7. а̄ват̣т̣аха̄равибхан̇гаван̣н̣ана̄

29. акусала̄нам̣ дхамма̄нам̣ виддхам̣санасабха̄ватта̄, акусала̄нам̣ ва̄ паджахане кусала̄нам̣ сампа̄дане пат̣т̣хапанасабха̄ватта̄ а̄рамбхадха̄ту. татха̄бхӯта̄ти сӣла̄дӣхи саман̇гӣбхӯта̄. ка̄мадха̄туа̄дика̄ тидха̄туйова тедха̄ту. тасса абхибхаванато тедха̄туиссаро маччура̄джа̄. ана̄диматисам̣са̄ре чирака̄лам̣ ладдхапатит̣т̣ха̄пи ачирака̄лам̣ бха̄витехи кусалехи дхаммехи самуччхинданӣйатта̄ абала̄ килеса̄ти вуттам̣ ‘‘абалам̣ дуббала’’нти. тена̄ха ‘‘абала̄ нам̣ балӣйантӣ’’ти.

идам̣ вачанам̣ айам̣ га̄тха̄па̄до. сама̄дхисса падат̣т̣ха̄нанти еттха сама̄дхисса ка̄ран̣ам̣ самата̄нуйоге нийоджанатоти йоджетаббам̣. еса найо сесесупи. папан̃ча̄ти ра̄га̄дайова. татха̄ чева сам̣ван̣н̣итанти десана̄йа падат̣т̣ха̄набха̄венева аттхасам̣ван̣н̣ана̄ ката̄ти аттхо.

нти там̣ десанам̣. тасса̄ти сабха̄га̄дивасена а̄ват̣т̣анасса. парипаккан̃а̄н̣а̄нам̣ висеса̄дхигама̄йа. ла̄бхавиниччхайапариггахамаччхарийа̄нӣтиа̄дӣсу ла̄бхоти рӯпа̄диа̄рамман̣аппат̣ила̄бхо. со парийесана̄йа сати хотӣти парийесана̄ггахан̣ена гахито. виниччхайоти ‘‘еттакам̣ ме рӯпа̄рамман̣аттха̄йа бхависсати, еттакам̣ садда̄диа̄рамман̣аттха̄йа, еттакам̣ майхам̣, еттакам̣ парасса, еттакам̣ парибхун̃джисса̄ми, еттакам̣ нидахисса̄мӣ’’ти евам̣ паватто витакко виниччхайо. со ла̄питахетукатта̄ парийесанамӯлаката̄йа парийесана̄ггахан̣енева гахито, татха̄ париггахамаччхарийа̄ни. таттха париггахо ‘‘мама ида’’нти паригган̣ханам̣. маччхарийам̣ ‘‘майхева хотӯ’’ти парехи са̄дха̄ран̣абха̄ва̄саханам̣. теневасса пора̄н̣а̄ евам̣ вачанаттхам̣ ваданти ‘‘майхевидамаччхарийам̣ хоту, ма̄ ан̃н̃есам̣ аччхарийам̣ хотӯти паваттатта̄ маччхарийанти вуччатӣ’’ти (дӣ. ни. ат̣т̣ха. 2.103; а. ни. ат̣т̣ха. 3.9.23). парибхогаттха̄нам̣ пана виниччхайа̄дӣнам̣ парибхогантогадхата̄ ведитабба̄. чхандара̄го дуббалара̄го. аджджхоса̄нам̣ ‘‘мама ида’’нти тан̣ха̄васена балавасаннит̣т̣ха̄нанти а̄ха ‘‘чхандара̄гааджджхоса̄на̄ тан̣ха̄ ева̄’’ти. а̄раккханимиттам̣ два̄рапидаханаман̃джӯса̄гопана̄дина̄ сут̣т̣ху раккхан̣анимиттам̣. па̄па̄ни каронто парибхоганимиттам̣ ратто гиддхо гадхито муччхито хутва̄ мигова парибхун̃джананимиттам̣ пама̄дам̣ а̄паджджатӣти евам̣ парийена̄раккха̄ парибхоганимиттам̣. пама̄до тивидхо тан̣ха̄йа васена катхитоти дассенто ‘‘тивидхо тан̣ха̄йа̄ти вутта’’нти а̄ха.

