3. девахитасуттаван̣н̣ана̄

199. ударава̄техӣти ва̄такатавиджджханатодана̄дивасена апара̄парам̣ ваттама̄нехи ударава̄техи, тасса ва̄ вика̄рехи. нибаддхупат̣т̣ха̄кака̄ле пана дхаммабхан̣д̣а̄га̄рикова. аран̃н̃анти бхагавато бхиккхӯнан̃ча васанат̣т̣ха̄набхӯтам̣ тапованам̣. там̣ ниддхӯмам̣ хоти удаката̄панассапи акаран̣ато. тасма̄ти йасма̄ тасса ун̣ходакавиккин̣аначарийа̄йа джӣвика̄каппанам̣ хоти, тасма̄.

ваттаметам̣ тасса патика̄раттхам̣ парикатха̄дӣнампи ка̄тум̣ лаббханато. ида̄ни таттха ка̄ран̣ампи сависайам̣ дассетум̣ ‘‘ван̣н̣ам̣ хӣ’’тиа̄ди вуттам̣. бхагава̄ хи а̄йасмато упава̄н̣асса девахитабра̄хман̣асса там̣ самбха̄витам̣ бхависсати тикиччха̄пат̣ийаттам̣, та̄йа ча аттано рогасса вӯпасаманам̣, таппасан̇гена ча девахитабра̄хман̣о мама сантикам̣ а̄гантва̄ дхаммассаванена саран̣есу сӣлесу ча патит̣т̣хахиссатӣти саббамидам̣ н̃атва̄ евам̣ ‘‘ин̇гха ме твам̣, упава̄н̣а, ун̣ходакам̣ джа̄на̄хӣ’’ти авоча. а̄гаманӣйаппат̣ипадам̣ пуббабха̄гаппат̣ипадам̣ пуббабха̄гаппат̣ипаттим̣ катхетум̣ ват̣т̣ати ануттаримануссадхамматта̄. садевакена локена̄ти анавасесато локасса гахан̣ам̣. пхалависеса̄кан̇кха̄йа пӯджетабба̄ти пӯджанӣйа̄, те ева идха ‘‘пӯджанеййа̄’’ти вутта̄. татха̄ а̄дарена пӯджетаббата̄йа сакка̄рийа̄, а̄-ка̄расса рассаттам̣, ри-саддасса ча ре-а̄десам̣ катва̄ ‘‘саккареййа̄’’ти вуттам̣. ‘‘апачайеййа̄’’ти ваттаббе йа-ка̄ралопам̣ катва̄ ‘‘апачеййа̄’’ти вуттам̣. тесанти садевакена пӯджанеййа̄дӣнам̣. харитунти нетум̣.

еттакенапӣти упасан̇камана̄дина̄ еттакена аппаматтакенапи катаваттена айам̣ китти…пе… соманассаджа̄то.

йаджама̄насса̄ти деййадхаммам̣ дентасса. даккхин̣а̄йа иджджханам̣ на̄ма випулапхалабха̄воти а̄ха ‘‘махаппхало хотӣ’’ти. видитанти пат̣ивиддхапаччаккхакатам̣. а̄джа̄на̄тӣти вуттхабхава̄дим̣ парийа̄да̄йа джа̄на̄ти пат̣ивиджджхати. джа̄нитва̄ти чатта̄ри сачча̄ни маггапат̣ипа̄т̣ийа̄ пат̣ивиджджхитва̄. аггаппаттата̄йа катакиччатам̣ патто. бра̄хман̣ена аттана̄ като ка̄ро ча бхагавато ева паччупат̣т̣ха̄тӣти там̣ дассенто ‘‘имина̄ кхӣн̣а̄саве йаджана̄ка̄рена йаджантасса̄’’ти вуттам̣.

девахитасуттаван̣н̣ана̄ нит̣т̣хита̄.