5. ӯнавӣсативассасиккха̄падаван̣н̣ана̄

пан̃чаме ӯнавӣсативассанти пат̣исандхиггахан̣ато пат̣т̣ха̄йа апарипун̣н̣авӣсативассам̣. упасампа̄деййа̄ти упаджджха̄йо хутва̄ упасампа̄деййа. со ча пуггало анупасампанноти джа̄нантена̄пи аджа̄нантена̄пи упасампа̄дито анупасампаннова. саче пана со дасавассаччайена ан̃н̃ам̣ упасампа̄дети, тан̃че мун̃читва̄ ган̣о пӯрати, сӯпасампанно. сопи йа̄ва на джа̄на̄ти, та̄ва тасса нева саггантара̄йо на моккхантара̄йо, н̃атва̄ пана пуна упасампаджджитаббам̣. те ча бхиккхӯ га̄райха̄ти т̣хапетва̄ упаджджха̄йам̣ авасеса̄ га̄райха̄ хонти, саббе дуккат̣ам̣ а̄паджджанти. идам̣ тасмим̣ па̄читтийанти йо пана упаджджха̄йо хутва̄ упасампа̄дети, тасмим̣йева пуггале идам̣ па̄читтийам̣ ведитаббам̣. тасма̄ йо ‘‘евам̣ упасампа̄десса̄мӣ’’ти ган̣ам̣ ва̄ а̄чарийам̣ ва̄ паттам̣ ва̄ чӣварам̣ ва̄ парийесати, сӣмам̣ ва̄ самманнати (па̄чи. 404), удакуккхепам̣ ва̄ париччхиндати, со етесу саббакиччесу н̃аттийа̄, двӣсу ча каммава̄ча̄су дуккат̣а̄ни а̄паджджитва̄ каммава̄ча̄парийоса̄не па̄читтийам̣ а̄паджджати.

ра̄джагахе самбахуле бхиккхӯ а̄раббха ӯнавӣсативассам̣ упасампа̄данаваттхусмим̣ пан̃н̃аттам̣, аса̄дха̄ран̣апан̃н̃атти, ана̄н̣аттикам̣, ӯнавӣсативассе вематикасса, парипун̣н̣авӣсативассе ӯнакасан̃н̃ино, вематикасса ча дуккат̣ам̣. убхайаттха парипун̣н̣асан̃н̃исса, умматтака̄дӣнан̃ча ана̄патти. ӯнавӣсативассата̄, ӯнакасан̃н̃ита̄, упасампа̄дананти има̄неттха тӣн̣и ан̇га̄ни. самут̣т̣ха̄на̄дӣни адинна̄да̄насадиса̄ни, идам̣ пана пан̣н̣аттиваджджам̣, тичиттам̣, тиведананти.

ӯнавӣсативассасиккха̄падаван̣н̣ана̄ нит̣т̣хита̄.