3. саппурисадхаммасуттаван̣н̣ана̄

105. саппурисадхамманти саппурисабха̄вакарам̣ дхаммам̣. со пана йасма̄ саппуриса̄нам̣ павен̣ико дхаммо хоти. тасма̄ а̄ха – ‘‘саппуриса̄нам̣ дхамма’’нти, еса найо асаппурисадхамманти еттха̄пи. евам̣ падха̄нам̣ анут̣т̣ха̄таббан̃ча саппурисадхаммам̣ а̄дим̣ катва̄ ма̄тикам̣ т̣хапетва̄ айатха̄нупуббийа̄ ниддисанто ‘‘катамо ча, бхиккхаве, асаппурисадхаммо’’тиа̄дима̄ха. татха̄ пана ниддисанто уда̄харан̣апуббакам̣ хетум̣ дассетум̣, ‘‘йатха̄ на̄ма̄’’тиа̄ди вуттам̣. тена иччхитаббапаричча̄гапуббакам̣ гахетаббаггахан̣ам̣ на̄ма н̃а̄йапат̣ипатти, тасма̄ саппурисадхамма̄ сампа̄детабба̄ти дӣпенто саттха̄ айатха̄нупуббийа̄ ниддха̄рӣйатӣти имаматтхам̣ дассети. татха̄ ан̃н̃аттха̄пи ‘‘асевана̄ ча ба̄ла̄нам̣, пан̣д̣ита̄нан̃ча севана̄’’ти. етадева хи куладвайам̣ ‘‘уччакула’’нти вуччати ниппарийа̄йато. татха̄хи антимабхавика̄ бодхисатта̄ таттхева пат̣исандхим̣ ган̣ханти. соти са̄мӣчиппат̣ипанно бхиккху. антарам̣ каритва̄ти там̣ ка̄ран̣ам̣ катва̄. пат̣ипада̄ хи вин̃н̃ӯнам̣ пӯджа̄йа ка̄ран̣ам̣, на уччакулӣната̄. маха̄кула̄ти випулакула̄ упа̄дитодитакуласампаваттика̄ти аттхо.

106. йасасаддо парива̄рава̄чако. йасассӣти ча са̄тисайапарива̄равантата̄ вуччатӣти а̄ха ‘‘парива̄расампанно’’ти. а̄дхипатеййа̄бха̄вато паресам̣ упаринатти етесам̣ ӣсо ӣсанам̣ иссарийанти аккха̄табба̄ти аппесаккха̄. тена̄ха ‘‘аппапарива̄ра̄’’ти. абха̄ваттхо хи идха аппа-саддо.

107. навева дхутан̇га̄ни а̄гата̄нӣти еттха йатха̄ уккат̣т̣хапам̣сукӯликасса течӣвариката̄ сукара̄. евам̣ уккат̣т̣хапин̣д̣апа̄тикасса сапада̄нача̄риката̄ сукара̄. ека̄саникасса ча паттапин̣д̣икакхалупаччха̄бхаттиката̄ сукара̄ ева̄ти – ‘‘пам̣сукӯлико хотӣ’’тиа̄дивачаненева па̄л̣ийа̄ ана̄гата̄нампи а̄гатабха̄во ведитаббо парихаран̣асукарата̄йа тесампи сама̄да̄насамбхавато. тена̄ха ‘‘тераса хонтӣ’’ти.

108. ка̄матан̣ха̄дика̄йа та̄йа тан̣ха̄йа ниббатта̄ти таммайа̄, путхуджджана̄, пакатибха̄вӯпагаманена тесам̣ бха̄во таммайата̄, таппат̣иккхепато атаммайата̄, ниттан̣хата̄. там̣йева ка̄ран̣ам̣ катва̄ти пат̣хамаджджха̄непи тан̣ха̄паха̄нам̣йева ка̄ран̣ам̣ катва̄. читте уппа̄детва̄ти атаммайата̄парийа̄йена вутте тан̣ха̄йа пат̣ипаккхадхамме сампа̄детва̄. на ман̃н̃атӣти ман̃н̃ана̄нам̣ арийамаггена саббасо самуччхиннатта̄ кисмин̃чи ока̄се ка̄мабхава̄дике кеначи ваттхуна̄ хаттхиассакхеттаваттха̄дина̄ паттачӣваравиха̄рапаривен̣а̄дина̄ ча пуггалам̣ на ман̃н̃ати. сесам̣ сувин̃н̃еййамева.

саппурисадхаммасуттаван̣н̣ана̄йа лӣнаттхаппака̄сана̄ саматта̄.