ависесена вуттанти ‘‘катамена упа̄да̄нена саупа̄да̄на̄’’ти вибха̄гена пуччхитва̄пи ‘‘авиджджа̄йа ча тан̣ха̄йа ча̄’’ти авиниббхуджитва̄ вуттам̣. тан̣хан̃ча авиджджан̃ча чатурупа̄да̄нам̣ васена̄ти ка̄мупа̄да̄на̄дӣнам̣ чатуннам̣ упа̄да̄на̄нам̣ васена вибхаджитва̄ кхандха̄нам̣ дуккхабха̄вена дуккхасаччабха̄вена саха парин̃н̃еййабха̄вам̣, упа̄да̄на̄нам̣ самудайабха̄вена самудайасаччабха̄вена саха паха̄таббабха̄вам̣ дассетӣти йоджана̄.

30. ‘‘йо’’тиа̄дина̄ вутто тивидхо пама̄до парийесати, а̄раккхан̣ан̃ча кароти, парибхоганимиттан̃ча̄ти самбандхо. пама̄до хи памаджджантасса пуггаласса бхога̄нам̣ парийесана̄йа, а̄раккхан̣а̄йа ча хетубхӯто каттубха̄вена упачарито, парибхогасса пана нимиттам̣. ‘‘таппат̣ипаккхена̄’’ти падасса аттхам̣ виварати ‘‘аппама̄да̄нуйогена̄’’ти, тена саматхабха̄вам̣ дассети. кхепана̄ти кхайапа̄пана̄. вода̄напаккхависабха̄гадхаммавасена̄ти вода̄напаккхо ча со пама̄дасса висабха̄гадхаммо ча̄ти вода̄на…пе… дхаммо, саматхо, тасса васена.

саматхе сатӣти адхит̣т̣ха̄набхӯте джха̄не сати, там̣ па̄дакам̣ катва̄ти аттхо. йа̄ пан̃н̃а̄ти на̄марӯпапариччхеда̄дивасена паваттапан̃н̃а̄. тена̄ха ‘‘айам̣ випассана̄’’ти. пахӣнесӯти пахӣйама̄несу.

вода̄напаккханти а̄рамбхадха̄туа̄дивода̄напаккхам̣ никкхипитва̄. висабха̄гадхаммавасена̄ти пама̄давасенева. сабха̄гадхаммавасена̄ти пуббе никкхиттасса а̄рамбхадха̄туа̄дивода̄надхаммасса саматха̄дисабха̄гадхаммавасена.

пуна апарийода̄панийам̣ сикха̄ппаттапарийода̄панам̣ идха̄дхиппетанти а̄ха ‘‘там̣ пана арахаттена хотӣ’’ти.

мохасамут̣т̣ха̄ната̄ вутта̄ ‘‘мохо ева самут̣т̣ха̄на’’нти катва̄. ан̃н̃атха̄ писун̣а̄ва̄ча̄йа досасамут̣т̣ха̄ната̄ муса̄ва̄дасса вийа мохасамут̣т̣ха̄набха̄ва̄ ваттабба̄ сийа̄.

каммапатхабха̄вам̣ патта̄нам̣, аппатта̄нан̃ча акусаладхамма̄нам̣ ‘‘саббапа̄па’’нти падена париггахитатта̄ вуттам̣ ‘‘каммапатхакаммавибха̄гена̄’’ти.

31. сесапада̄нанти ‘‘кусаласса упасампада̄’’тиа̄дӣнам̣ (дӣ. ни. 2.90; дха. па. 183; нетти. 30, 50, 116, 124; пет̣ако. 29) га̄тха̄йа авасит̣т̣хапада̄нам̣. йатха̄дхигатанти аттана̄ адхигатаппака̄рам̣, паччха̄ бхӯмидиса̄.

упари йа̄пентӣти мануссалокато упарит̣т̣химам̣ девалокам̣ гаменти.

32. йатха̄вуттасса дхаммасса̄ти сӣласса ча маггасса ча. тан̣ха̄виджджа̄дӣнанти а̄дисаддена тадекат̣т̣хакилеса̄ гайханти, тесам̣ падат̣т̣ха̄надхамма̄ ча. саматхавипассана̄дӣнанти а̄дисаддена са̄ман̃н̃апхала̄нам̣ сан̇гахо. йадаггена четтха ‘‘ниродхо раккхатӣ’’ти вутто, тадаггена магго раккхан̣акирийа̄йа каран̣ам̣ вуттам̣ ‘‘йена раккхатӣ’’ти. висабха̄гадхаммавасена пурима̄ни сабха̄гадхамма̄ват̣т̣анавасена паччхима̄ни сачча̄ни ниддха̄рита̄нӣти йоджетаббам̣.

а̄ват̣т̣аха̄равибхан̇гаван̣н̣ана̄ нит̣т̣хита̄.