2. ел̣акаломавагго

1. косийасиккха̄падаван̣н̣ана̄

косийамиссаканти ‘‘косака̄рака̄’’ти ладдхавоха̄ра̄нам̣ па̄н̣ака̄нам̣ косато ниббаттам̣ ам̣су косийам̣, тена миссам̣ косийамиссакам̣. тена пана косийена аппакена̄пи мисситам̣ косийамиссакамева, на идам̣ аббоха̄риканти ваттум̣ лаббха̄. тена̄ха ‘‘екена̄пӣ’’тиа̄ди. косийам̣суна̄ти кимикосасамбхавена ам̣суна̄. ‘‘антамасо’’тиа̄дикам̣ пана имасса сиккха̄падасса ачиттакатта̄ вуттам̣. сантхатам̣ на̄ма сантхаритва̄ катам̣ ава̄йимам̣. тена̄ха ‘‘саме бхӯмибха̄ге’’тиа̄ди. имассева вачанасса ануса̄рена̄ти имассева пат̣хамасантхатасса ниссаджджанавидха̄навачана̄нуса̄рена. саббасантхатанти саббасантхатаниссаджджанавидха̄нам̣.

ан̃н̃ассаттха̄йа ка̄ра̄пане дуккат̣атта̄ аттано аттха̄йа ка̄ра̄панавасена ‘‘са̄н̣аттика’’нти вуттам̣. аттана̄ виппакатапарийоса̄пананайена̄ти ‘‘аттана̄ виппакатам̣ аттана̄ парийоса̄пети, ниссаггийам̣ па̄читтийам̣. аттана̄ виппакатам̣ парехи парийоса̄пети, ниссаггийам̣ па̄читтийам̣. парехи виппакатам̣ аттана̄ парийоса̄пети, ниссаггийам̣ па̄читтийам̣. парехи виппакатам̣ парехи парийоса̄пети, ниссаггийам̣ па̄читтийа’’нти (па̄ра̄. 545) имина̄ найена. вита̄на̄дикаран̣ети вита̄набхӯматтхаран̣аса̄н̣ипа̄ка̄рабхисибиббоханакаран̣е. йатха̄ ча вита̄на̄дикаран̣е, евам̣ тена̄ка̄рена парибхогепи ана̄патти. ‘‘ава̄йима’’нти (па̄ра̄. 544) вуттатта̄ ва̄йитва̄ каронтасса̄пи ана̄патти.

косийасиккха̄падаван̣н̣ана̄ нит̣т̣хита̄.

2. суддхака̄л̣акасиккха̄падаван̣н̣ана̄

ка̄л̣ака̄нанти сабха̄вена ва̄ раджанена ва̄ ка̄л̣ака̄нам̣. йатха̄ха ‘‘ка̄л̣акам̣ на̄ма две ка̄л̣ака̄ни джа̄тийа̄ ка̄л̣акам̣ ва̄ раджанака̄л̣акам̣ ва̄’’ти. ан̃н̃ехи амиссита̄нанти ан̃н̃ехи амисситака̄л̣ака̄нанти аттхо. ‘‘йатха̄ пат̣хаме ‘екена̄пи косийам̣суна̄’ти (кан̇кха̄. ат̣т̣ха. косийасиккха̄падаван̣н̣ана̄) вуттам̣, татха̄ идха̄пи ‘екена̄пи ан̃н̃ена амиссетва̄’ти авуттатта̄ ан̃н̃ена пана миссакабхогепи апан̃н̃а̄йама̄нарӯпакам̣ че ‘суддхака̄л̣ака’миччева вуччатӣ’’ти (ваджира. т̣ӣ. па̄ра̄джика 547) ваданти.

еттха ча ‘‘идам̣ ме, бханте, суддхака̄л̣ака̄нам̣ ел̣акалома̄нам̣ сантхата’’нтиа̄дина̄ (па̄ра̄. 549) ниссаджджанавидха̄нам̣ ведитаббам̣. сесанти пуббапайогадуккат̣ачатуккапа̄читтийа̄дикам̣. ан̇гесу пана ‘‘суддхака̄л̣акабха̄во’’ти айам̣ висесо.

