4. бакабрахмасуттаван̣н̣ана̄

175. ‘‘сассато атта̄ ча локо ча̄’’ти евам̣ паватта̄ дит̣т̣хи сассатадит̣т̣хи. саха ка̄йена̄ти саха тена брахматтабха̄вена. брахмат̣т̣ха̄нанти аттано брахмаваттхум̣. аниччам̣ ‘‘ничча’’нти вадати аниччата̄йа аттано апан̃н̃а̄йама̄натта̄. тхиранти дал̣хам̣, вина̄са̄бха̄вато са̄рабхӯтанти аттхо. уппа̄давипарин̣а̄ма̄бха̄вато сада̄ виджджама̄нам̣. кеваланти парипун̣н̣ам̣. тена̄ха ‘‘акхан̣д̣а’’нти. кеваланти ва̄ джа̄тиа̄дӣхи асаммиссам̣, вирахитанти адхиппа̄йо. уппа̄да̄дӣнам̣ абха̄вато ева ачаванадхаммам̣. кочи джа̄йанако…пе… упападжджанако ва̄ наттхи ниччабха̄вато т̣ха̄нена саддхим̣ таннива̄сӣнам̣. ниччабха̄ван̃хи со пат̣иджа̄на̄ти. тиссо джха̄набхӯмийоти дутийататийачатуттхаджджха̄набхӯмийо. чатуттхаджджха̄набхӯмивисеса̄ хи асан̃н̃асуддха̄ва̄са̄руппабхава̄. нибба̄нанти ва̄ еттха ити-саддо а̄диаттхо, на парисама̄панаттхо, тасма̄ ‘‘сабба’’нти имина̄ ‘‘асан̃н̃а…пе… бхава̄’’ти вуттам̣ сан̇ган̣ха̄ти. пат̣иба̄хатӣти сантам̣йева сама̄нам̣ аджа̄нантова ‘‘наттхӣ’’ти пат̣иккхипати. еке уттаравиха̄рава̄сино.

хет̣т̣хӯпапаттикоти хет̣т̣ха̄ бхӯмӣсу уппаннаупапаттико. ида̄ни таматтхам̣ виваритум̣ ‘‘ануппанне’’тиа̄ди вуттам̣. хет̣т̣хупапаттикам̣ катва̄ти йатха̄т̣хитабхӯмито хет̣т̣ха̄ татийаджджха̄набхӯмийам̣ упапаттиджха̄нам̣ катва̄, на упариджха̄насса вийа паттхана̄маттанти адхиппа̄йо. пат̣хамака̄лети тасмим̣ бхаве пат̣хамака̄ле. ан̃н̃а̄си а̄саннабха̄вато. убхайанти там̣ там̣ аттана̄ катакамман̃чева ниббаттат̣т̣ха̄нан̃ча̄ти убхайам̣. памусситва̄ ниббаттим̣ анупадха̄ренто.

авиджджа̄йа гатоти авиджджа̄йа саха паватто. сахайоге хи идам̣ каран̣авачанам̣. тена̄ха ‘‘саманна̄гато’’ти. ан̃н̃а̄н̣ӣти авидва̄. пан̃н̃а̄чаккхувирахато андхӣбхӯто, андхабха̄вам̣ а̄панноти аттхо. ана̄гате саддо хота̄йам̣ ‘‘ваккхатӣ’’ти йатрасаддапайогена, аттхо пана ваттама̄нака̄лико. тена̄ха ‘‘бхан̣атӣ’’ти. тена̄ха ‘‘йатра̄’’тиа̄ди.

