5. сан̣ама̄насуттаван̣н̣ана̄

15. т̣хите маджджханхикети пуббаддхам̣ никкхамитва̄ апараддхам̣ аппатва̄ т̣хитамаджджханхе. саннисӣвесӯти париссамавиноданаттхам̣ саббасо саннисӣдантесу. да-ка̄расса хи ва-ка̄рам̣ катва̄ ниддесо. тена̄ха ‘‘саннисиннесу виссамама̄несӯ’’ти. саббасатта̄нанти саббесан̃ча а̄ха̄рӯпаджӣвитасатта̄нам̣ гхаммата̄пане сантаттака̄йа̄нам̣ ирийа̄патхадуббалйака̄лоти т̣ха̄на̄диирийа̄патхасса асаматтхака̄ло. сан̣ати вийа̄ти саддам̣ кароти вийа, йатха̄ там̣ ан̃н̃ампи маха̄ванам̣ ваккхама̄нанайена. тена̄ха ‘‘таппат̣ибха̄гам̣ на̄мета’’нти чхиддавен̣упабба̄нанти рандхаджа̄такӣчакамаха̄вел̣упабба̄нам̣. дутийакам̣ саха̄йам̣ алабхантӣ анабхиратипаритассана̄йа евама̄ха. анаппакам̣ сукханти випулам̣ ул̣а̄рам̣ вивекасукхам̣.

екавиха̄рата̄йа сун̃н̃а̄га̄рам̣ павит̣т̣хасса. тена ка̄йавивекам̣ дассети. аничча̄нупассана̄дӣхи ниччасан̃н̃а̄диппаха̄нена сантачиттасса. тена читтавивекам̣ дассети. сам̣са̄ре бхайам̣ иккханато бхиккхуно убхайавивекасампаннасса, тато ева уттарим̣ мануссадхаммато ратим̣ ла̄бхино. ама̄нусӣ ратӣти бха̄вана̄рати. пуратоти пуримабха̄ге. паччхатоти паччхимабха̄ге. апароти ан̃н̃о. пуратоти ва̄ ана̄гате, ана̄гатам̣ а̄раббха̄ти аттхо. паччхатоти атӣте атӣтам̣ а̄раббха пат̣ипаттийа̄ виба̄дханато. пароти кодхо читтапат̣идуссаната̄йа. на пароти апаро, лобхо, со че на виджджати. етена ана̄гатаппаджаппана̄йа атӣта̄нусочана̄йа ча абха̄вам̣ дассети. атӣва пха̄су бхаватӣти нӣваран̣аджет̣т̣хакасса ка̄маччхандасса вигамена виккхамбхитанӣваран̣асса джха̄насса васена ативийа пха̄сувиха̄ро хоти. екасса васато ванети тан̣ха̄дутийика̄бха̄вена екасса аран̃н̃е вивекава̄сам̣ васато. сесам̣ та̄дисамева̄ти сесаметтха йам̣ ваттаббам̣, там̣ пат̣хамага̄тха̄йам̣ вуттасадисамева.

сан̣ама̄насуттаван̣н̣ана̄ нит̣т̣хита̄.