суддхака̄л̣акасиккха̄падаван̣н̣ана̄ нит̣т̣хита̄.

3. двебха̄гасиккха̄падаван̣н̣ана̄

гахетабба̄ти йатха̄ ка̄л̣ака̄ адхика̄ на хонти, татха̄ гахетабба̄. т̣хапетва̄ четтха ка̄л̣акаода̄те авасеса̄ гочарийесуйева сан̇гахам̣ гаччхантӣти (са̄раттха. т̣ӣ. 2.552) дат̣т̣хаббам̣. еттха ча две бха̄га̄ти уккат̣т̣хапариччхедо ка̄л̣ака̄нам̣ адхикаггахан̣асса пат̣иккхепавасена сиккха̄падасса пан̃н̃аттатта̄. тасма̄ ка̄л̣ака̄нам̣ бха̄гадвайато адхикам̣ на ват̣т̣ати, ӯнакам̣ ват̣т̣ати. тена̄ха ‘‘екасса̄пӣ’’тиа̄ди. екасса̄пи ка̄л̣акаломасса атирекабха̄вети тула̄йа дха̄райитва̄ т̣хапитесу антамасо ва̄тавегенапи пахитасса екасса̄пи ка̄л̣акаломасса адхикабха̄ве сатӣти аттхо. ‘‘татийам̣ ода̄та̄нам̣, чатуттхам̣ гочарийа̄на’’нти идам̣ пана хет̣т̣химапариччхедо тесам̣ адхикаггахан̣е пат̣иккхепа̄бха̄вато. тасма̄ тесам̣ вуттаппама̄н̣ато адхикампи ват̣т̣ати.

еттха ча ‘‘идам̣ ме, бханте, сантхатам̣ ана̄дийитва̄ две туле суддхака̄л̣ака̄нам̣ ел̣акалома̄нам̣, тулам̣ ода̄та̄нам̣, тулам̣ гочарийа̄нам̣ сантхатам̣ ка̄ра̄питам̣ ниссаггийа’’нти (па̄ра̄. 554) имина̄ найена ниссаджджанавидха̄нам̣ ведитаббам̣. а̄да̄йа ча вуттапариччхедена ана̄да̄йа ча каран̣ато кирийа̄кирийам̣. сесанти пуббапайогадуккат̣ачатуккапа̄читтийа̄дикам̣. айам̣ пана висесо – тулам̣ ода̄та̄нам̣ тулам̣ гочарийа̄нам̣ а̄дийитва̄ каран̣е, бахутарам̣ ода̄та̄нам̣ бахутарам̣ гочарийа̄нам̣ а̄дийитва̄ каран̣е, суддхам̣ ода̄та̄нам̣ суддхам̣ гочарийа̄нам̣ а̄дийитва̄ каран̣е ча ана̄паттӣти.

ан̇гесу пана пат̣хаман̇гам̣ ка̄л̣ака̄нам̣ двебха̄гато атирекабха̄воти дат̣т̣хаббам̣. има̄ни тӣн̣и на кевалам̣ аниссат̣т̣ха̄нева парибхун̃джитум̣ на ват̣т̣антӣти а̄ха ‘‘има̄ни пана̄’’тиа̄ди. ‘‘парибхун̃джитум̣ на ват̣т̣антӣ’’ти имина̄ йади парибхун̃джати, дуккат̣анти дассети.

двебха̄гасиккха̄падаван̣н̣ана̄ нит̣т̣хита̄.

4. чхаббассасиккха̄падаван̣н̣ана̄

йам̣ сантхатасаммутим̣ детӣти самбандхо. гила̄насса бхиккхуноти йасса вина̄ сантхата̄ на пха̄су хоти, на саккоти ча сантхатам̣ а̄да̄йа паккамитум̣, евам̣бхӯтасса гила̄насса бхиккхуно. сантхатасаммутим̣ детӣти ‘‘сун̣а̄ту ме, бханте, сан̇гхо, айам̣ иттханна̄мо бхиккху гила̄но на саккоти сантхатам̣ а̄да̄йа паккамиту’’нтиа̄дина̄ (па̄ра̄. 560) падабха̄джане вутта̄йа н̃аттидутийакаммава̄ча̄йа сантхатасаммутим̣ дети.

