5. ан̃н̃атарабрахмасуттаван̣н̣ана̄

176. теджокасин̣апарикаммам̣ катва̄ти ‘‘теджокасин̣апарикаммаджджха̄нам̣ сама̄паджджисса̄мӣ’’ти читтуппа̄до еветтха теджокасин̣апарикаммам̣. на хи буддха̄нам̣ ан̃н̃есам̣ вийа таттха джха̄насама̄паджджанена парикаммапапан̃чо аттхи саббаттхева чин̣н̣авасӣбха̄васса парамуккам̣сабха̄ваппаттатта̄. тасса кира брахмуно ‘‘йатха̄хам̣ евам̣ маха̄нубха̄во ан̃н̃о наттхӣ’’ти ладдхи, йам̣ сандха̄йа вуттам̣ – ‘‘наттхи со саман̣о ва̄ бра̄хман̣о ва̄, йо идха а̄гаччхеййа̄’’ти. бхагава̄ тасса там̣ ладдхим̣ виссаджджетум̣ теджодха̄тум̣ сама̄паджджитва̄ тасса упари а̄ка̄се нисӣди. тена вуттам̣ ‘‘теджодха̄тум̣…пе… татха̄гатам̣ дисва̄’’ти. ат̣т̣хиведхам̣ вийам̣ виджджхитаббо ат̣т̣хиведхӣ, йатха̄ ат̣т̣хим̣ виджджхитва̄ ат̣т̣химин̃джам̣ а̄хачча тит̣т̣хати, евам̣ виджджхитабботи аттхо. айам̣ пана ат̣т̣хиведхӣ вийа ат̣т̣хиведхӣ, йатха̄ со ладдхим̣ виссаджджети, евам̣ пат̣ипаджджитабботи аттхо. сеса̄нанти маха̄кассапамаха̄каппинаануруддхаттхера̄нам̣.

ан̃н̃абрахмасарӣравима̄на̄лан̇ка̄ра̄дӣнам̣ пабха̄ти брахма̄нам̣ сарӣраппабха̄ вима̄наппабха̄ алан̇ка̄раваттха̄дӣнам̣ пабха̄ти имасмим̣ брахмалоке има̄ сабба̄ пабха̄ аттано пабхассарабха̄вена абхибхавантам̣. наттхи ме са̄ти ида̄ни ме са̄ дит̣т̣хи наттхи, ‘‘наттхи со саман̣о ва̄ бра̄хман̣о ва̄, йо идха а̄гаччхеййа̄’’ти айам̣ ладдхи наттхи. тена̄ха ‘‘татра̄сса…пе… пахӣна̄’’ти. еттха̄ти етасмим̣ сама̄гаме. йатха̄ тасса брахмуно саббасо дит̣т̣хигатам̣ вимуччати дхаммачаккху уппаджджати, евам̣ махантам̣ дхаммадесанам̣ десеси.

‘‘аджджа̄пи те, а̄вусо’’тиа̄дина̄ вуттена таттакенева. сарӯпена вутта̄ти пат̣хамена па̄дена чатассо, дутийена еканти евам̣ пан̃ча абхин̃н̃а̄ сарӯпена вутта̄. касма̄ еттха диббасотам̣ на̄гатанти? а̄ха ‘‘та̄сам̣ васена а̄гатамева̄’’ти. йена има̄ локуттара̄ абхин̃н̃а̄ адхигата̄, на тасса диббасотасампа̄данам̣ бха̄рийам̣ пат̣ипаккхавигамена сукхенева иджджханато.

ан̃н̃атарабрахмасуттаван̣н̣ана̄ нит̣т̣хита̄.