3. дон̣апа̄касуттаван̣н̣ана̄

124. ‘‘дон̣апа̄какура’’нти еттха вибхаттилопам̣ катва̄ ниддесоти а̄ха ‘‘дон̣апа̄кам̣ кура’’нти. дон̣асса̄ти чатуннам̣ а̄л̣хака̄нам̣, сол̣асана̄л̣ӣнанти аттхо. тадупийанти таданурӯпам̣, тасса вуттапарима̄н̣асса ануччхавиканти аттхо. пуббети там̣дивасато пуриматарадивасесу. балава̄ти маха̄. бхаттапарил̣а̄хоти бхаттасаммадахетуко. асса ран̃н̃о убхосу пассесу гахитата̄лаван̣т̣а̄ бӣджанти йамаката̄лаван̣т̣ехи. пха̄сувиха̄ранти бходжане маттан̃н̃ута̄йа ладдхаббасукхавиха̄рам̣. бходжанаматтан̃н̃ӯ хи сукхавиха̄ро хоти. тена̄ха ‘‘танукасса бхаванти ведана̄, сан̣икам̣ джӣрати а̄йу па̄лайа’’нти.

танукасса̄ти танука̄ асса пуггаласса, бхуттапаччайа̄ висабха̄гаведана̄ на хонтӣти аттхо. сан̣иканти мандам̣ мудукам̣, апариссайамева̄ти аттхо. джӣратӣти парибхутта̄ха̄ро паччати. а̄йупа̄лайанти ниродхо аведано джӣвитам̣ раккханто. атха ва̄ сан̣икам̣ джӣратӣти со бходжане маттан̃н̃ӯ пуггало паримита̄ха̄рата̄йа сан̣икам̣ чирена джӣрати джарам̣ па̄пун̣а̄ти джӣвитам̣ па̄ленто.

парийа̄пун̣итва̄ти еттха йатха̄ саббам̣ со парийа̄пун̣и, тато паран̃ча йатха̄ пат̣ипаджджи, там̣ дассетум̣ ‘‘ран̃н̃а̄ саддхи’’нтиа̄ди вуттам̣. та̄ватаке тан̣д̣уле ха̄реййа̄си тадупийан̃ча бйан̃джананти а̄нетва̄ самбандхо.

пурисабха̄го еса̄ти маджджхимена пурисена бхун̃джитаббабха̄го есо, йадидам̣ на̄л̣икоданаматтам̣. салликхитасарӣрата̄ти бхамам̣ а̄ропетва̄ улликхитасса вийа саббапарил̣а̄хавӯпасамасса путхулата̄пагатасарӣрасса. сӣлам̣ сампара̄йикаттхоти вуттам̣, куто панеттха сӣланти а̄ха ‘‘бходжане’’тиа̄ди. сӣлан̇гам̣ на̄ма хотӣти чатупа̄рисуддхисӣласса авайаво еко бха̄го хоти.

дон̣апа̄касуттаван̣н̣ана̄ нит̣т̣хита̄.