са̄ти сантхатасаммути. вӯпасанто ва̄ пуна куппатӣти вӯпасанто ва̄ со а̄ба̄дхо пуна куппати, анувассампи ка̄тум̣ ват̣т̣ати, пуна саммутида̄накиччам̣ наттхӣти адхиппа̄йо. на кевалам̣ тасмим̣йева роге куппите, атха кхо ан̃н̃асмим̣ роге куппитепи гатагатат̣т̣ха̄не анувассам̣ ка̄тум̣ лабхати. тенева хи самантапа̄са̄дика̄йам̣ ‘‘саче арого хутва̄ пуна мӯлабйа̄дхина̄ва гила̄но хоти, сойева париха̄ро, наттхан̃н̃ам̣ ‘саммутикичча’нти пхуссадеваттхеро а̄ха. упатиссаттхеро пана со ва̄ бйа̄дхи пат̣икуппату, ан̃н̃о ва̄, саким̣ ‘гила̄но’ти на̄мам̣ ладдхам̣ ладдхамева, пуна ‘саммутикиччам̣ наттхӣ’ти а̄ха̄’’ти (па̄ра̄. ат̣т̣ха. 2.557) упатиссаттхерава̄до паччха̄ вутто.

еттха ча ‘‘идам̣ ме, бханте, сантхатам̣ ӯнакачхаббасса̄ни ка̄ра̄питам̣ ан̃н̃атра бхиккхусаммутийа̄ ниссаггийа’’нти (па̄ра̄. 562) имина̄ найена ниссаджджанавидха̄нам̣ ведитаббам̣. ‘‘сесам̣ пат̣хамасадисамева̄’’ти имина̄ ‘‘аттана̄ катам̣ парехи парийоса̄петӣ’’тиа̄дикам̣ атидит̣т̣хам̣. айам̣ пана висесо – парипун̣н̣е чхаббассе ва̄ атирекачхаббассе ва̄ ана̄патти. ан̇гесу ча чхаббасса̄нам̣ антобха̄во на̄на̄ттам̣.

чхаббассасиккха̄падаван̣н̣ана̄ нит̣т̣хита̄.

5. нисӣданасиккха̄падаван̣н̣ана̄

нисӣданасантхатанти ‘‘нисӣданам̣ на̄ма садасам̣ вуччатӣ’’ти еттха падабха̄джанийам̣ (па̄ра̄. 568) вуттатта̄ садасам̣ сантхатам̣, еттха ча нисӣданаггахан̣ам̣ сантхате чӣварасан̃н̃а̄нива̄ран̣аттхам̣, йато те бхиккхӯ камбалачӣварасан̃н̃а̄йа сантхатам̣ чхад̣д̣етва̄ дхутан̇га̄ни сама̄дийим̣су. сайана̄санаппайоджанатта̄ сантхатасса ‘‘пура̄н̣асантхатам̣ на̄ма̄’’тиа̄ди вуттам̣. йаттха̄ти йасмим̣ сантхате. видаттхиматтанти сугатавидаттхиматтам̣. уккат̣т̣хапариччхедо ча̄йам̣ ‘‘ана̄патти алабханто тхокатарам̣ а̄дийитва̄ каротӣ’’ти (па̄ра̄. 570) падабха̄джане вуттатта̄. екадесети ида̄ни каттаббанавасантхатасса екаппадесе. виджат̣етва̄ти виддхам̣сетва̄. ана̄да̄ти йа-ка̄ралопена̄йам̣ ниддесоти а̄ха ‘‘сати пура̄н̣асантхате аггахетва̄’’ти.

