3. паттавагго

1. паттасиккха̄падаван̣н̣ана̄

две апатта̄, тасма̄ ете бха̄джанапарибхогена парибхун̃джитабба̄, наадхит̣т̣ха̄нӯпага̄навикаппанӯпагата̄ти аттхоти ча. саман̣аса̄руппена пакканти айопатто пан̃чахи па̄кехи пакко хоти, маттика̄патто двӣхи. ‘‘бхиккхунийа̄ паттасанниччайасса ва̄ритатта̄ (ваджира. т̣ӣ. па̄ра̄джика 602) бхиккхуссапи там̣ ‘ананурӯпа’нти катва̄ ‘пура̄н̣апаттам̣ паччуддхаритва̄’ти вутта’’нти ча ликхитам̣, там̣ на йуттам̣ па̄л̣ийам̣ ‘‘санниччайам̣ кареййа̄ти анадхит̣т̣хито авикаппито’’ти (па̄чи. 735) вуттатта̄. со хи катхинаккхандхаке (маха̄ва. 306 а̄дайо) ниччайасаннидхи вийа екопи пунадивасе ‘‘санниччайо’’ти вуччати. анантарасиккха̄паде пана ‘‘дутийо ва̄рито’’ти адхит̣т̣ха̄нам̣ нийатам̣. тасма̄ две патте адхит̣т̣ха̄тум̣ на лабхати. саче екато адхит̣т̣ха̄ти, двепи анадхит̣т̣хита̄ хонти. висум̣ висум̣ адхит̣т̣ха̄ти, дутийо анадхит̣т̣хито. викаппетум̣ пана бахӯпи лабхати. ка̄кан̣икаматтампӣти еттха пи-ка̄ро ‘‘екапа̄кампи джанетӣ’’ти па̄кам̣ сампин̣д̣ети. атха ва̄ саче екапа̄кенева са̄руппо, ват̣т̣атӣти па̄капарима̄н̣ам̣ на вуттанти гахетаббам̣. апаттатта̄ адхит̣т̣ха̄нӯпаго на хоти. апаччуддхарантена викаппетабботи пура̄н̣апаттам̣ апаччуддхарантена со патто викаппетабботи аттхоти ликхитам̣.

паттасиккха̄падаван̣н̣ана̄ нит̣т̣хита̄.

2. ӯнапан̃чабандханасиккха̄падаван̣н̣ана̄

пава̄ритети еттха сан̇гхавасена пава̄ритат̣т̣ха̄не пан̃чабандханенева ват̣т̣ати, пуггаликавасена пава̄ритат̣т̣ха̄не ӯнапан̃чабандханена̄пи ват̣т̣атӣти ликхитам̣.

йо ӯнапан̃чабандханаттхам̣, вуттампи четам̣ каро со;

ӯнапан̃чабандханаттхам̣, патва̄на сантике.

ӯнапан̃чабандханасиккха̄падаван̣н̣ана̄ нит̣т̣хита̄.

3. бхесаджджасиккха̄падаван̣н̣ана̄

‘‘пат̣иса̄йанӣйа̄ни пат̣иггахетва̄’’ти вадантена па̄дамаккхана̄дӣнам̣ аттха̄йа пат̣иггахетва̄ т̣хапетум̣ ват̣т̣атӣти дӣпитанти ликхитам̣. ‘‘йесам̣ мам̣сам̣ каппатӣ’’ти вачанена йесам̣ мам̣сам̣ на каппати, тесам̣ саппиа̄ди на каппатӣти ваданта̄ аджа̄нитва̄ ваданти. йесан̃хи мам̣сам̣ каппати, тесам̣ саппӣтиа̄ди сатта̄хака̄ликаниссаггийаваттхупариччхедадассанаттхам̣ вуттам̣. татха̄ пан̣ӣтабходжанасиккха̄паде йесам̣ мам̣сам̣ каппати, тесам̣йева кхӣра̄ди пан̣ӣтабходжанам̣, нетаранти дассетум̣ вуттанти. мадху на̄ма мадхукарибхамарамаккхика̄нам̣ а̄сайесу ниййа̄сасадисам̣ маха̄мадху хоти, там̣ йа̄ваджӣвиканти ча ликхитам̣.

бхесаджджасиккха̄падаван̣н̣ана̄ нит̣т̣хита̄.

паттавагго татийо.

ниссаггийапа̄читтийаван̣н̣ана̄ нит̣т̣хита̄.