йаведана̄дибхедам̣ а̄рамман̣ам̣ сатигочарам̣. асубхадуккха̄дито, рӯпа̄диекекамева ва̄ чхал̣а̄рамман̣ам̣ аниччадуккха̄дито паригган̣хитум̣ париччхиджджа джа̄нитум̣. иттхирӯпа̄рамман̣ети иттхисанта̄не рӯпасабха̄ве а̄рамман̣е.

нибба̄пананти нибба̄пайати етена̄ти нибба̄панам̣. випалла̄сена̄ти асубхе ‘‘субха’’нти випалла̄сабха̄вахету. ра̄гат̣т̣ха̄нийанти ра̄гуппаттихету. ит̣т̣ха̄рамман̣анти субха̄рамман̣ам̣. еттха ча ит̣т̣ха̄рамман̣асӣсена таттха ит̣т̣ха̄ка̄раггахан̣ам̣ вадати. тан̃хи ваджджанӣйам̣. паратоти авасаваттанаттхена ан̃н̃ато. сан̇кха̄ра̄ хи ‘‘ма̄ бхиджджантӯ’’ти иччхита̄пи бхиджджантева, тасма̄ те авасаваттитта̄ паро на̄ма, са̄ ча несам̣ парата̄ аниччадассанена па̄кат̣а̄ хотӣти вуттам̣ ‘‘парато пасса̄ти аниччато пасса̄’’ти. ка̄мам̣ випассана̄ сан̇кха̄ранимиттам̣ на париччаджати сан̇кха̄ре а̄раббха ваттанато, йесам̣ пана нимитта̄нам̣ аггахан̣ена анимитта̄ти гахитум̣ арахати, там̣ дассетум̣ ‘‘ничча̄дӣнам̣ нимитта̄на’’нтиа̄ди вуттам̣. салаккхан̣а-са̄ман̃н̃алаккхан̣а-дассанавасена ма̄насса дассана̄бхисамайо, випассана̄йа паха̄на̄бхисамайо. ‘‘маггена̄’’ти ваданти, маггенева пана асаммохато парин̃н̃а̄пат̣иведхавасена дассана̄бхисамайо, паха̄напат̣иведхавасена паха̄на̄бхисамайо. ра̄га̄дисантата̄йа̄ти ра̄га̄дӣнам̣ самуччхедавасена пат̣иппассаддхивасена вӯпасаметаббато сантабха̄вена.

а̄нандасуттаван̣н̣ана̄ нит̣т̣хита̄.