4. севитабба̄севитаббасуттаван̣н̣ана̄

109. ан̃н̃аман̃н̃анти ан̃н̃ам̣ ан̃н̃ам̣. тена̄ха ‘‘ан̃н̃ам̣ севитабба’’нтиа̄ди. саттахи падехӣти саттахи ва̄кйехи. паджджати етена йатха̄дхиппето аттхоти падам̣, ва̄кйам̣. са̄рипуттаттхерасса ока̄сакаран̣ам̣ дхаммада̄йа̄де (ма. ни. 1.31) вуттанайена ведитаббам̣.

113. дит̣т̣хийева паччайавасена пат̣иладдхата̄йа дит̣т̣хипат̣ила̄бхо. сан̃н̃а̄пат̣ила̄бхепи есева найо. миччха̄дит̣т̣хисамма̄дит̣т̣хийо…пе… на гахита̄ каммапатхаппатта̄нам̣ тесам̣ маносама̄ча̄рабха̄вена гахитатта̄. йади евам̣ касма̄ дит̣т̣хи читтуппа̄дава̄ре на гахита̄ти? ка̄мам̣ миччха̄дит̣т̣хийа̄ авайавибха̄во лаббхати, татха̄пи читтуппа̄даккхан̣е локийалокуттарачиттуппа̄десу каммапатхакот̣т̣ха̄со на уддхат̣о.

115. ка̄масан̃н̃а̄дӣнанти еттха а̄ди-саддена йатха̄ бйа̄па̄давихим̣са̄сан̃н̃а̄ сан̇гахита̄, евам̣ анабхиджджха̄абйа̄па̄даавихим̣са̄сан̃н̃а̄ сан̇гахита̄ пат̣хамена а̄дисаддена ‘‘анабхиджджха̄сахагата̄йа сан̃н̃а̄йа̄’’тиа̄дипа̄т̣хасса сан̇гахитатта̄.

117. ти ка̄мабхава̄дӣнам̣ апарийоса̄на̄йа парийоса̄нам̣ иччхатопи та̄дисасса бхава̄нам̣ апарийоса̄намева хоти. чатта̄ро хонти пуггалавасена. тена̄ха ‘‘путхуджджанопи хӣ’’тиа̄ди. акусала̄ дхамма̄ вад̣д̣хантӣти тесам̣ паха̄на̄йа аппат̣ипаджджама̄насса̄ти адхиппа̄йо, тато ева кусала̄ дхамма̄ париха̄йанти. тенасса килесадуккхена випа̄кадуккхена ча садуккхамева аттабха̄вам̣ абхиниббаттети. орамбха̄гийасам̣йоджана̄ни паха̄йа суддха̄ва̄сесу ниббаттана̄рахо ана̄га̄мӣ катхам̣…пе… абхивад̣д̣хантӣти а̄ха ‘‘ана̄га̄мӣпӣ’’тиа̄ди. садуккхамева аттабха̄вам̣ абхиниббаттети, йа̄йа лаббхама̄наакусала̄бхивуддхим̣ кусалапариха̄нин̃ча гахетва̄ ана̄га̄минопи сабйа̄баджджхааттабха̄ва̄бхиниббаттанам̣ вуттам̣. евам̣ йатха̄лаббхама̄нам̣ акусалапариха̄ним̣ кусала̄бхивуддхин̃ча гахетва̄ путхуджджанассапи антимабхавикасса абйа̄баджджхааттабха̄ва̄бхиниббаттанам̣ вуттанти дат̣т̣хаббам̣. тена̄ха ‘‘путхуджджанопӣ’’тиа̄ди. акусаламева ха̄йати,на кусалам̣ тасса буддхипаккхе т̣хитатта̄. таттха̄пи випассанамева габбхам̣ ган̣ха̄пети, на ват̣т̣агаббхам̣ антимабхавиката̄йа виват̣т̣ӯпанисситатта̄ аджджха̄сайасса, н̃а̄н̣асса ча па̄кагаманато.

119. екаччасса̄ти са̄мивачанам̣ ‘‘абхинандатӣ’’тиа̄дӣсу паччаттавасена парин̣а̄метаббам̣, татха̄ ‘‘ниббиндатӣ’’тиа̄дӣсупи. угган̣хитва̄пӣти пи-саддо луттаниддит̣т̣хо. бхагавато бха̄ситасса аттхам̣ аджа̄нанта̄ та̄ва дӣгхараттам̣ хитасукхато париба̄хира̄ хонту джа̄нанта̄нампи саббесам̣ дӣгхараттам̣ хита̄йа сукха̄йа хотӣти анекам̣сикатам̣ чоденто ‘‘евам̣ сантепӣ’’тиа̄дима̄ха. итаро саббесампи дӣгхараттам̣ хита̄йа сукха̄йа хотийева̄ти, ‘‘аппат̣исандхика̄’’тиа̄дина̄ анекам̣сикатам̣ парихарати. сесам̣ сувин̃н̃еййамева.

севитабба̄севитаббасуттаван̣н̣ана̄йа лӣнаттхаппака̄сана̄ саматта̄.