1. паттасиккха̄падаван̣н̣ана̄

авикаппитоти ‘‘имам̣ паттам̣ туйхам̣ викаппемӣ’’тиа̄дина̄ найена авикаппито. ад̣д̣ха̄л̣хакоданам̣ ган̣ха̄тӣти магадхана̄л̣ийа̄ двиннам̣ тан̣д̣улана̄л̣ӣнам̣ оданам̣ ган̣ха̄ти. ‘‘магадхана̄л̣и на̄ма ад̣д̣хатерасапала̄ хотӣ’’ти андхакат̣т̣хакатха̄йам̣ вуттам̣. ‘‘сӣхал̣адӣпе пакатина̄л̣и маханта̄, дамил̣ана̄л̣и кхуддака̄, магадхана̄л̣и пама̄н̣айутта̄, та̄йа магадхана̄л̣ийа̄ дийад̣д̣хана̄л̣и ека̄ сӣхал̣ана̄л̣и хотӣ’’ти (па̄ра̄. ат̣т̣ха. 2.602) маха̄ат̣т̣хакатха̄йам̣ вуттам̣. ануттан̣д̣уланти па̄като уккантам̣ тан̣д̣улам̣ уттан̣д̣улам̣, на уттан̣д̣улам̣ ануттан̣д̣улам̣. саббасамбха̄расан̇кхатоти джӣрака̄дисаббасамбха̄рехи сан̇кхато. а̄лопасса чатуттхабха̄гаппама̄н̣ам̣ бйан̃джанам̣ а̄лопасса анурӯпабйан̃джанам̣.

евам̣ уккат̣т̣хапаттам̣ дассетва̄ ида̄ни маджджхимомака̄ни дассетум̣ ‘‘уккат̣т̣хато’’тиа̄дима̄ха. татра̄йам̣ найо – саче на̄л̣икодана̄ди саббампи паккхиттам̣ вуттанайенева хет̣т̣химара̄джисамам̣ тит̣т̣хати, айам̣ маджджхимо на̄ма патто. саче там̣ ра̄джим̣ атиккамма тхӯпӣкатам̣ тит̣т̣хати, айам̣ маджджхимомако на̄ма патто. саче там̣ ра̄джим̣ на сампа̄пун̣а̄ти, антогадхамева хоти, айам̣ маджджхимуккат̣т̣хо на̄ма патто. саче паттодана̄ди саббампи паккхиттам̣ хет̣т̣химара̄джисамам̣ тит̣т̣хати, айам̣ омако на̄ма патто. саче там̣ ра̄джим̣ атиккамма тхӯпӣкатам̣ тит̣т̣хати, айам̣ омакомако на̄ма патто. саче там̣ ра̄джим̣ на сампа̄пун̣а̄ти, антогадхамева хоти, айам̣ омакуккат̣т̣хо на̄ма паттоти. тена̄ха ‘‘тесампи вуттанайенева бхедо ведитаббо’’ти.

ида̄ни тесу адхит̣т̣ха̄навикаппана̄надхит̣т̣ха̄на̄викаппанупаге дассетум̣ ‘‘иччетесӯ’’тиа̄дима̄ха. таттха уккат̣т̣хуккат̣т̣хоти уккат̣т̣хато уккат̣т̣хо. тато хи со ‘‘апатто’’ти вутто. омакомакоти омакато омако. тато хи со ‘‘апатто’’ти вутто. ете пана бха̄джанапарибхогена парибхун̃джитабба̄, на адхит̣т̣ха̄нупага̄ на викаппанупага̄, итаре пана сатта адхит̣т̣хахитва̄ ва̄ викаппетва̄ ва̄ парибхун̃джитабба̄. тена̄ха ‘‘сеса̄ сатта патта̄ пама̄н̣айутта̄ на̄ма̄’’ти.

тасма̄ти йасма̄ сатта патта̄ пама̄н̣айутта̄, тасма̄. саман̣аса̄руппена пакканти еттха айопатто пан̃чахи па̄кехи (па̄ра̄. ат̣т̣ха. 2.608) пакко саман̣аса̄руппена пакко хоти, маттика̄патто двӣхи па̄кехи. саче еко па̄ко ӯно хоти, на адхит̣т̣ха̄нупаго. йатха̄ ча саман̣аса̄руппена паккойева адхит̣т̣ха̄нупаго, татха̄ убхопи йам̣ мӯлам̣ да̄таббам̣, тасмим̣ диннейева адхит̣т̣ха̄нупага̄. йади пана аппакампи адиннам̣ хоти, на адхит̣т̣ха̄нупага̄. тена̄ха ‘‘саче пана̄’’тиа̄ди. ‘‘ка̄кан̣икаматтам̣ на̄ма дийад̣д̣хавӣхӣ’’ти ваданти. сачепи паттаса̄мико вадати ‘‘йада̄ тумха̄кам̣ мӯлам̣ бхависсати, тада̄ дассатха, адхит̣т̣хахитва̄ парибхун̃джатха̄’’ти, нева адхит̣т̣ха̄нупаго хоти. па̄касса хи ӯнатта̄ паттасан̇кхам̣ на гаччхати. мӯласса сакаласса ва̄ екадесасса ва̄ адиннатта̄ сакабха̄вам̣ на упети, ан̃н̃ассева сантако хоти. тасма̄ па̄ке ча мӯле ча нит̣т̣хитейева адхит̣т̣ха̄нупаго хоти. йо адхит̣т̣ха̄нупаго, свева викаппанупаго ча. тена̄ха ‘‘апаччуддхарантена̄’’тиа̄ди. апаччуддхарантена викаппетабботи пура̄н̣апаттам̣ апаччуддхарантена наво патто викаппетабботи аттхо, т̣хапетабботи адхиппа̄йо. кан̇гуситтханти саттаннам̣ дхан̃н̃а̄нам̣ ла̄макадхан̃н̃аситтханти а̄ха ‘‘кан̇гуситтханиккхаманаматтена чхиддена̄’’ти.

паттасиккха̄падаван̣н̣ана̄ нит̣т̣хита̄.