9. адхикаран̣авӯпасаманасаматхакатха̄

228. чатуваггакаран̣е каммети сӣмасаммутиа̄дикамме. пан̃чаваггакаран̣ети паччантимесу джанападесу упасампада̄дикамме. дасаваггакаран̣ети маджджхимесу джанападесу упасампадакамме. вӣсативаггакаран̣ети аббха̄накамме. каммаппатта̄ти каммасса патта̄ йутта̄ анурӯпа̄.

230. сампат̣иччхитаббанти пат̣игган̣хитаббам̣. сампат̣иччхитва̄ ча пана атикка̄метаббанти самбандхо. бхан̣д̣аканти чӣвара̄дибхан̣д̣акам̣. ма̄наниггахаттха̄йа̄ти бхан̣д̣анаджа̄та̄нам̣ ма̄насса ниггахаттха̄йа. катипа̄ханти катипайа̄хам̣, двӣхатӣханти аттхо.

231. ананта̄ни чева бхасса̄нӣти еттха анантасаддо апарима̄н̣асаддена аттхато екоти а̄ха ‘‘апарима̄н̣а̄нӣ’’ти. ‘‘вачана̄нӣ’’ти имина̄ бхассасаддо вачанапарийа̄йоти дассети. убба̄хика̄йа самманитабботи кена самманитабботи а̄ха ‘‘апалокетва̄ ва̄’’тиа̄ди. имина̄ апалоканакаммена ва̄ н̃аттидутийакаммена ва̄ самманитабботи дассети. ананта̄ни бхасса̄ни дхаммакатхикам̣ уддхаритва̄ ба̄хати пат̣иседхети има̄йа саммутийа̄ти убба̄хика̄, та̄йа. евам̣ самматехи пана бхиккхӯхи виниччхитаббанти самбандхо. висум̣ нисӣдитва̄ тасса̄йева париса̄йа нисӣдитва̄ ва̄ти йоджана̄. ан̃н̃ехӣти самматабхиккхӯхи ан̃н̃ехи.

233. татрасса̄ти еттха татра асса̄ти падавибха̄гам̣ катва̄ тасаддо парисависайо пасиддхависайо, ассасаддо а̄кхйа̄тикоти а̄ха ‘‘тассам̣ парисати бхавеййа̄’’ти. ‘‘нева суттам̣ а̄гата’’нти са̄ман̃н̃ато вуттепи ‘‘но суттавибхан̇го’’ти ваккхама̄натта̄ ма̄тикам̣ сандха̄йа вуттанти а̄ха ‘‘на ма̄тика̄ а̄гата̄’’ти. винайопӣти кхандхакавинайопи. писаддена суттавибхан̇гам̣ апеккхати. бйан̃джаначчха̄йа̄йа̄ти еттха чха̄йа̄саддо пат̣ибимбе ча пабха̄йа ча хотӣти а̄ха ‘‘бйан̃джанаматтамева̄’’ти, бйан̃джанапат̣ибимбикабйан̃джанапабха̄вантабхӯтам̣ аттхам̣ аггахетва̄ бйан̃джанапат̣ибимбабйан̃джанапабха̄маттамева гахетва̄ти адхиппа̄йо. ‘‘пат̣иседхетӣ’’ти имина̄ пат̣иба̄хасаддо пат̣иседхаттхойева, на мадданаттхоти дассети. пат̣иба̄хана̄ка̄рам̣ дассенто а̄ха ‘‘джа̄тарӯпараджатакхеттаваттхупат̣иггахан̣а̄дӣсӯ’’тиа̄ди. кинти кена ка̄ран̣ена, касма̄ ка̄ран̣а̄ ва̄. имети джа̄тарӯпа̄дипат̣игга̄хаке бхиккхӯ. ка̄ретха̄ти тумхе ка̄реййа̄тха. еййа̄тхасса хи етха̄десо. пуччха̄йам̣ саттамӣвибхатти хоти. суттети суттантапит̣аке. апаро дхаммакатхико вадатӣти самбандхо. имесанти оламбетва̄ нива̄сента̄нам̣. еттха̄ти оламбетва̄ нива̄сане.

234. бахутара̄ бхиккхӯти еттха двигун̣атигун̣а̄дина̄ адхика̄ ева бахутара̄ на̄ма̄ти а̄ха ‘‘екенапи адхика̄ бахутара̄ва̄’’ти. ‘‘ко пана ва̄до’’тиа̄дина̄ ‘‘екенапӣ’’ти еттха писаддасса гарахаттхам̣ дассети.

