30-32. саматиттика̄дисиккха̄падаван̣н̣ана̄

саматиттиканти бха̄ванапум̣саканиддесо, саматиттикам̣ катва̄ти аттхо. еваман̃н̃есупи ӣдисесу т̣ха̄несу аттхо дат̣т̣хаббо. самапун̣н̣анти (са̄раттха. т̣ӣ. па̄читтийа 3.605) паттасса антомукхават̣т̣илекха̄самапун̣н̣ам̣. самабхаританти еттха̄пи есева найо. тан̃ча кхо адхит̣т̣ха̄нупагапаттассева, нетарасса. тена̄ха ‘‘адхит̣т̣ха̄нупагапаттасса̄’’тиа̄ди. рачитанти катам̣, паккхиттам̣ пӯританти аттхо. йам̣ кин̃чи йа̄вака̄ликанти йа̄губхаттапхала̄пхала̄дим̣ йам̣ кин̃чи а̄мисаджа̄тикам̣. йаттха каттхачӣти адхит̣т̣ха̄нупаго ва̄ хоту, анадхит̣т̣ха̄нупаго ва̄ йаттха каттхачи патте. тхӯпӣката̄нӣти тхӯпам̣ вийа ката̄ни, адхит̣т̣ха̄нупагасса паттасса антомукхават̣т̣илекхам̣ атиккамитва̄ ката̄нӣти аттхо. идан̃ча ‘‘йа̄мака̄лика̄дӣнӣ’’ти имасса васена вуттам̣, ‘‘йа̄вака̄лика’’нти имасса пана васена вачанабйаттайам̣ катва̄ ‘‘тхӯпӣкатампи ват̣т̣атӣ’’ти йоджетаббам̣. пи-саддена атхӯпӣката̄ни ват̣т̣антӣти еттха катха̄ва наттхӣти дассети. хет̣т̣ха̄ орохатӣти саманта̄ ока̄сасаббха̄вато ча̄лийама̄нам̣ хет̣т̣ха̄ бхассати. такколават̣ам̣сака̄дайоти еттха маттхаке т̣хапитатакколамева ват̣ам̣сакасадисатта̄ такколават̣ам̣сакам̣. а̄дисаддена пуппхават̣ам̣сакакат̣укапхала̄диват̣ам̣сака̄нам̣ (па̄чи. ат̣т̣ха. 605) гахан̣ам̣, на там̣ тхӯпӣкатам̣ на̄ма хоти па̄т̣еккам̣ бха̄джанатта̄ пан̣н̣а̄дӣнам̣.

саматиттика̄дисиккха̄падаван̣н̣ана̄ нит̣т̣хита̄.