47. суддхиниддесаван̣н̣ана̄

455. десана̄ сам̣варо ет̣т̣хи паччавеккхан̣анти бхедато суддхи чатуббидха̄ти самбандхо. ‘‘паччавеккхан̣ам̣ бхедато’’ти ваттаббе ниггахиталопо дат̣т̣хаббо, десана̄суддхи сам̣варасуддхи парийет̣т̣хисуддхи паччавеккхан̣асуддхӣти чатуббидха̄ти вуттам̣ хоти. таттха суджджхатӣти суддхи, йатха̄дхаммам̣ десана̄йа суддхи десана̄суддхи. вут̣т̣ха̄насса̄пи четтха десана̄йа ева сан̇гахо дат̣т̣хаббо. мӯла̄паттӣнам̣ пана абхиккхута̄пат̣ин̃н̃а̄ва десана̄ти хет̣т̣ха̄ вутта̄, са̄васса па̄ра̄джика̄паннасса висуддхи на̄ма хоти. айан̃хи йасма̄ па̄ра̄джикам̣ а̄панно, тасма̄ бхиккхубха̄ве т̣хатва̄ абхаббо джха̄на̄дӣни адхигантум̣. бхиккхубха̄во хисса саггантара̄йо чева хоти, маггантара̄йо ча. вуттан̃хетам̣ –

‘‘са̄ман̃н̃ам̣ дуппара̄мат̣т̣хам̣, нирайа̄йӯпакад̣д̣хатӣ’’ти. (дха. па. 311);

апарампи вуттам̣ –

‘‘ситхило хи париббаджо, бхиййо а̄кирате раджа’’нти. (дха. па. 313);

иччасса бхиккхубха̄во висуддхи на̄ма на хоти. йасма̄ пана гихиа̄дико хутва̄ да̄насаран̣асӣласам̣вара̄дӣхи саггамаггам̣ ва̄ джха̄навимоккхамаггам̣ ва̄ а̄ра̄дхетум̣ бхаббо хоти, тасма̄сса гихиа̄дибха̄во висуддхи на̄ма хоти. адхит̣т̣ха̄нависит̣т̣хена сам̣варена висуддхи сам̣варависуддхи. дхаммена самена паччайа̄нам̣ ет̣т̣хийа̄ суддхи ет̣т̣хисуддхи. чатӯсу паччайесу паччавеккхан̣ена суддхи паччавеккхан̣асуддхи. ‘‘чатуббидха̄ па̄тӣ’’тиа̄дӣсу па̄тимоккхасам̣варасамматанти ‘‘па̄тимоккхасам̣варо’’ти самматам̣ сӣлам̣.

456. читта̄дхит̣т̣ха̄насам̣вара̄ суджджхатӣти индрийасам̣варо сам̣варасуддхӣти вуттоти йоджана̄.

457. анесанам̣ паха̄йа дхаммена уппа̄дентасса ет̣т̣хийа̄ суддхатта̄ а̄джӣванисситам̣ ет̣т̣хисуддхӣти вуттанти самбандхо. уппа̄дентасса̄ти паччайе уппа̄дентасса.

458. паччавеккхан̣асуджджхана̄ти хетумхи пан̃чамӣти.

суддхиниддесаван̣н̣ана̄ нит̣т̣хита̄.

48. сантосаниддесаван̣н̣ана̄

459. пам̣сукӯлам̣ пин̣д̣ийа̄лопо руккхамӯлам̣ пӯтимуттабхесаджджанти име чатта̄ро паччайа̄ аппаггханаката̄йа аппа̄ чева кассачипи а̄лайа̄бха̄вена анаваджджа̄ ча гатагатат̣т̣ха̄не лаббхама̄ната̄йа сулабха̄ ча̄ти вуччанти, тена̄ха ‘‘аппена̄’’тиа̄ди. маттан̃н̃ӯти парийесанаппат̣иггахан̣апарибхогависсаджджанесу чатӯсу маттан̃н̃ута̄васена пама̄н̣ан̃н̃ӯ.

460. катхам̣ сантут̣т̣хоти а̄ха ‘‘атӣта’’нтиа̄ди. паччуппаннена йа̄пентоти йатха̄ла̄бхайатха̄балайатха̄са̄руппавасена паччуппаннена йатха̄вуттачатуббидхапаччайена йа̄пентоти.

сантосаниддесаван̣н̣ана̄ нит̣т̣хита̄.