215. чӣварараджанакатха̄

344. гихипарибхуттам̣ пана̄ти гихина̄ парибхуттам̣ ваттхам̣ пана, кин̃чи пхаланти самбандхо.

сӣтудака̄ти сӣтам̣ удакам̣. лин̇гавипалла̄со хи айам̣. уттара̄л̣умпанти еттха уттара ул̣умпанти падаччхедам̣ катва̄ ака̄рато ука̄расса лопам̣ катва̄, пуббасарасса ча дӣгхам̣ катва̄ ‘‘уттара̄л̣умпа’’нти вуччати. уттара̄л̣ӯти уттараудакам̣. ул̣усаддо хи удакава̄чако, там̣ па̄ти раккхатӣти уттара̄л̣умпам̣. тасса сарӯпам̣ дассенто а̄ха ‘‘ват̣т̣а̄дха̄рака’’нти. раджананти раджаначхаллим̣. хӣти пхаладжотако. раджананти раджанудакам̣. хӣти виттха̄ро. тхевоти раджанабинду. на висаратӣти на паггхарати. раджана̄л̣ун̇канти еттха̄пи пуриманайенева падасиддхи ведитабба̄. раджанаул̣ун̇канти раджанасан̇кха̄тасса удакасса гахан̣аттха̄йа карийатӣти раджанаул̣ун̇кам̣. дан̣д̣акена нийуттам̣ тха̄лакам̣ дан̣д̣акатха̄лаканти дассенто а̄ха ‘‘тамева садан̣д̣ака’’нти. раджанакун̣д̣анти раджанапаккхипанам̣ маха̄гхат̣ам̣. ан̃н̃атра̄ти ан̃н̃ам̣ т̣ха̄нам̣. паттхиннасаддо тхаддхапарийа̄йоти а̄ха ‘‘тхаддха’’нти. дантака̄са̄ва̄нӣти еттха дантасаддена тасса ван̣н̣о гахетаббо, со етесаматтхӣти данта̄ни, данта̄ни ча та̄ни ка̄са̄ва̄ни чети дантака̄са̄ва̄ни, таматтхам̣ дассенто а̄ха ‘‘дантаван̣н̣а̄нӣ’’ти. дантаван̣н̣а̄ни ка̄са̄ва̄ни дха̄рентӣти самбандхо.