еттха ча ‘‘идам̣ ме, бханте, нисӣданасантхатам̣ ана̄дийитва̄ пура̄н̣асантхатасса са̄манта̄ сугатавидаттхим̣ ка̄ра̄питам̣ ниссаггийа’’нти (па̄ра̄. 568) имина̄ найена ниссаджджанавидха̄нам̣ ведитаббам̣. сантхатависсаджджанаваттхусмим̣ пан̃н̃аттанти бхагавата̄ сантхата̄ни виппакин̣н̣а̄ни дисва̄ ‘‘саддха̄деййавинипа̄тане ка̄ран̣ам̣ наттхи, парибхогупа̄йам̣ несам̣ дассесса̄мӣ’’ти (па̄ра̄. ат̣т̣ха. 2.566) сантхатависсаджджанаваттхусмим̣ пан̃н̃аттам̣. кирийа̄кирийатта̄ имасса сиккха̄падасса ‘‘сесам̣ татийасадисамева̄’’ти вуттам̣, двебха̄гасиккха̄падасадисамева̄ти аттхо. айам̣ пана висесо – пура̄н̣асантхатасса са̄манта̄ сугатавидаттхийа̄ а̄да̄йа каран̣е, алабхантасса тхокатарам̣ а̄да̄йа каран̣е, саббатха̄ алабхантасса ана̄да̄йа каран̣е ча ана̄паттӣти. ан̇гесу панеттха пат̣хаман̇гапура̄н̣асантхатасса са̄манта̄ сугатавидаттхиана̄дийана̄ти дат̣т̣хаббам̣.

нисӣданасиккха̄падаван̣н̣ана̄ нит̣т̣хита̄.

6. ел̣акаломасиккха̄падаван̣н̣ана̄

аддха̄намаггаппат̣ипаннасса̄ти аддха̄намева магго аддха̄намагго, там̣ пат̣ипаннасса̄ти аттхо. тена̄ха ‘‘аддха̄насан̇кха̄та’’нтиа̄ди. аддха̄насаддена висеситатта̄ пана ‘‘дӣгхамагга’’нти вуттам̣. аддха̄нагаманасамайасса вибхан̇ге ‘‘аддхайоджанам̣ гаччхисса̄мӣти бхун̃джитабба’’нтиа̄дивачанато (па̄чи. 218) аддхайоджанампи аддха̄намагго хоти. ел̣акалома̄ни чета̄ни аддха̄намаггато ан̃н̃аттха уппанна̄ни пат̣иггахетум̣ на ват̣т̣анти, йато ‘‘аддха̄намаггаппат̣ипаннасса̄’’тиа̄дикам̣ вуттанти ануйогам̣ сандха̄йа̄ха ‘‘саббан̃чета’’нтиа̄ди. таттха саббан̃четанти ‘‘бхиккхуно панева аддха̄намаггаппат̣ипаннасса ел̣акалома̄ни уппаджджеййу’’нтиа̄дикам̣ етам̣ саббам̣. ваттхуматтадӣпанамева̄ти ‘‘тена кхо пана самайена ан̃н̃атарасса бхиккхуно косалесу джанападе са̄ваттхим̣ гаччхантасса антара̄магге ел̣акалома̄ни уппаджджим̣сӯ’’тиа̄дикасса (па̄ра̄. 571) ваттхуматтасса дӣпанамева. йаттха каттхачӣти аддха̄нато ан̃н̃аттха̄пи йаттха каттхачи т̣ха̄несу. сахаттха̄ти каран̣аттхе ниссаккавачананти а̄ха ‘‘сахаттхена̄’’ти. лаккхан̣авачанан̃четам̣, тасма̄ йена кеначи сарӣра̄вайавена̄ти аттхо дат̣т̣хаббо. тена̄ха ‘‘аттана̄ харитабба̄нӣти аттхо’’ти. асанте ха̄ракети еттха пада̄нам̣ антогадха̄вадха̄ран̣ато авадха̄ран̣аттхо лаббхатӣти а̄ха ‘‘асантейева̄’’тиа̄ди.

