3. парампарабходжанасиккха̄падам̣

221. татийе ‘‘на кхо…пе… каронтӣ’’типа̄т̣хасса аттхасамбандхам̣ дассенто а̄ха ‘‘йена нийа̄мена̄’’тиа̄ди. таттха ‘‘йена нийа̄мена̄’’тиимина̄ ‘‘йатхайиме манусса̄’’ти еттха йатха̄саддасса йам̣саддаттхабха̄вам̣ дассети. тена̄ти тена нийа̄мена. имина̄ йатха̄саддасса нийаманиддит̣т̣хабха̄вам̣ дассети. ‘‘н̃а̄йатӣ’’тиимина̄ кирийа̄па̄т̣хасесам̣ дассети. ‘‘са̄санам̣ ва̄ да̄нам̣ ва̄’’типадехи идам̣саддасса аттхам̣ дассети. буддхаппамукхе сан̇гхети сампада̄наттхе чета̄ни бхуммавачана̄ни, буддхаппамукхасса сан̇гхасса да̄нам̣ ва̄ти аттхо. ‘‘паритта’’нтиимина̄ оракасаддасса аттхам̣ дассети. ‘‘ла̄мака’’нтиимина̄ париттасаддасса парива̄раттхам̣ ниваттети. киро ева патибха̄ве нийутто кирапатикоти аттхам̣ дассенто а̄ха ‘‘кирапатикоти еттха̄’’ти а̄ди. соти кирапатико. каммам̣ ка̄ретӣти самбандхо. упача̄равасена̄ти воха̄равасена, упалаккхан̣авасена, падха̄навасена ва̄ти аттхо. на кевалам̣ бадара̄йева, ан̃н̃епи пана бахӯ кха̄данӣйабходжанӣйа̄ пат̣ийатта̄ти адхиппа̄йо. бадарена миссо бадарамиссо, бадараса̄л̣авоти а̄ха ‘‘бадараса̄л̣авена̄’’ти. бадарачун̣н̣ена миссо мадхусаккхара̄ди ‘‘бадараса̄л̣аво’’ти вуччати.

222. уддхам̣ сӯро уггато асмим̣ ка̄лети уссӯроти вутте атидива̄ка̄лоти а̄ха ‘‘атидива̄’’ти.

226. айам̣ бхаттавикаппана̄ на̄ма ват̣т̣атӣти йоджана̄. пан̃часу сахадхаммикесӯти ниддха̄ран̣асамуда̄йо, иттханна̄масса̄ти самбандхо. йади пана саммукха̄пи викаппитум̣ ват̣т̣ати, тада̄ аттана̄ саха т̣хитасса бхагавато касма̄ на викаппетӣти а̄ха ‘‘са̄ ча̄йа’’нтиа̄ди. са̄ айам̣ викаппана̄ сан̇гахита̄ти самбандхо. касма̄ бхагавато викаппетум̣ на ват̣т̣атӣти а̄ха ‘‘бхагавати хӣ’’тиа̄ди. хӣти саччам̣, йасма̄ ва̄. сан̇гхена катанти самбандхо.

229. ‘‘две тайо нимантане’’типада̄ни лин̇гавипалла̄са̄нӣти а̄ха ‘‘две тӣн̣и нимантана̄нӣ’’ти. нимантитаббо етехӣти нимантана̄ни бходжана̄ни бхун̃джатӣти самбандхо. две тӣн̣и кула̄ни а̄кирантӣти йоджана̄. сӯпабйан̃джананти сӯпо ча бйан̃джанан̃ча сӯпабйан̃джанам̣. ана̄патти екато мисситатта̄ти адхиппа̄йо. мӯланимантананти пат̣хаманимантанам̣ бходжанам̣. антоти хет̣т̣ха̄. екампи кабал̣анти екампи а̄лопам̣. йатха̄ татха̄ ва̄ти йена ва̄ тена ва̄ а̄ка̄рена. таттха̄ти тасмим̣ бходжане. расам̣ ва̄ти кхӣрато ан̃н̃ам̣ расам̣ ва̄. йена кхӣрарасена аджджхоттхатам̣ бхаттам̣ екарасам̣ хоти, там̣ кхӣрам̣ ва̄ там̣ расам̣ ва̄ а̄кирантӣти йоджана̄. йам̣саддо хи уттарава̄кйе т̣хито пуббава̄кйе там̣саддам̣ авагамайати. кхӣрена сам̣сат̣т̣хам̣ бхаттам̣ кхӣрабхаттам̣. евам̣ расабхаттам̣. ан̃н̃епӣти кхӣрабхаттарасабхаттада̄йакато ан̃н̃епи. ана̄патти бхаттена амисситатта̄ти адхиппа̄йо. ‘‘бхун̃джантена̄’’типадам̣ ‘‘бхун̃джиту’’нтипаде бха̄вакатта̄. саппипа̄йа̄сепӣти саппина̄ ча па̄йа̄сена ча кате бхаттепи.

тасса̄ти маха̄упа̄сакасса. а̄паттӣти ча ват̣т̣атӣти ча двиннам̣ ат̣т̣хакатха̄ва̄да̄нам̣ йуттабха̄вам̣ маха̄паччарива̄дена дассетум̣ вуттам̣ ‘‘маха̄паччарийа’’нтиа̄ди. две ат̣т̣хакатха̄ва̄да̄ хи сандха̄йабха̄ситаматтамева висеса̄, аттхато пана ека̄. маха̄паччарийам̣ вуттанти самбандхо. екова̄ти кумбхийа̄ екова. парампарабходжананти парасса парасса бходжанам̣. нимантитамха̄ти ахам̣ нимантито амхи нанӯти аттхо. а̄пуччхитва̄пӣти маха̄упа̄сакам̣ а̄пуччхитва̄пи.

соти анумодако бхиккху. танти бхиккхум̣. ан̃н̃оти ан̃н̃атаро. кинти касма̄. нимантитатта̄ти нимантитабха̄вато.

сакалена га̄мена нимантитопи екато хутва̄ва нимантитасса каппати, на висум̣ висунти а̄ха ‘‘екато хутва̄’’ти. пӯгепӣти сама̄дапетва̄ пун̃н̃ам̣ каронта̄нам̣ самӯхепи. ‘‘нимантийама̄но’’типадасса нимантана̄ка̄рам̣ дассенто а̄ха ‘‘бхаттам̣ ган̣ха̄’’ти. йадаггена̄ти йам̣ аггена йена кот̣т̣ха̄сена̄ти аттхо. двӣсу тхерава̄десу маха̄суматтхерава̄дова йуттоти со паччха̄ вуттоти. татийам̣.