16. сама̄ропанаха̄раван̣н̣ана̄

‘‘саббадхаммамӯлапарийа̄йа’’нтиа̄дӣсу мӯлапарийа̄йаггахан̣ена ассутава̄гахан̣ена сан̃джа̄нанаман̃н̃ана̄парин̃н̃а̄гахан̣ехи ча сам̣килесадхамма̄ дассита̄, те ча сан̇кхепато тивидха̄ тан̣ха̄сам̣килесо дит̣т̣хисам̣килесо дуччаритасам̣килесоти. таттха тан̣ха̄сам̣килесо тан̣ха̄сам̣килесасса, дит̣т̣хисам̣килесасса, дуччаритасам̣килесасса ча падат̣т̣ха̄нам̣, татха̄ дит̣т̣хисам̣килесо дит̣т̣хисам̣килесасса, тан̣ха̄сам̣килесасса, дуччаритасам̣килесасса ча падат̣т̣ха̄нам̣, дуччаритасам̣килесопи дуччаритасам̣килесасса, тан̣ха̄сам̣килесасса, дит̣т̣хисам̣килесасса ча падат̣т̣ха̄нам̣. тесу тан̣ха̄сам̣килесо аттхато лобхова, йо ‘‘лобхо луббхана̄ луббхитаттам̣ са̄ра̄го са̄раджджана̄ са̄раджджитатта’’нтиа̄дина̄ (дха. са. 389) анекехи парийа̄йехи вибхатто. татха̄ дит̣т̣хийева дит̣т̣хисам̣килесо, йо ‘‘дит̣т̣хигатам̣ дит̣т̣хигаханам̣ дит̣т̣хиканта̄ро дит̣т̣хивисӯкам̣ дит̣т̣хивиппхандита’’нтиа̄дина̄ (дха. са. 1105) анекехи парийа̄йехи, ‘‘санти, бхиккхаве, еке саман̣абра̄хман̣а̄’’тиа̄дина̄ (дӣ. ни. 1.30) два̄сат̣т̣хийа̄ пабхедехи ча вибхатто. дуччаритасам̣килесо пана аттхато дуссӣлйачетана̄ чева четана̄сампайуттадхамма̄ ча, йа̄ ‘‘ка̄йадуччаритам̣ вачӣдуччаритам̣ ка̄йависамам̣ вачӣвисама’’нти (вибха. 913, 924), ‘‘па̄н̣а̄типа̄то адинна̄да̄на’’нти (вибха. 913) ча а̄дина̄ анекехи парийа̄йехи, анекехи пабхедехи ча вибхатта̄.

тесу тан̣ха̄сам̣килесасса саматхо пат̣ипаккхо, дит̣т̣хисам̣килесасса випассана̄, дуччаритасам̣килесасса сӣлам̣ пат̣ипаккхо. те пана сӣла̄дайо дхамма̄ идха парин̃н̃а̄гахан̣ена секкхаггахан̣ена ‘‘араха’’нтиа̄дина̄ арийата̄диггахан̣ена ча гахита̄. таттха сӣлена дуччаритасам̣килесаппаха̄нам̣ сиджджхати, татха̄ тадан̇гаппаха̄нам̣ вӣтиккамаппаха̄нан̃ча, саматхена тан̣ха̄сам̣килесаппаха̄нам̣ сиджджхати, татха̄ виккхамбханаппаха̄нам̣ парийут̣т̣ха̄наппаха̄нан̃ча. випассана̄йа дит̣т̣хисам̣килесаппаха̄нам̣ сиджджхати, татха̄ самуччхедаппаха̄нам̣ анусайаппаха̄нан̃ча. таттха пуббабха̄ге сӣле патит̣т̣хитасса саматхо, саматхе патит̣т̣хитасса випассана̄, маггаккхан̣е пана самака̄ламева бхаванти. пуббейева хи супарисуддхака̄йавачӣкаммасса супарисуддха̄джӣвасса ча саматхавипассана̄ а̄раддха̄ габбхам̣ ган̣хантийо парипа̄кам̣ гаччхантийо вут̣т̣ха̄нага̄минивипассанам̣ парибрӯхенти, вут̣т̣ха̄нага̄минивипассана̄ бха̄вана̄па̄рипӯрим̣ гаччхантӣ маггена гхат̣енти маггаккхан̣е саматхавипассана̄ парипӯрети. атха маггаккхан̣е саматхавипассана̄бха̄вана̄па̄рипӯрийа̄ анавасесасам̣килесадхаммам̣ самуччхиндантийо ниродхам̣ нибба̄нам̣ саччхикаронтӣти. айам̣ сама̄ропано ха̄ро.

сол̣асаха̄раван̣н̣ана̄ нит̣т̣хита̄.