еттха ча ‘‘има̄ни ме, бханте, ел̣акалома̄ни тийоджанам̣ атикка̄мита̄ни ниссаггийа̄нӣ’’тиа̄дина̄ (па̄ра̄. 573) ниссаджджанавидха̄нам̣ ведитаббам̣. тикапа̄читтийанти атирекатийоджане атирекатийоджанасан̃н̃ивематикаӯнакасан̃н̃ӣнам̣ васена тӣн̣и па̄читтийа̄ни. ва̄са̄дхиппа̄йена гантва̄ тато парам̣ харан̣ети йаттха гато, таттха уддесапарипуччха̄дӣнам̣ ва̄ паччайа̄дӣнам̣ ва̄ ала̄бхена тато парам̣ ан̃н̃аттха харан̣е, татопи ан̃н̃аттха̄ти евам̣ йоджанасатампи харан̣е ана̄патти. аччхиннам̣ ва̄ ниссат̣т̣хам̣ ва̄ти чорехи аччхиннам̣ ва̄ винайакаммакатам̣ ва̄. катабхан̣д̣анти катам̣ бхан̣д̣ам̣ камбалакоджавасантхата̄ди йам̣ кин̃чи антамасо суттакена баддхаматтампи. тена̄ха ‘‘антамасо’’тиа̄ди. йо пана танукапаттаттхавикантаре (па̄ра̄. ат̣т̣ха. 2.575) ва̄ а̄йогаам̣сабаддхакака̄йабандхана̄дӣнам̣ антаресу ва̄ пиппхалика̄дӣнам̣ малараккхан̣аттхам̣ сипа̄т̣ика̄йам̣ ва̄ антамасо ва̄та̄ба̄дхико кан̣н̣аччхиддепи лома̄ни паккхипитва̄ гаччхати, а̄паттийева. суттакена пана бандхитва̄ паккхиттам̣ катабхан̣д̣ат̣т̣ха̄не тит̣т̣хати, вен̣им̣ катва̄ харати, идам̣ нидха̄намукхам̣ на̄ма, а̄паттийева.

пат̣хамаппат̣ила̄бхоти аттано аттха̄йа ел̣акалома̄нам̣ пат̣хамуппатти. етена аччхиннаниссат̣т̣хаппат̣иладдха̄нам̣ пат̣иккхепо. ан̃н̃асса аджа̄нантасса йа̄не паккхипитва̄ти (па̄ра̄. ат̣т̣ха. 2.572) гаччханте ратха̄дике ва̄ хаттхипит̣т̣хиа̄дӣсу ва̄ са̄микасса аджа̄нантассева ‘‘хариссатӣ’’ти паккхипитва̄. агаччхантепи есева найо. саче пана агаччханте ратха̄димхи ва̄ хаттхипит̣т̣хиа̄дӣсу ва̄ т̣хапетва̄ а̄рохитва̄ са̄рети, хет̣т̣ха̄ ва̄ гаччханто чодети, паккосанто ва̄ анубандха̄пети, ‘‘ан̃н̃ам̣ хара̄петӣ’’ти (па̄ра̄. 575) вачанато ана̄патти. еттха ча ‘‘аджа̄нантасса йа̄не’’ти имина̄ джа̄нантасса че йа̄не паккхипати, ан̃н̃ам̣ хара̄пети на̄ма̄ти дассети. ахаран̣апачча̄харан̣анти харан̣апачча̄харан̣а̄намабха̄во.

ел̣акаломасиккха̄падаван̣н̣ана̄ нит̣т̣хита̄.

7. ел̣акаломадхова̄панасиккха̄падаван̣н̣ана̄

саккесӯти ‘‘сакйа̄ вата, бхо кума̄ра̄’’ти (дӣ. ни. 1.267) уда̄нам̣ пат̣ичча ‘‘сакйа̄’’ти ладдхана̄ма̄нам̣ нива̄со екопи джанападо рул̣хисаддена ‘‘сакка̄’’ти вуччати, тасмим̣ саккесу джанападе. чхаббаггийа̄ на̄ма пан̣д̣укалохитака̄дайо чхамӯлака̄, тесам̣ сисса̄ ча.

ел̣акаломадхова̄панасиккха̄падаван̣н̣ана̄ нит̣т̣хита̄.

