2. ан̃н̃ава̄дакасиккха̄падаван̣н̣ана̄

йаматтханти ‘‘твам̣ кира дуккат̣а̄паттим̣ а̄панно’’тиа̄дикам̣ йам̣ кин̃чи аттхам̣. тато ан̃н̃анти пуччхитаттхато ан̃н̃аматтхам̣. ан̃н̃енан̃н̃ам̣ пат̣ичаран̣асса̄ти винайадхарена йам̣ вачанам̣ досапуччханаттхам̣ вуттам̣, тато ан̃н̃ена вачанена пат̣иччха̄данасса. пат̣иччха̄данаттхопи хи чарасаддо хоти анекаттхатта̄ дха̄тӯнам̣. вуттанти па̄л̣ийам̣ вуттам̣.

са̄васесам̣ а̄паттим̣ а̄панноти еттха т̣хапетва̄ па̄ра̄джикам̣ сеса̄ са̄васеса̄патти на̄ма, там̣ а̄панно. ануйун̃джийама̄ноти ‘‘ким̣, а̄вусо, иттханна̄мам̣ а̄паттим̣ а̄панносӣ’’ти пуччхийама̄но. ан̃н̃ена вачанена̄ти ‘‘ко а̄панно? ким̣ а̄панно? кисмим̣ а̄панно? катхам̣ а̄панно? кам̣ бхан̣атха? ким̣ бхан̣атха̄’’ти ан̃н̃ена вачанена. ан̃н̃анти ‘‘ким̣ твам̣ иттханна̄мам̣ а̄паттим̣ а̄панносӣ’’тиа̄дикам̣ ануйун̃джакавачанам̣. татха̄ татха̄ виккхипатӣти тена тена пака̄рена виккхипати. ким̣ вуттам̣ хоти? со (па̄чи. ат̣т̣ха. 94) кин̃чи вӣтиккамам̣ дисва̄ ‘‘а̄вусо, а̄паттим̣ а̄панносӣ’’ти сан̇гхамаджджхе а̄паттийа̄ ануйун̃джийама̄но ‘‘ко а̄панно’’ти вадати. тато ‘‘тва’’нти вутте ‘‘ахам̣ ким̣ а̄панно’’ти вадати. атха ‘‘па̄читтийам̣ ва̄ дуккат̣ам̣ ва̄’’ти вутте ‘‘ахам̣ кисмим̣ а̄панно’’ти вадати. тато ‘‘амукасмим̣ на̄ма ваттхусми’’нти вутте ‘‘ахам̣ катхам̣ а̄панно, ким̣ каронто а̄панномхӣ’’ти пуччхати. атха ‘‘идам̣ на̄ма каронто а̄панно’’ти вутте ‘‘кам̣ бхан̣атха̄’’ти вадати. тато ‘‘там̣ бхан̣а̄ма̄’’ти вутте ‘‘ким̣ бхан̣атха̄’’ти еваманекехи пака̄рехи виккхипатӣти вуттам̣ хоти.

йо пана бхиккху са̄васесам̣ а̄паттим̣ а̄панно, там̣ на катхетука̄мо тун̣хӣбха̄вена вихесетӣти самбандхо. вихесетӣти чиранисаджджа̄чирабха̄санехи пит̣т̣хиа̄гила̄йаната̄лусоса̄дивасена сан̇гхам̣ вихесети, париссамам̣ тесам̣ каротӣти аттхо. париссамо хи вихеса̄ на̄ма. ан̃н̃ава̄дакакамманти ан̃н̃ава̄дакасса бхиккхуно ан̃н̃ава̄дака̄ропанаттхам̣ ка̄таббам̣ н̃аттидутийакаммам̣. вихесакакамманти еттха̄пи есева найо. тасмим̣ сан̇гхена катети тасмим̣ ан̃н̃ава̄дакакамме ча вихесакакамме ча сан̇гхена н̃аттидутийакаммава̄ча̄йа кате. татха̄ каронта̄нанти там̣ пака̄рам̣ каронта̄нам̣, ан̃н̃ава̄дакан̃ча вихесакан̃ча каронта̄нанти аттхо.

‘‘вихесакети айаметтха анупан̃н̃аттӣ’’ти авачанан̃четтха ‘‘а̄паттикара̄ ча хоти ан̃н̃ава̄дакасиккха̄пада̄дӣсу вийа̄’’ти (кан̇кха̄. ат̣т̣ха. пат̣хамапа̄ра̄джикаван̣н̣ана̄) вуттатта̄йева пан̃н̃а̄йатӣти катва̄. еса найо упари сиккха̄падесу. дхаммакамме тикапа̄читтийанти дхаммакамме дхаммакаммасан̃н̃ивематикаадхаммакаммасан̃н̃ӣнам̣ васена тӣн̣и па̄читтийа̄ни. адхаммакамме тикадуккат̣анти еттха̄пи есева найо. ана̄ропитети каммава̄ча̄йа ана̄ропите, аппатит̣т̣ха̄питети аттхо. гелан̃н̃ена̄ти йена катхетум̣ на саккоти, мукхе та̄дисена бйа̄дхина̄. сан̇гхасса бхан̣д̣ана̄дӣни бхависсантӣти сан̇гхамаджджхе катхите таппаччайа̄ сан̇гхасса бхан̣д̣анам̣ ва̄ калахо ва̄ виггахо ва̄ вива̄до ва̄ сан̇гхабхедо ва̄ сан̇гхара̄джи ва̄ бхависсантӣти имина̄ ва̄ адхиппа̄йена на катхентасса. еттха ча адхаммена̄ти абхӯтена ваттхуна̄.

‘‘самут̣т̣ха̄на̄дӣни адинна̄да̄насадиса̄нӣ’’ти ависесам̣ атидиситва̄ висесам̣ дассетум̣ ‘‘идам̣ пана̄’’тиа̄ди вуттам̣. сийа̄ кирийам̣ ан̃н̃енан̃н̃ам̣ пат̣ичарантасса. сийа̄ акирийам̣ тун̣хӣбха̄вена вихесентасса.

ан̃н̃ава̄дакасиккха̄падаван̣н̣ана̄ нит̣т̣хита̄.