10. уййодхикасиккха̄падам̣

322. дасаме йуджджхантӣти сам̣пахаранти. ‘‘баласса аггам̣ еттха̄’’тиимина̄ бхинна̄дхикаран̣аба̄хираттхасама̄сам̣ дассети. ‘‘джа̄нантӣ’’типадам̣ аттхасампун̣н̣аттха̄йа паккхиттам̣. агганти кот̣т̣ха̄сам̣. балам̣ ган̣ӣйати еттха̄ти балагганти вачанаттхопи йуджджати. тена̄ха ‘‘балаган̣анат̣т̣ха̄на’’нти. идан̃хи вачанам̣ амбасечанагарусинанайена вуттам̣. катхам̣? ‘‘балаган̣анат̣т̣ха̄на’’нти вадантена ат̣т̣хакатха̄чарийена ‘‘баласса аггам̣ джа̄нанти еттха̄ти балагга’’нти вачанаттхасса пин̣д̣аттхо ча н̃а̄пӣйати, ‘‘балам̣ ган̣ӣйати еттха̄ти балагга’’нти вачанаттхо ча дассӣйати. вийӯхӣйате сампин̣д̣ӣйате бйӯхо, сена̄йа бйӯхо сена̄бйӯхоти аттхам̣ дассети ‘‘сена̄йа вийӯха’’нтиа̄дина̄. ан̣ати бхеравасаддам̣ каротӣти ан̣ӣкам̣, муддхаджан̣ака̄ро, хаттхӣйева ан̣ӣкам̣ хаттха̄н̣ӣкам̣. есева найо сесесупи. йо хаттхӣ пуббе вутто, тена хаттхина̄ти йоджана̄ти. дасамам̣.

ачелакавагго пан̃чамо.