8. джа̄тарӯпасиккха̄падаван̣н̣ана̄

раджатанти на кевалам̣ рӯпийамева идха̄дхиппетам̣, атха кхо йам̣ кин̃чи воха̄рагаманӣйам̣ каха̄пан̣а̄ди ча етам̣ адхиппетанти а̄ха ‘‘апича̄’’тиа̄ди. таттха каха̄пан̣оти (па̄ра̄. ат̣т̣ха. 2.583-584) суван̣н̣амайо ва̄ рӯпийамайо ва̄ па̄катико ва̄. лохама̄сако на̄ма тамбалоха̄дӣхи катама̄сако. да̄рума̄сако на̄ма са̄рада̄руна̄ ва̄ вел̣упесика̄йа ва̄ антамасо та̄лапан̣н̣енапи рӯпам̣ чхиндитва̄ катама̄сако. джатума̄сако на̄ма ла̄кха̄йа ва̄ ниййа̄сена ва̄ рӯпам̣ самут̣т̣ха̄петва̄ катама̄сако. ‘‘йе воха̄рам̣ гаччхантӣ’’ти имина̄ пана падена йо йо йаттха йаттха джанападе йада̄ йада̄ воха̄рам̣ гаччхати, антамасо ат̣т̣химайопи чаммамайопи руккхапхалабӣджамайопи самут̣т̣ха̄питарӯпопи асамут̣т̣ха̄питарӯпопи саббо сан̇гахито. тадева̄ти джа̄тарӯпараджатамева. хиран̃н̃ам̣ на̄ма каха̄пан̣о.

‘‘са̄дийатӣ’’ти вуттамеваттхам̣ вибха̄вети ‘‘ган̣хитука̄мо хотӣ’’ти. на кевалам̣ ка̄йава̄ча̄хи пат̣иккхиттамева пат̣иккхиттам̣ хоти, атха кхо манаса̄пи пат̣иккхиттам̣ пат̣иккхиттамева хотӣти а̄ха ‘‘ка̄йава̄ча̄хӣ’’тиа̄ди. саче пана ка̄йава̄ча̄хи аппат̣иккхипитва̄ читтена адхива̄сети, ка̄йава̄ча̄хи каттаббасса пат̣иккхепасса акаран̣ато акирийасамут̣т̣ха̄нам̣ ка̄йавачӣдва̄ре а̄паттим̣ а̄паджджати. манодва̄ре пана а̄патти на̄ма наттхи.

еко сатам̣ (па̄ра̄. ат̣т̣ха. 2.583-584) ва̄ сахассам̣ ва̄ па̄дамӯле т̣хапети ‘‘туйхидам̣ хотӯ’’ти, бхиккху ‘‘найидам̣ каппатӣ’’ти пат̣иккхипати. упа̄сако ‘‘париччаттам̣ майа̄ тумха̄ка’’нти гато, ан̃н̃о таттха а̄гантва̄ пуччхати ‘‘ким̣, бханте, ида’’нти. йам̣ тена ча аттана̄ ча вуттам̣, там̣ а̄чиккхитаббам̣. со че вадати ‘‘гопесса̄ми, бханте, гуттат̣т̣ха̄нам̣ дассетха̄’’ти, саттабхӯмикампи па̄са̄дам̣ абхирухитва̄ ‘‘идам̣ гуттат̣т̣ха̄на’’нти а̄чиккхитаббам̣, ‘‘идха никкхипа̄хӣ’’ти на ваттаббам̣. етта̄вата̄ каппийан̃ча акаппийан̃ча нисса̄йа т̣хитам̣ хоти, два̄рам̣ пидахитва̄ раккхантена васитаббам̣. саче кин̃чи викка̄йикабхан̣д̣ам̣ паттам̣ ва̄ чӣварам̣ ва̄ а̄гаччхати, ‘‘идам̣ гахессатха, бханте’’ти вутте ‘‘упа̄сака, аттхи амха̄кам̣ имина̄ аттхо, ваттху ча еварӯпам̣ на̄ма сам̣виджджати, каппийака̄рако наттхӣ’’ти ваттаббам̣. саче со вадати ‘‘ахам̣ каппийака̄рако бхависса̄ми, два̄рам̣ виваритва̄ детха̄’’ти, два̄рам̣ виваритва̄ ‘‘имасмим̣ ока̄се т̣хапита’’нти ваттаббам̣, ‘‘имам̣ ган̣ха̄’’ти на ваттаббам̣. еван̃ча каппийан̃ча акаппийан̃ча нисса̄йа т̣хитамева хоти. со четам̣ гахетва̄ тасса каппийабхан̣д̣ам̣ дети, ват̣т̣ати. саче адхикам̣ ган̣ха̄ти, ‘‘на майам̣ тава бхан̣д̣ам̣ ган̣ха̄ма, никкхама̄хӣ’’ти ваттаббо.

