10. сан̇гхавандана̄суттаван̣н̣ана̄

266. пӯтимхи дехе ма̄ту сарӣре сайанато, аттано ева ва̄ пӯтидехам̣ сарӣрам̣ тасмим̣ т̣хитата̄йа аваттхаритва̄ сайанато пӯтидехасайа̄ти йоджана̄. кун̣апамхетети ете манусса̄ асучидуггандхаджегуччхапат̣иккӯле ма̄тукуччхисан̇кха̄те кун̣апасмим̣ даса ма̄се нимугга̄. тесам̣ кинна̄ма твам̣ пихайасӣти йоджана̄. етесам̣ етам̣ вихайа̄мӣти етесам̣ исӣнам̣ етам̣ самма̄пат̣ипаттим̣ вихайа̄ми. ида̄ни там̣ пат̣ипаттим̣ дассетум̣ ‘‘на те сам̣ кот̣т̣хе опентӣ’’ти вуттам̣. дхан̃н̃ам̣ кот̣т̣хе на паккхипанти паккхипитаббасса ча абха̄вато. тена̄ха ‘‘на хи етесам̣ дхан̃н̃а’’нти. паресам̣ нит̣т̣хитанти паресам̣ гахитам̣ сантакам̣ тесам̣ па̄ка̄йа нит̣т̣хитам̣. бхиккха̄ча̄раваттена̄ти пин̣д̣а̄чарийа̄йа. есама̄на̄ парийесанта̄. евам̣ парийит̣т̣хена. йа̄пенти, на есанти анесанам̣. сусама̄диннасундаравата̄ти сут̣т̣ху сама̄диннасобханавата̄.

евам̣ субха̄ситабха̄синоти гантхадхуравипассана̄дхура̄нам̣ васена гун̣апарима̄н̣асубха̄ситассева бха̄санасӣла̄. арийена тун̣хӣбхӯтена тун̣хӣбхӯта̄. тато ева манасса са̄тисайам̣ саман̃чара̄. гахитадан̣д̣есу пара̄ма̄са̄дипайуттесу дан̣д̣а̄да̄на̄дихету уппаджджанакакилесапарил̣а̄ха̄бха̄вато ниббута̄. тена̄ха ‘‘виссат̣т̣хадан̣д̣а̄’’ти. са̄да̄несӯти сабхава̄да̄несу. ана̄да̄на̄ти таббирахита̄. тена̄ха ‘‘бхавайонӣ’’тиа̄ди.

сан̇гхавандана̄суттаван̣н̣ана̄ нит̣т̣хита̄.

дутийаваггаван̣н̣ана̄ нит̣т̣хита̄.