4. падат̣т̣ха̄наха̄равибхан̇гаван̣н̣ана̄

22. тесам̣ тесанти анавасесапарийа̄да̄нам̣, тена йе сутте вутта̄ ча дхамма̄, йе ча тесам̣ ка̄ран̣абхӯтам̣, тесам̣ саббесампӣти вуттам̣ хоти. саббадхаммайа̄тха̄ваасампат̣иведхоти имаматтхам̣ дассетум̣ ‘‘каттха пана со’’тиа̄ди вуттам̣.

пийа̄йитаббаджа̄тийанти пеманӣйасабха̄вам̣. миччха̄пат̣ипада̄ти пама̄да̄патти, миччха̄бхинивесо ва̄. екава̄рам̣ уппанна̄пи па̄н̣а̄типа̄тачетана̄ вераппасаванато досасса, екава̄рам̣ уппанна̄пи пама̄да̄патти, миччха̄бхинивесо ва̄ мохасса уппаттика̄ран̣анти па̄л̣ийам̣ авуттампи найато ниддха̄ретаббанти дассенто ‘‘досасса…пе… имина̄ва найена аттхо ведитаббо’’ти а̄ха. нимиттаттхаггахан̣алаккхан̣ам̣ ван̣н̣асан̣т̣ха̄нам̣, анубйан̃джанаттхаггахан̣алаккхан̣ам̣ анубйан̃джананти ‘‘нимитта̄нубйан̃джанаггахан̣алаккхан̣а̄’’ти вуттам̣. таттха таттха нимиттам̣ иттхипурисанимиттам̣. анубйан̃джанам̣ хаттхапа̄дахаситакатхита̄ди. пхассо паччайо етисса̄ти пхассапаччайа̄, там̣бха̄во пхассапаччайата̄. асса̄дети ета̄йа̄ти асса̄до, тан̣ха̄.

ваттхӯни н̃еййадхаммоти а̄ха ‘‘ваттхуавиппат̣ипатти висайасабха̄вапат̣иведхо’’ти. идха̄дхиппетам̣ самма̄пат̣ипаттим̣ дассетум̣ ‘‘сӣласама̄дхисампада̄на’’нти вуттам̣. екадесупалаккхан̣авасена, ван̣н̣агандхара̄гисаппа̄йавасена ва̄ па̄л̣ийам̣ ‘‘винӣлакавипуббакаггахан̣алаккхан̣а̄ асубхасан̃н̃а̄’’ти ватва̄ ‘‘тасса̄ ниббида̄падат̣т̣ха̄на’’нти вуттам̣ ниббидам̣ дассенто ‘‘ниббида̄’’тиа̄ди вуттам̣. таттха паритассанато висесетум̣ ‘‘н̃а̄н̣ена̄’’ти висеситам̣. татха̄ паваттанти ниббидана̄ка̄рена паваттанам̣.

йонисо уммуджджантийа̄ видехаран̃н̃о дхӣта̄йа руча̄йа джа̄тиссаран̃а̄н̣ам̣ каммассакатан̃н̃а̄н̣асса ка̄ран̣ам̣ ахоси, на пана асаппурисӯпаниссайато, айонисо уммуджджантасса тассева ран̃н̃о сена̄патино ала̄тасса бӣджакасса да̄сасса̄ти имаматтхам̣ дассенто ‘‘имасса ча…пе… уда̄харитаббо’’ти а̄ха. соти паса̄до. аваттха̄висесоти сампайуттадхамма̄нам̣ ана̄вилабха̄валаккхито аваттха̄бхедо. а̄йатанагатоти т̣ха̄нагато, ратанаттайависайоти аттхо. ‘‘ка̄йо’’тиа̄дина̄ аваттха̄висесена вина̄ сабха̄васиддхамева падат̣т̣ха̄нам̣ дассети.

имасмим̣ ча т̣ха̄не па̄л̣ийам̣ пуббе йесам̣ дхамма̄нам̣ падат̣т̣ха̄нам̣ ниддха̄ритам̣, те дхамма̄ йесам̣ дхамма̄нам̣ падат̣т̣ха̄на̄ни хонти, те дассетум̣ ‘‘апаро найо’’тиа̄ди а̄раддханти ведитаббам̣. асса̄даманасика̄ро айонисоманасика̄ралаккхан̣о вутто нидассанаматтааттхоти ведитаббо, йебхуййена сатта̄нам̣ лобхавасена айонисоманасика̄ра̄ сам̣ваттантӣтти дассанаттхам̣ ва̄ евам̣ вуттам̣. упапатти ева опапаччайам̣, тасса бха̄во опапаччайиканти а̄ха ‘‘упапаттибхавабха̄вена̄’’ти. ваваттхитабха̄воти ваваттхитабха̄во рӯпасса дассана̄дипат̣инийата̄рамман̣акиччата̄. бхавасса ан̇га̄нӣти бхавасса ка̄ран̣а̄ни. дутийе ан̇га̄нӣти авайава̄, каммават̣т̣ампи ва̄ ка̄ран̣ан̇габха̄вена йоджетаббам̣.

каммат̣т̣ха̄насса̄ти бха̄вана̄йа брӯхана̄ вад̣д̣хана̄. тесӯти титтхан̃н̃ута̄дӣсу. калйа̄н̣амиттасса саммадева пайирупа̄сана̄йапӣти там̣ нисса̄йа ладдхена сабба̄йа дхаммассаванена дхаммупасам̣хитам̣ па̄моджджам̣ хотӣти титтхан̃н̃ута̄ пӣтан̃н̃ута̄йа падат̣т̣ха̄нам̣. евам̣ йа̄йа вимуттийа̄ сати вимуттин̃а̄н̣адассанам̣ хотӣти са̄ тасса падат̣т̣ха̄нанти айаматтхо па̄кат̣оти а̄ха ‘‘пурима̄нам̣…пе… сувин̃н̃еййо ева̄’’ти. саха адхит̣т̣ха̄нена̄ти н̃а̄тапарин̃н̃а̄йа саддхим̣. н̃а̄тапарин̃н̃а̄ хи тӣран̣апарин̃н̃а̄йа адхит̣т̣ха̄нам̣. сесам̣ сувин̃н̃еййамева.

падат̣т̣ха̄наха̄равибхан̇гаван̣н̣ана̄ нит̣т̣хита̄.