сан̇гхамаджджхейева ниссаджджитаббанти еттха йасма̄ рӯпийам̣ на̄ма акаппийам̣, тасма̄ ‘‘ниссаджджитаббам̣ сан̇гхасса ва̄ ган̣асса ва̄ пуггаласса ва̄’’ти на вуттам̣. йасма̄ пана там̣ пат̣иггахитаматтамева, на тена кин̃чи каппийабхан̣д̣ам̣ чета̄питам̣, тасма̄ упа̄йена парибхогадассанаттхам̣ ‘‘сан̇гхамаджджхейева ниссаджджитабба’’нти вуттам̣. а̄ди-саддена тела̄дӣнам̣ гахан̣ам̣. соти йо гахат̣т̣хо ‘‘саппи ва̄ телам̣ ва̄ ват̣т̣ати упа̄сака̄’’тиа̄дина̄ найена вутто, со. ан̃н̃ена лабхитва̄ти бхиккхуна̄ ва̄ а̄ра̄микена ва̄ аттано вассаггена лабхитва̄. тато ниббаттаруккхаччха̄йа̄пӣти ниссаггийаваттхуна̄ а̄хат̣абӣджато ниббаттаруккхапариччхедена т̣хитаччха̄йа̄пи, париччхеда̄тикканта̄ пана а̄гантукатта̄ ват̣т̣ати. но че чхад̣д̣етӣти атха нева гахетва̄ гаччхати, на чхад̣д̣ети, ‘‘ким̣ майхам̣ имина̄ бйа̄па̄рена̄’’ти йенака̄мам̣ паккамати. пан̃чан̇гасаманна̄гато ‘‘йо на чханда̄гатим̣ гаччхеййа, на доса̄гатим̣ гаччхеййа, на моха̄гатим̣ гаччхеййа, на бхайа̄гатим̣ гаччхеййа, чхад̣д̣ита̄чхад̣д̣итан̃ча джа̄неййа̄’’ти (па̄ра̄. 584) евам̣ вуттапан̃чан̇гехи саманна̄гато. самманнитабботи ‘‘сун̣а̄ту ме, бханте, сан̇гхо, йади сан̇гхасса паттакаллам̣, сан̇гхо иттханна̄мам̣ бхиккхум̣ рӯпийачхад̣д̣акам̣ самманнеййа̄’’тиа̄дина̄ падабха̄джане вутта̄йа н̃аттидутийакаммава̄ча̄йа самманнитаббо.

анимиттам̣ катва̄ гӯтхам̣ вийа чхад̣д̣етаббанти патитат̣т̣ха̄нам̣ саллаккхан̣авасена нимиттам̣ акатва̄ гӯтхам̣ вийа чхад̣д̣етаббам̣, аккхӣни нимӣлетва̄ва надийа̄ ва̄ папа̄те ва̄ ванагахане ва̄ гӯтхам̣ вийа анапеккхена патитока̄сам̣ асаманна̄харантена па̄тетаббанти вуттам̣ хоти. тена̄ха ‘‘гӯтхам̣ вийа чхад̣д̣етабба’’нти. тикапа̄читтийанти рӯпийасан̃н̃ивематикаарӯпийасан̃н̃ӣнам̣ васена тӣн̣и па̄читтийа̄ни. арӯпийе рӯпийасан̃н̃иноти кхарапатта̄дӣсу суван̣н̣а̄дисан̃н̃ино. ратанасиккха̄паданайена̄ти ‘‘аджджха̄ра̄ме ва̄ аджджха̄васатхе ва̄’’ти (па̄чи. 505) еттха вуттавидхина̄.

джа̄тарӯпасиккха̄падаван̣н̣ана̄ нит̣т̣хита̄.

