5. нисӣданасиккха̄падаван̣н̣ана̄

касма̄ панеттха ‘‘сантхатам̣ пана бхиккхуна̄’’ти сиккха̄падам̣ апан̃н̃апетва̄ ‘‘нисӣданасантхата’’нти пан̃н̃аттам̣, нану еттха ка̄ран̣ена бхавитаббанти? аттхи ка̄ран̣ам̣, чӣварасан̃н̃ита̄йа сантхата̄нам̣ уджджхитатта̄ тесам̣ ачӣварабха̄вадассанаттхам̣ татха̄ пан̃н̃аттам̣ бхагавата̄ти вуттам̣ хоти. тасма̄ те бхиккхӯ течӣварикадхутан̇габхедабхайа̄ сантхате чатуттхачӣварасан̃н̃ита̄йа сантхата̄ни уджджхитва̄ тераса дхутан̇га̄ни сама̄дайим̣су, бхагава̄ ча тесам̣ сантхатам̣ ануджа̄ни. тато тесам̣ бхиккхӯнам̣ евам̣ хоти ‘‘нисӣданачӣварасан̣т̣ха̄нампетам̣ нисӣданасантхатам̣ но бхагавата̄ анун̃н̃а̄там̣ чатуттхачӣварабха̄вена, пагева катасантхатам̣ ва̄’’ти. тато ‘‘сантхате тесам̣ чӣварасан̃н̃ита̄ на бхависсатӣ’’ти тадаттхам̣ бхагавата̄ ‘‘сантхата’’нти апан̃н̃апетва̄ ‘‘нисӣданасантхата’’нти пан̃н̃аттанти адхиппа̄йо. имесу пана пан̃часу сантхатесу пурима̄ни тӣн̣и винайакаммам̣ катва̄ пат̣илабхитва̄пи парибхун̃джитум̣ на ват̣т̣анти акаппийатта̄, паччхима̄ни две ват̣т̣антӣти (ваджира. т̣ӣ. па̄ра̄джика 566-567) ликхитам̣. катхам̣ пан̃н̃а̄йатӣти че? ‘‘ана̄патти ан̃н̃ена катам̣ пат̣илабхитва̄ парибхун̃джатӣ’’ти (па̄ра̄. 570) вачанатоти ведитаббам̣.

нисӣданасиккха̄падаван̣н̣ана̄ нит̣т̣хита̄.