14. адхит̣т̣ха̄наха̄раван̣н̣ана̄

‘‘саббадхаммамӯлапарийа̄йа’’нти еттха саббадхаммаггахан̣ам̣ са̄ман̃н̃ато адхит̣т̣ха̄нам̣. ‘‘патхавим̣ а̄па’’нтиа̄ди пана там̣ авикаппетва̄ висесавачанам̣. татха̄ ‘‘мӯлапарийа̄йа’’нти са̄ман̃н̃ато адхит̣т̣ха̄нам̣, там̣ авикаппетва̄ висесавачанам̣ ‘‘патхавим̣ ман̃н̃ати…пе… абхинандатӣ’’ти. ‘‘патхавим̣ ман̃н̃атӣ’’ти ча са̄ман̃н̃ато адхит̣т̣ха̄нам̣ тан̣ха̄дигга̄ха̄нам̣ са̄дха̄ран̣атта̄ ман̃н̃ана̄йа, там̣ авикаппетва̄ висесавачанам̣ ‘‘етам̣ мама, есохамасми, есо ме атта̄’’ти, евам̣ суттантарапада̄нипи а̄нетва̄ висесавачанам̣ ниддха̄ретаббам̣. сесава̄ресупи есева найо. ‘‘секкхо’’ти са̄ман̃н̃ато адхит̣т̣ха̄нам̣, там̣ авикаппетва̄ висесавачанам̣ ‘‘ка̄йасаккхӣ дит̣т̣хиппатто саддха̄вимутто саддха̄нуса̄рӣ дхамма̄нуса̄рӣ’’ти. татха̄ ‘‘секкхо’’ти са̄ман̃н̃ато адхит̣т̣ха̄нам̣, там̣ авикаппетва̄ висесавачанам̣ ‘‘идха, бхиккхаве, бхиккху секкха̄йа самма̄дит̣т̣хийа̄ саманна̄гато хоти…пе… секкхена самма̄сама̄дхина̄ саманна̄гато хотӣ’’ти (сам̣. ни. 5.13). ‘‘араха’’нти са̄ман̃н̃ато адхит̣т̣ха̄нам̣, там̣ авикаппетва̄ висесавачанам̣ ‘‘убхатобха̄гавимутто пан̃н̃а̄вимутто (пу. па. 13.2; 15.1 ма̄тика̄), тевиджджо чхал̣абхин̃н̃о’’ти (пу. па. 7.26, 27 ма̄тика̄) ча. ‘‘кхӣн̣а̄саво’’ти са̄ман̃н̃ато адхит̣т̣ха̄нам̣, там̣ авикаппетва̄ висесавачанам̣ ‘‘ка̄ма̄сава̄пи читтам̣ вимуччиттха, бхава̄сава̄пи читтам̣ вимуччиттха̄’’тиа̄ди (па̄ра̄. 14). сесападесупи есева найо. ‘‘абхиджа̄на̄тӣ’’ти са̄ман̃н̃ато адхит̣т̣ха̄нам̣, там̣ авикаппетва̄ висесавачанам̣ ‘‘ман̃н̃атӣ’’ти. ман̃н̃ана̄бха̄во хисса паха̄напат̣иведхасиддхо, паха̄напат̣иведхо ча парин̃н̃а̄саччхикирийа̄бха̄вана̄пат̣иведхехи на вина̄ти саббепи абхин̃н̃а̄висеса̄ ман̃н̃ана̄пат̣иккхепена аттхато гахита̄ва хонтӣти. татха̄ ‘‘араха’’нти са̄ман̃н̃ато адхит̣т̣ха̄нам̣, там̣ авикаппетва̄ висесавачанам̣ ‘‘вӣтара̄гатта̄ вӣтадосатта̄ вӣтамохатта̄’’ти. имина̄ найена сесападесупи са̄ман̃н̃ависесаниддха̄ран̣а̄ ведитабба̄. айам̣ адхит̣т̣ха̄но ха̄ро.