маггачороти маггапарибундхакачоро. сантаджджийама̄ноти ‘‘авиджджа̄гато вата, бхо, бако брахма̄’’тиа̄дина̄ сантаджджийама̄но. сатим̣ лабхитва̄ти тенева сантаджджанена йонисо уммуджджитва̄ пуримаджа̄тивисайам̣ сатим̣ лабхитва̄. ниппӣл̣итука̄моти гхам̣сетука̄мо досам̣ дассетука̄мо ‘‘идам̣ пасса йа̄ван̃ча те апараддха’’нти. пун̃н̃акамма̄ти пун̃н̃ака̄рино. ведехи н̃а̄н̣ехи гататта̄ паваттатта̄. антима̄ брахмупапаттӣти саббапаччхима̄ брахмабха̄ваппатти. асма̄бхиджаппантӣти асме абхиджаппанти. а̄йуван̣н̣а̄дивасена брӯхитагун̣атта̄ брахма̄. ан̃н̃ехи маханта̄ брахма̄ маха̄брахма̄. абхибхӯти там̣ брахмалокам̣ джет̣т̣хакабха̄вена абхибхавитва̄ т̣хито. анабхибхӯтоти ан̃н̃ехи на абхибхӯто. ан̃н̃адаттхӯти екам̣савачанаметам̣. дассанавасена дасо, саббам̣ пассатӣти адхиппа̄йо. васаваттӣти саббаджанам̣ васе ваттети. иссароти локе иссаро. катта̄ нимма̄та̄ти локасса катта̄ нимма̄та̄. сет̣т̣хо саджита̄ти айам̣ локасса уттамо сам̣вибхаджита̄ ча. васӣ пита̄ бхӯтабхабйа̄нанти а̄чин̣н̣аваситта̄ васӣ, айам̣ пита̄ бхӯта̄нам̣ ниббатта̄нам̣ бхабйа̄нам̣ самбхавесӣнанти паттхенти викаттхенти пихенти ма̄ненти.

етанти випарӣтасан̃н̃а̄васена ‘‘идам̣ ниччам̣ идам̣ дхувам̣ идам̣ сассата’’нтиа̄дина̄ вуттам̣ етам̣ аппам̣ париттаканти там̣ бхагава̄ париччхиндитва̄ дассети. там̣ пана ‘‘екасмим̣ косалаке тилава̄хе вассасате вассасате екекатилуддха̄ре кайирама̄не тила̄ни париккхайам̣ гаччханти, на твева аббуде а̄йӯ’’ти евам̣ вутто аббудо, там̣васена вӣсатигун̣ам̣ нираббудо, тесам̣ нираббуда̄нам̣ васена нираббудасатасахассам̣. айаметтха сан̇кхепо, виттха̄рато пана падуме а̄йуно вассаган̣ана̄ имасмим̣йева сам̣йутте парато а̄гамиссати. анантадассӣти анантасса н̃еййасса анавасесато дассӣ. ватасӣлаваттанти сама̄да̄навасена ватабхӯтам̣ ча̄риттасӣлавасена сама̄чин̣н̣атта̄ сӣлаваттам̣. там̣ пана екамева̄ти а̄ха ‘‘сӣламева̄’’ти.

апа̄йесӣти еттха йада̄ со пипа̄сите мануссе па̄нӣйам̣ па̄йеси, там̣ самуда̄гамато пат̣т̣ха̄йа дассетум̣ ‘‘татра̄’’тиа̄ди а̄раддхам̣. пуббети пуримаджа̄тийам̣. еса брахма̄ ‘‘джара̄маран̣асса антам̣ карисса̄мӣ’’ти аджджха̄сайавасена джха̄нам̣ ниббаттетва̄ брахмалоке ниббатти, со таттха нибба̄насан̃н̃ӣ ахоси. джха̄наратийа̄ вӣтина̄метӣти тада̄ тасса̄ кирийа̄йа авиччхедато паваттим̣ упа̄да̄йа ваттама̄напайого. раттандхака̄ре пурато пурато гаччхантасса сакат̣асса ануссаран̣авасена гаччханта̄нам̣ сакат̣а̄нам̣ ниваттанам̣ хотӣти ‘‘саббасакат̣а̄ни татхева ниваттитва̄’’ти вуттам̣.

каммасаджджа̄ти йуддхасаджджа̄. вилопанти вилуттабхан̣д̣ам̣. ен̣икӯласминти еттха ‘‘панихата̄йа ниччаган̇га̄йа на̄ма’’нти кечи. ‘‘ен̣имигабахулата̄йа со ган̇га̄йа тӣраппадесо ен̣икӯланти вутта’’нти апаре. ган̇геййакоти ган̇га̄саннива̄сӣ.

баддхачароти пат̣ибаддхачарийо. тена̄ха ‘‘антева̄сико’’ти. йасма̄ буддхо саббан̃н̃ӯ, тасма̄ ан̃н̃а̄си, идха майхам̣ памут̣т̣хан̃ча саббам̣ джа̄на̄сӣти адхиппа̄йо. саббам̣ брахмалокам̣ обха̄сайанто саббампимам̣ брахмалокам̣ бхагава̄ обха̄сам̣ абхибхавитва̄ анан̃н̃аса̄дха̄ран̣ам̣ аттано обха̄сам̣ обха̄сенто тит̣т̣хати.

бакабрахмасуттаван̣н̣ана̄ нит̣т̣хита̄.