8. дут̣т̣хадосасиккха̄падаван̣н̣ана̄

‘‘касма̄ мама вандана̄дӣни…пе… ‘гхат̣итейева сӣсам̣ етӣ’ти вуттатта̄ антимаваттхуаджджха̄паннакам̣ вандитум̣ на ват̣т̣атӣ’’ти ваданти, там̣ на гахетаббам̣. парива̄ра̄васа̄не упа̄липан̃чаке ‘‘кати ну кхо, бханте, авандийа̄’’тиа̄дина̄ (пари. 467) вуттапа̄л̣ийам̣ авуттатта̄, ‘‘паччха̄ упасампаннена пуре упасампанно вандийо’’ти (пари. 468) вуттатта̄ ча, тасма̄ ева имиссам̣ кан̇кха̄витаран̣ийам̣ ‘‘упасампанноти сан̇кхйупагамана’’нти вуттам̣. сутта̄дхиппа̄йо пана евам̣ гахетаббо – аванданто са̄мӣчиппат̣иккхепасан̇кха̄та̄йа чодана̄йа чодети на̄ма̄ти дассанаттхам̣ вуттанти. тасма̄ ева ‘‘етта̄вата̄ ча чодана̄ на̄ма хотӣ’’ти вуттам̣. идха адхиппетам̣ а̄паттиа̄паджджана̄ка̄рам̣ дассетум̣ ‘‘‘касма̄ мама вандана̄дӣни на каросӣ’тиа̄ди вутта’’нти ликхитам̣.

катӯпасампаданти йасса упасампада̄ рухати, там̣, пан̣д̣ака̄дайо. т̣хапанаккхеттанти еттха саббасан̇га̄хикам̣, пуггаликан̃ча̄ти дувидхам̣ пава̄ран̣а̄т̣хапанам̣. таттха саббасан̇га̄хике ‘‘сун̣а̄ту ме, бханте, сан̇гхо…пе… тева̄чикам̣ пава̄ре’’ти су-ка̄рато йа̄ва ре-ка̄ро. пуггаликат̣хапане пана ‘‘сан̇гхам̣, бханте, пава̄реми…пе… пассанто пат̣ӣ’’ти сам̣-ка̄рато йа̄ва айам̣ саббапаччхимо т̣и-ка̄ро, еттхантаре екападепи т̣хапентена т̣хапита̄ хоти. упосатхе пана имина̄нуса̄рена висесо ведитаббо ‘‘кареййа̄’’ти ре-ка̄ре анатиккаманте.

дут̣т̣хадосасиккха̄падаван̣н̣ана̄ нит̣т̣хита̄.