6. анупакхаджджасиккха̄падаван̣н̣ана̄

‘‘джа̄на’’нти вутте ‘‘анут̣т̣ха̄панӣйо ‘айа’нти джа̄нанто’’ти айам̣ висесо куто лаббхатӣти а̄ха ‘‘теневасса̄’’тиа̄ди. нану падабха̄джанепи вуд̣д̣хабха̄ва̄диджа̄нанамева вуттам̣, на ту анут̣т̣ха̄панӣйабха̄ванти ануйогам̣ сандха̄йа̄ха ‘‘вуд̣д̣хо хӣ’’тиа̄ди. бахӯпака̄ратанти ‘‘бхан̣д̣а̄га̄рикатта̄дибахуупака̄рабха̄вам̣’’. на кевалам̣ идамева̄ти а̄ха ‘‘гун̣ависит̣т̣хатан̃ча̄’’тиа̄ди, тена бахӯпака̄раттепи гун̣ависит̣т̣хатта̄бха̄ве, гун̣ависит̣т̣хаттепи бахӯпака̄ратта̄бха̄ве да̄тум̣ на ват̣т̣атӣти дассети. ‘‘бхан̣д̣а̄га̄рикасса бахӯпака̄ратам̣, дхаммакатхика̄дӣнам̣ гун̣ависит̣т̣хатан̃ча саллаккхетва̄’’ти (са̄раттха. т̣ӣ. па̄читтийа 3.119-121) кечи. дхувава̄саттха̄йа̄ти ниччава̄саттха̄йа. самманнитва̄ти апалоканена каммена самманнитва̄. ка̄ман̃четтха гила̄насса̄пи сан̇гхойева ануччхавикам̣ сена̄санам̣ дети, гила̄но пана апалокетва̄ сан̇гхена адиннасена̄санопи на пӣл̣етаббо анукампитабботи дассетум̣ висум̣ вутто.

саманта̄ дийад̣д̣хо хаттхоти маджджхе пан̃н̃аттам̣ ман̃чапӣт̣хам̣ сандха̄йа вуттам̣. екапассена че пахонакадиса̄ диссати, тато гахетаббам̣. па̄дадхованапа̄са̄н̣атоти два̄ре никкхиттапа̄дадхованапа̄са̄н̣ато. нисӣдантасса ва̄ нипаджджантасса ва̄ па̄читтийанти еттха нисӣданаматтена, нипаджджанаматтенева ва̄ па̄читтийам̣. пунаппунам̣ каронтасса̄ти ут̣т̣ха̄йут̣т̣ха̄йа нисӣдато ва̄ нипаджджато ва̄.

сан̇гхике сан̇гхикасан̃н̃ивематикапуггаликасан̃н̃ӣнам̣ васена тикапа̄читтийам̣ ведитаббам̣. тикадуккат̣ам̣ пана пуггалике сан̇гхикасан̃н̃ивематикаан̃н̃апуггаликасан̃н̃ӣнам̣ васена. виха̄расса упача̄рети тасса бахи а̄саннаппадесе.

анупакхаджджасиккха̄падаван̣н̣ана̄ нит̣т̣хита̄.