9. рӯпийасам̣воха̄расиккха̄падаван̣н̣ана̄

ката̄дивасена̄ти катаакатаката̄катавасена. суван̣н̣а̄дичатуббидхампи ниссаггийаваттху идха рӯпийаггахан̣ена гахитанти а̄ха ‘‘джа̄тарӯпараджатапариваттана’’нти. идан̃ча уккат̣т̣хапариччхедена вуттанти дат̣т̣хаббам̣. тена̄ха ‘‘пуримасиккха̄падена хӣ’’тиа̄ди. париваттананти са̄дитарӯпийасса париваттанам̣. пуриманайа̄нуса̄рена̄ти ‘‘ахам̣, бханте, на̄наппака̄ракам̣ рӯпийасам̣воха̄рам̣ сама̄паджджим̣, идам̣ ме ниссаггийа’’нтиа̄дина̄ (па̄ра̄. 589).

рӯпийасам̣воха̄раваттхусминти пат̣иггахан̣ассева пат̣иккхиттатта̄ пат̣иггахитапариваттане досам̣ адисва̄ рӯпийапариваттане. тасса ва̄ти париваттитасса ва̄. дханасса ва̄ти аттано мӯладханасса ва̄. аттано ва̄ хи арӯпийена парасса рӯпийам̣ чета̄пеййа, аттано ва̄ рӯпийена парасса арӯпийам̣, убхайатха̄пи рӯпийасам̣воха̄ро катова хотӣти.

рӯпийасам̣воха̄расиккха̄падаван̣н̣ана̄ нит̣т̣хита̄.

10. кайавиккайасиккха̄падаван̣н̣ана̄

рӯпийасам̣воха̄расса пана хет̣т̣ха̄сиккха̄падена гахитатта̄ каппийабхан̣д̣а̄намеветтха гахан̣анти а̄ха ‘‘чӣвара̄дӣна’’нтиа̄ди. таттха чӣвара̄дӣнам̣ каппийабхан̣д̣а̄нанти антамасо дасикасуттам̣ упа̄да̄йа чӣварапин̣д̣апа̄тасена̄санагила̄напаччайа̄нам̣ йесам̣ кесан̃чи каппийабхан̣д̣а̄нам̣. кайам̣ на̄ма парабхан̣д̣асса гахан̣ам̣. виккайам̣ на̄ма аттано бхан̣д̣асса да̄нам̣. тена̄ха ‘‘имина̄ имам̣ дехӣ’’тиа̄ди. парасса̄ти т̣хапетва̄ пан̃ча сахадхаммике ан̃н̃асса. еттха ча ‘‘ахам̣, бханте, на̄наппака̄ракам̣ кайавиккайам̣ сама̄паджджим̣, идам̣ ме ниссаггийам̣, има̄хам̣ сан̇гхасса ниссаджджа̄мӣ’’тиа̄дина̄ (па̄ра̄. 595) найена ниссаджджитаббам̣. тена̄ха ‘‘вутталаккхан̣авасена̄’’тиа̄ди. нану четтха чӣварадховане ва̄ кесаччхедане ва̄ бхӯмисодхана̄динавакамме ва̄ парабхан̣д̣ам̣ аттано хаттхагатам̣ ниссаджджитаббам̣ на̄ма наттхи, таттха ким̣ ка̄таббанти а̄ха ‘‘асанте па̄читтийам̣ десетаббамева̄’’ти. йатха̄ ниссаггийаваттхумхи парибхутте ва̄ нат̣т̣хе ва̄ па̄читтийам̣ десети, евам̣ идха̄пи десетаббамева̄ти адхиппа̄йо.

идам̣ амха̄кам̣ аттхӣти идам̣ пат̣иггахитам̣ телам̣ ва̄ саппи ва̄ амха̄кам̣ сам̣виджджати. амха̄кан̃ча имина̄ ча имина̄ ча аттхоти амха̄кан̃ча тадан̃н̃ена имина̄ ча имина̄ ча аппат̣иггахитакена аттхо. ‘‘рӯпийасам̣воха̄ре вуттанайамева̄’’ти имина̄ ‘‘тикапа̄читтийам̣ акайавиккайе кайавиккайасан̃н̃ино ча вематикасса ча дуккат̣а’’нти имам̣ найаматидисати.

кайавиккайасиккха̄падаван̣н̣ана̄ нит̣т̣хита̄.

ел̣акаломавагго дутийо.