10. чхандам̣адатва̄гаманасиккха̄падаван̣н̣ана̄

дасаме виниччхайакатха̄йа̄ти йа̄ва а̄рочитам̣ ваттху авиниччхикам̣, н̃аттим̣ ва̄ т̣хапетва̄ каммава̄ча̄ анит̣т̣ха̄пита̄, та̄ва виниччхайакатха̄ ваттама̄на̄ на̄ма хоти. йо бхиккху етасмим̣ антаре каммам̣ копетука̄мата̄йа париса̄йа хаттхапа̄сам̣ виджахати, тасса виджахане дуккат̣ам̣, виджахите па̄читтийам̣.

са̄ваттхийам̣ ан̃н̃атарам̣ бхиккхум̣ а̄раббха чхандам̣ адатва̄ паккаманаваттхусмим̣ пан̃н̃аттам̣, са̄дха̄ран̣апан̃н̃атти, ана̄н̣аттикам̣, дхаммакамме вематикасса, адхаммакамме дхаммакаммасан̃н̃ино, вематикасса ча дуккат̣ам̣. адхаммакаммасан̃н̃исса пана, йо ча ‘‘сан̇гхасса бхан̣д̣ана̄дӣни ва̄ бхависсанти, адхаммена ва̄ ваггена ва̄ накамма̄рахасса ва̄ каммам̣ кариссантӣ’’ти (па̄чи. 483) н̃атва̄, гила̄но ва̄ хутва̄, гила̄насса ва̄ каран̣ӣйена, учча̄ра̄дӣхи ва̄ пӣл̣ито, на ча каммам̣ копетука̄мо ‘‘пуна пачча̄гамисса̄мӣ’’ти гаччхати, тасса, умматтака̄дӣнан̃ча ана̄патти. виниччхайакатха̄йа ваттама̄ната̄, дхаммакаммата̄, дхаммакаммасан̃н̃ита̄, сама̄насӣма̄йам̣ т̣хитата̄, сама̄насам̣ва̄саката̄, копетука̄мата̄йа хаттхапа̄савиджахананти има̄неттха чха ан̇га̄ни. саманубха̄санасамут̣т̣ха̄нам̣, кирийа̄кирийам̣, сан̃н̃а̄вимоккхам̣, сачиттакам̣, локаваджджам̣, ка̄йакаммам̣, вачӣкаммам̣, акусалачиттам̣, дуккхаведананти.

чхандам̣адатва̄гаманасиккха̄падаван̣н̣ана̄ нит̣т̣хита̄.