5. бходжанаппат̣иггахан̣апат̣хамасиккха̄падаван̣н̣ана̄

екатоавассутети пуггаласса ва̄ бхиккхунийа̄ ва̄ авассуте. маха̄паччарийам̣ панеттха ‘‘бхиккхунийа̄ авассутабха̄вети дат̣т̣хабба’’нти (па̄чи. ат̣т̣ха. 701) вуттам̣. там̣ ‘‘анавассутоти джа̄нантӣ пат̣игган̣ха̄тӣ’’ти (па̄чи. 703) има̄йа па̄л̣ийа̄ на самети. йади хи пуггаласса авассутабха̄во наппама̄н̣ам̣, ким̣ ‘‘анавассутоти джа̄нантӣ’’ти имина̄ вачанена, ‘‘ана̄патти убхатоанавассута̄ хонти, анавассута̄ пат̣игган̣ха̄тӣ’’ти еттакамева ваттаббам̣ сийа̄. убхосу анавассутесӯти пуггало чева бхиккхунӣ ча̄ти убхосу анавассутесу ган̣хантийа̄ саббатха̄пи ана̄патти. ‘‘анавассуто’’ти ва̄ н̃атва̄ ган̣хантийа̄ти сайам̣ анавассута̄ сама̄на̄ авассутепи ‘‘анавассуто айа’’нти сан̃н̃а̄йа тасса хаттхато пат̣игган̣хантийа̄. атха сайам̣ анавассута̄пи ан̃н̃ам̣ авассутам̣ ва̄ анавассутам̣ ва̄ ‘‘авассуто’’ти н̃атва̄ пат̣игган̣ха̄ти, дуккат̣амева. вуттан̃хетам̣ анантарасиккха̄паде ‘‘кисса твам̣, аййе, на пат̣игган̣ха̄сӣти, авассута̄, аййети, твам̣ пана, аййе, авассута̄ти, на̄хам̣, аййе, авассута̄’’ти.

бходжанаппат̣иггахан̣апат̣хамасиккха̄падаван̣н̣ана̄ нит̣т̣хита̄.