9. са̄сан̇касиккха̄падаван̣н̣ана̄

упасампаджджантиа̄дӣсу вийа̄ти ‘‘пат̣хамам̣ джха̄нам̣ упасампаджджа вихаратӣ’’ти (вибха. 508) имасса вибхан̇ге ‘‘упасампаджджа̄’’ти уддхаритаббе ‘‘упасампаджджа’’нти уддхат̣ам̣. тадиха нидассанам̣ катам̣. а̄дисаддена пана ‘‘ана̄пуччхам̣ ва̄ гаччхеййа̄’’тиа̄дӣнам̣ (па̄чи. 111, 115) сан̇гахо дат̣т̣хаббо. упагантва̄ти упасаддассаттхама̄ха. васитва̄ти аккхан̣д̣ам̣ васитва̄. ‘‘йена йасса хи самбандхо, дӯрат̣т̣хампи ча тасса та’’нти вачанато ‘‘имасса…пе… имина̄ самбандхо’’ти вуттам̣. таттха имасса̄ти ‘‘упавасса’’нти падасса. винайапарийа̄йена аран̃н̃алаккхан̣ам̣ адинна̄да̄напа̄ра̄джике а̄гатам̣. таттха хи ‘‘га̄ма̄ ва̄ аран̃н̃а̄ ва̄’’ти анавасесато аваха̄рат̣т̣ха̄напариггахена тадубхайам̣ асан̇карато дассетум̣ ‘‘т̣хапетва̄ га̄ман̃ча̄’’тиа̄ди вуттам̣. га̄мӯпача̄ро хи локе га̄масан̇кхамева гаччхатӣти. идха пана суттантапарийа̄йена ‘‘пан̃чадханусатикам̣ паччхима’’нти (па̄ра̄. 654) а̄гатам̣ а̄ран̃н̃акам̣ бхиккхум̣ сандха̄йа. на хи со винайапарийа̄йике аран̃н̃е васанто ‘‘а̄ран̃н̃ако пантхасена̄сано’’ти (ма. ни. 1.61) сутте вутто, тасма̄ таттха а̄гатамева лаккхан̣ам̣ гахетаббанти дассенто ‘‘саббапаччхима̄ни а̄ропитена а̄чарийадхануна̄’’тиа̄дима̄ха. таттха ‘‘а̄чарийадхану на̄ма пакатихаттхена нававидаттхипама̄н̣ам̣. джийа̄йа пана а̄ропита̄йа чатухаттхапама̄н̣а’’нти ваданти. га̄масса̄ти париккхиттасса га̄масса. индакхӣлатоти умма̄рато. париккхепа̄рахат̣т̣ха̄натоти парийанте т̣хитагхарасса упача̄ре т̣хитасса маджджхимасса пурисасса пат̣хамалед̣д̣упа̄тато. киттакена маггена минитаббанти а̄ха ‘‘саче’’тиа̄ди. маджджхимат̣т̣хакатха̄йам̣ пана ‘‘виха̄расса̄пи га̄массева упача̄рам̣ нӣхаритва̄ убхиннам̣ лед̣д̣упа̄та̄нам̣ антара̄ минитабба’’нти вуттам̣. чора̄нам̣ нивит̣т̣хока̄са̄дидассанена̄ти а̄ра̄ме, а̄ра̄мӯпача̄ре ча чора̄нам̣ нивит̣т̣хока̄са̄дидассанена ка̄ран̣ена. а̄дисаддена бхуттока̄сат̣т̣хитока̄санисиннока̄санипаннока̄са̄нам̣ гахан̣ам̣. чорехи манусса̄нам̣ хатавилутта̄кот̣итабха̄вадассанатоти а̄ра̄ме, а̄ра̄мӯпача̄ре ча хатавилутта̄кот̣итабха̄вадассанато.