тивидхасала̄кагга̄хакатха̄

235. сан̃н̃аттийа̄ти еттха сан̃н̃а̄панам̣ сан̃н̃атти, тадаттха̄йа̄ти дассенто а̄ха ‘‘сан̃н̃а̄панаттха̄йа̄’’ти. гӯхитабботи гӯл̣хо, сойева гӯл̣хако, сала̄кагга̄хо ка̄табботи самбандхо. виваритабботи виват̣о, сойева виват̣ако. сасса аттано кан̣н̣асамӣпе джаппӣйати катхӣйатӣти сакан̣н̣аджаппо, сойева сакан̣н̣аджаппако. ‘‘нимиттасан̃н̃ам̣ а̄ропетва̄’’ти имина̄ ван̣н̣а̄ван̣н̣а̄йо катва̄ти еттха ван̣н̣асаддо сан̣т̣ха̄нава̄чакоти дассети. сусан̣т̣ха̄надусан̣т̣ха̄на̄ сала̄ка̄йо катва̄ти аттхо. татоти висабха̄гакаран̣ато парам̣ гахетабботи самбандхо. сабба̄пи та̄ сала̄ка̄йоти йоджана̄. катва̄ти паккхипанам̣ катва̄. вуттанайена̄ти ‘‘аладжджуссанна̄йа̄’’тиа̄дина̄ вуттанайена. ‘‘йа̄вататийа’’нти имина̄ паччуккад̣д̣хитаббанти еттха пунаппунам̣ уддхам̣ кад̣д̣хитаббанти аттхам̣ дассети. атирекаджа̄тети адхаммава̄дӣхи атирекато джа̄те сатӣти самбандхо. йа̄вататийампӣти писаддо тато ӯне екадвева̄ре пана ка̄ на̄ма катха̄ти дассети.

сакан̣н̣аджаппаке пана евам̣ виниччхайо ведитабботи йоджана̄. саче сан̇гхаттхеро ган̣ха̄тӣти самбандхо. соти сан̇гхаттхеро. вайоануппатта̄ти паччхимавайам̣ ануппатта̄. етанти адхаммава̄дисала̄кам̣. асса̄ти сан̇гхаттхерасса. итара̄ сала̄ка̄ти адхаммава̄дисала̄ка̄хи ан̃н̃а̄ дхаммава̄дисала̄ка̄. соти сан̇гхаттхеро. танти дхаммава̄дисала̄кам̣. татоти нева авабуджджханака̄ран̣а̄. вуттанайамева̄ти гӯл̣хаке вуттанайамева. виват̣о аттхо имасса̄ти виват̣аттхо.

тассапа̄пийасика̄винайакатха̄

238. па̄ра̄джикаса̄мантам̣ на̄ма̄ти па̄ра̄джикасса а̄саннам̣ на̄ма. адинна̄да̄на̄дӣсӯти а̄дисаддена мануссавиггаха уттаримануссадхаммапа̄ра̄джике сан̇ган̣ха̄ти. ниббет̣хайама̄нанти вет̣ханарахитам̣, таменам̣ бхиккхунти самбандхо. имина̄ ниббет̣хентанти еттха антасаддо ма̄насаддапарийа̄йоти дассети. ативет̣хетӣти еттха кехи ативет̣хетӣти а̄ха ‘‘ин̇гха̄йасма̄тиа̄дивачанехӣ’’ти. тена̄ти чодакена. манти мамам̣. а̄ха̄ти чудитако а̄ха. етасса̄ти аваджа̄нанапат̣иджа̄нана̄дика̄ракасса па̄пийасса пуггаласса. сӣлава̄ бхависсатӣти па̄пийо пуггало саче сӣлава̄ бхависсати. пат̣иппассаддхинти па̄пийабха̄вато пат̣иппассамбханам̣. но чети сӣлава̄ но бхависсати че. татха̄ на̄ситоти тена тасса па̄пийасикакаммакаран̣ена на̄сам̣ гато бхависсати. саббаттха̄ти саббасмим̣ саматхаккхандхаке.

ити саматхаккхандхакаван̣н̣ана̄йа йоджана̄ саматта̄.