4. маха̄са̄ласуттаван̣н̣ана̄

200. йасма̄ тасса бра̄хман̣асса аниссайасса джин̣н̣абха̄вена висесато ка̄йо лӯкхо джа̄то, джин̣н̣апилотикакхан̣д̣ехи сан̇гхат̣итам̣ па̄вуран̣ам̣, тасма̄ ‘‘лӯкхапа̄вуран̣о’’ти падасса ‘‘джин̣н̣апа̄вуран̣о’’ти аттхо вутто. па̄т̣ийекканти путтесу екамеко екамека̄йа ва̄ча̄йа висум̣ висум̣.

сампуччханам̣ на̄ма идха саммантананти а̄ха ‘‘саддхим̣ мантайитва̄’’ти. нандиссанти абхинандим̣. атӣтаттхе хи идам̣ ана̄гатавачанам̣. тена̄ха ‘‘нандиджа̄то…пе… ахоси’’нти. бхуссанта̄ти ниббхуссанавасена раванта̄.

вайогатанти паччхимавайам̣ упагатам̣. со пана йасма̄ пуриме две вайе атиккамавасена гато. паччхимам̣ екадесато атиккаманавасена, тасма̄ вуттам̣ – ‘‘тайо вайе гатам̣ атиккантам̣ паччхимавайе т̣хита’’нти.

ниппарибхоготи джин̣н̣абха̄вена джавапараккамаха̄нийа̄ апарибхого на бхун̃джитаббо. кха̄дана̄ апанӣйатӣти йавасам̣ ададанта̄ тато нӣхаранти на̄ма. тхероти вуд̣д̣хо.

анассава̄ти на вачанакара̄. аппатисса̄ти патиссайарахита̄. авасаваттиноти на майхам̣ васена ваттанака̄. сундаратароти упаттхамбхака̄рибха̄вена сундаратаро.

пуратоти упаттхамбхакабха̄вена пурато катва̄. удаке патит̣т̣хам̣ лабхати таттха патит̣т̣хато тхирапатит̣т̣хабха̄вато. аддхапатит̣т̣хо хи дан̣д̣о дан̣д̣адхарапурисасса патит̣т̣хам̣ лабха̄пети.

бра̄хман̣ийоти аттано бра̄хман̣ийо. па̄т̣ийекканти ‘‘асукасса гехе асукасса гехе’’ти евам̣ уддесикам̣ катва̄ висум̣ висум̣. ма̄ ниййа̄дехи, амха̄кам̣ руччанат̣т̣ха̄намева̄ти тава путта̄нам̣ гехесу йам̣ амха̄кам̣ руччанат̣т̣ха̄нам̣. таттхамева гамисса̄ма̄ти саббесампи етесам̣ ануггахам̣ ка̄тука̄мо бхагава̄ евама̄ха.

тато пат̣т̣ха̄йа̄ти сота̄паттипхалапат̣ила̄бхато пат̣т̣ха̄йа. йадаттхам̣ майам̣ имасса бра̄хман̣асса маха̄сампаттида̄на̄дина̄ ануггахо като, со часса путтапариджанассапи аттхо сиддхоти саттха̄ на саббака̄лам̣ тасса бра̄хман̣асса путта̄нам̣ гехам̣ агама̄си, те ева пана ка̄лена ка̄лам̣ саттху сантикам̣ гантва̄ йатха̄вибхавам̣ сакка̄расамма̄нам̣ акам̣сӯти адхиппа̄йо.

маха̄са̄ласуттаван̣н̣ана̄ нит̣т̣хита̄.