антарагхаре никкхипеййа̄ти антаре антаре гхара̄ни еттха, етасса̄ти ва̄ антарагхарам̣, га̄мо, тасмим̣ т̣хапеййа̄ти аттхо. тена̄ха ‘‘а̄ран̃н̃акасса̄’’тиа̄ди. тан̃ча̄ти никкхипанан̃ча. ‘‘маха̄пава̄ран̣а̄йа пава̄рито хотӣ’’ти идам̣ вассаччхедам̣ акатва̄ вут̣т̣хабха̄вам̣ дассетум̣ вуттам̣, на пана пава̄ран̣а̄йа ан̇габха̄вам̣. тенева хи бйатирекам̣ дассентена самантапа̄са̄дика̄йам̣ (па̄ра̄. ат̣т̣ха. 2.653-654) вуттам̣ ‘‘саче паччхимика̄йа ва̄ упагато хоти чхиннавассо ва̄, никкхипитум̣ на лабхатӣ’’ти. каттикама̄со на̄ма пуббакаттикама̄сасса ка̄л̣апаккхапа̄т̣ипадато пат̣т̣ха̄йа йа̄ва апаракаттикапун̣н̣ама̄, та̄ва екӯнаттим̣са раттиндива̄. ева-саддена каттикама̄сато парам̣ на лабхатӣти дассети. ӯнаппама̄н̣е та̄ва аран̃н̃алаккхан̣а̄йогато на лабхату, касма̄ га̄вутато атирекаппама̄н̣е на лабхатӣти а̄ха ‘‘йатра хӣ’’тиа̄ди. нимантито пана аддхайоджанампи йоджанампи гантва̄ васитум̣ паччети, идамаппама̄н̣ам̣. са̄сан̇касаппат̣ибхайамева хотӣти са̄сан̇кан̃чева саппат̣ибхайан̃ча хоти. ева-саддена ана̄сан̇кааппат̣ибхайехи ан̇гайуттепи сена̄сане васанто никкхипитум̣ на лабхатӣти дассети. етта̄вата̄ пуримика̄йа упагантва̄ аккхан̣д̣ам̣ катва̄ вут̣т̣хавассо йам̣ га̄мам̣ гочарага̄мам̣ катва̄ пан̃чадханусатикапаччхиме а̄ран̃н̃акасена̄сане вихарати, тасмим̣ га̄ме чӣварам̣ т̣хапетва̄ сакалакаттикама̄сам̣ тасмим̣йева сена̄сане тена чӣварена вина̄ ваттхум̣ ануджа̄нитва̄ ида̄ни виха̄рато ан̃н̃аттха васантасса чха̄раттам̣ виппава̄сам̣ ануджа̄нанто ‘‘сийа̄ ча тасса бхиккхуно’’тиа̄дима̄ха. асама̄да̄нача̄ран̃хи аттхатакатхина̄ ева лабханти, нетарети еттха идампи ка̄ран̣ам̣ дат̣т̣хаббам̣. таттха чха̄раттапарамам̣ тена бхиккхуна̄ тена чӣварена виппаваситаббанти йо бхиккху виха̄ре васанто тато ан̃н̃аттха гаманакичче сати антарагхаре чӣварам̣ никкхипати, тена бхиккхуна̄ тена чӣварена чха̄раттапарамам̣ виппаваситаббам̣, чха раттийо тамха̄ виха̄ра̄ ан̃н̃аттха васитабба̄ти вуттам̣ хоти. вуттан̃хи бхадантена буддхадатта̄чарийена –

‘‘йам̣ га̄мам̣ гочарам̣ катва̄, бхиккху а̄ран̃н̃аке васе;

тасмим̣ га̄ме т̣хапетум̣ там̣, ма̄самекам̣ ту ват̣т̣ати.

‘‘ан̃н̃аттхева васантасса, чха̄раттапарамам̣ матам̣;

айамасса адхиппа̄йо, пат̣иччханно пака̄сито’’ти.

тенева̄ха ‘‘тато че уттари виппавасеййа̄ти чха̄раттато уттари тасмим̣ сена̄сане саттамам̣ арун̣ам̣ ут̣т̣ха̄пеййа̄’’тиа̄ди. татха̄ асакконтена̄ти гатат̣т̣ха̄насса дӯрата̄йа сена̄санам̣ а̄гантва̄ саттамам̣ арун̣ам̣ ут̣т̣ха̄петум̣ асакконтена. евампи асакконтена татрева т̣хитена паччуддхаритаббам̣ ‘‘атирекачӣварат̣т̣ха̄не т̣хассатӣ’’ти. васитва̄ти арун̣ам̣ ут̣т̣ха̄петва̄. бхиккхусаммути удоситасиккха̄паде вутта̄ва.

сесанти ‘‘ан̃н̃атра бхиккхусаммутийа̄ти айаметтха анупан̃н̃аттӣ’’тиа̄дикам̣. таттха хи ан̇гесу йам̣ раттивиппава̄со чатуттхаман̇гам̣, там̣ идха чха̄раттато уттари виппава̄со хотӣти айамева висесо.

са̄сан̇касиккха̄падаван̣н̣ана̄ нит̣т̣хита̄.