3. андхакавиндасуттаван̣н̣ана̄

184. джанатанти джана̄нам̣ самӯхам̣, джанасан̃чаран̣ат̣т̣ха̄нанти аттхо. манусса̄нам̣ анупача̄рети йаттаке касана̄дикиччам̣ каронта̄нам̣ сан̃ча̄ро хоти, еттакам̣ атиккамитва̄ анупача̄ре. сам̣йоджанавиппамоккха̄ти сам̣йоджанавимоккхахету. вивекаратим̣ павивекасукхаджджха̄нам̣ алабханто. читта̄нураккхан̣аттханти пуббе мам̣ манусса̄ ‘‘аран̃н̃ава̄сена павивитто асам̣сат̣т̣хо а̄раддхавӣрийо’’ти ман̃н̃им̣су, ида̄ни га̄манте васантам̣ дисва̄ ган̣асан̇ган̣ика̄йа нивут̣т̣хоти аппаса̄дам̣ а̄паджджиссанти. йадипи ме идха абхирати наттхи, евам̣ сантепи идхева васисса̄мӣти виккхиттачиттена хутва̄ на васитаббам̣, ко аттхо читтавасам̣ гантва̄ти адхиппа̄йо. сатипат̣т̣ха̄напара̄йан̣оти сатипат̣т̣ха̄набха̄вана̄рато. евам̣ хисса ган̣ава̄сопи па̄сам̣со вивекава̄сена вина̄ саман̣акиччасса асиджджханато.

ват̣т̣абхайато памутто аджджха̄сайавасена̄ти адхиппа̄йо.

нисӣди таттха бхиккхӯти имина̄ саттӯпаладдхийа̄ анисситатта̄ йатха̄ручийа̄ тесам̣ нисаджджам̣ дассети. тена̄ха ‘‘имина̄’’тиа̄ди.

имина̄ ча имина̄ ча а̄ка̄рена джа̄танти на ануссавадассанаметам̣, на ануссаваггахан̣ам̣. таккахету найахету ва̄ на вада̄мӣти йоджана̄. пит̣акам̣ гантхо сампадӣйати етасса̄ти пит̣акасампада̄нам̣, гантхасса угган̣ханато тена пит̣акасса угган̣ханакабха̄вена, кеначи гантха̄нуса̄рена евам̣ на вада̄мӣти аттхо. брахмасса сет̣т̣хасса дхаммасса чарийам̣ ва̄часикам̣ паваттатӣти брахмачарийам̣, дхаммадесана̄. бха̄витена маран̣асса саббасо бха̄гена виппаха̄нена маран̣апаричча̄гӣнам̣. те ча кхӣн̣аджа̄тика̄ти а̄ха ‘‘кхӣн̣а̄сава̄на’’нти.

дасадха̄ даса̄ти дасаккхаттум̣ даса. ан̃н̃анти пан̃часата̄дхикасахассато ан̃н̃ам̣. пун̃н̃абха̄гиноти виват̣т̣анисситапун̃н̃асса бха̄гино тасса̄ десана̄йа еттака̄ сатта̄ джа̄та̄ти ган̣етум̣ ахам̣ на саккомӣти дассети. брахмадхаммадесананти брахмуна̄ вуттам̣ а̄ха.

андхакавиндасуттаван̣н̣ана̄ нит̣т̣хита̄.