14. париккха̄раха̄раван̣н̣ана̄

‘‘саббадхаммамӯлапарийа̄йа’’нти еттха саббадхамма̄ на̄ма парийа̄паннадхамма̄, те кусала̄кусала̄бйа̄катабхедена тивидха̄. тесу кусала̄нам̣ йонисоманасика̄ро алобха̄дайо ча хетӯ, акусала̄нам̣ айонисоманасика̄ро лобха̄дайо ча хетӯ, абйа̄катесу випа̄ка̄нам̣ йатха̄сакам̣ каммам̣, итаресам̣ бхаван̇гама̄ваджджанасаманна̄ха̄ра̄ди ча хетӯ. еттха ча саппурисӯпаниссайа̄дико паччайо хетумхи ева самаварул̣хо, со таттха а̄ди-саддена сан̇гахитоти дат̣т̣хаббо. ‘‘мӯла’’нти вутта̄нам̣ ман̃н̃ана̄нам̣ хетубха̄во па̄л̣ийам̣ вутто ева. ман̃н̃ана̄су пана тан̣ха̄ман̃н̃ана̄йа асса̄да̄нупассана̄ хету. ‘‘сан̃н̃оджанийесу дхаммесу асса̄да̄нупассино тан̣ха̄ павад̣д̣хатӣ’’ти (сам̣. ни. 2.52) хи вуттам̣. ма̄наман̃н̃ана̄йа дит̣т̣хивиппайутталобхо хету кевалам̣ сам̣саггавасена ‘‘ахамасмӣ’’ти паваттанато. дит̣т̣химан̃н̃ана̄йа екаттанайа̄дӣнам̣ айа̄тха̄вагга̄хо хету, ассутабха̄во путхуджджанабха̄васса хету, со арийа̄нам̣ адассанасӣлата̄йа, са̄ арийадхаммасса аковидата̄йа, са̄ арийадхамме авинӣтата̄йа хету, сабба̄ ча̄йам̣ хетупарампара̄ патхавӣа̄дӣсу ‘‘етам̣ мама, есохамасми, есо ме атта̄’’ти тиссаннам̣ ман̃н̃ана̄нам̣ хету, секкха̄раха̄дибха̄ва̄ пана маттасо саббасо ча ман̃н̃ана̄бха̄васса хетӯти. айам̣ париккха̄ро ха̄ро.