216. чхиннакачӣвара̄нуджа̄нанакатха̄

345. дӣгхамарийа̄дабаддханти дӣгхена марийа̄дена баддхам̣. чатуккасан̣т̣ха̄нанти чатуннам̣ магга̄нам̣ самодха̄насан̣т̣ха̄нам̣. уссахаси тванти еттха упуббо сахадха̄ту саматтхаттхоти а̄ха ‘‘саккоси тва’’нти. папуббо пана абхибхаванаттхо хоти ‘‘пасахатӣ’’тиа̄дӣсу. йо на̄ма̄ти йо а̄нандо а̄джа̄ниссати на̄ма, со а̄нандо пан̣д̣итоти йоджана̄. ‘‘кусӣ’’ти етам̣ на̄мам̣ адхивачананти йоджана̄. анува̄та̄дӣнанти а̄дисаддена парибхан̣д̣а̄дӣни сан̇ган̣ха̄ти. ‘‘ад̣д̣хакусӣ’’ти етанти йоджана̄.

гӣвеййаканти еттха гӣва̄йам̣ суттасам̣сиббитам̣ гӣвеййаканти вачанаттхам̣ дассенто а̄ха ‘‘гӣва̄вет̣ханат̣т̣ха̄не’’тиа̄ди. ‘‘а̄гантукапат̣т̣а’’нти имина̄ еййакапаччайасса сарӯпам̣ дассети. есева найо джан̇гхеййаканти еттха̄пи. етам̣ на̄манти ‘‘гӣвеййакам̣, джан̇гхеййака’’нти етам̣ на̄мам̣. итӣти евам̣. етанти ‘‘анувиват̣т̣а’’нтиа̄ди етам̣. ‘‘анувиват̣т̣а’’нти етам̣ на̄манти йоджана̄. виват̣т̣асса̄ти маджджхимакхан̣д̣акасса. ба̄хантанти еттха ба̄ха̄йа упари т̣хапита̄ анта̄ ба̄ханта̄ти вачанаттхам̣ дассенто а̄ха ‘‘ба̄ха̄йа̄’’тиа̄ди. тесанти убхиннаманта̄нам̣. етанти ‘‘ба̄ханта’’нти етам̣.