10. кан̣т̣акасиккха̄падаван̣н̣ана̄

дасаме саман̣уддесоти са̄ман̣еро. чара̄ти гаччха. пирети пара ама̄мака. винасса̄ти насса, йаттха там̣ на пасса̄ма, таттха гаччха̄ти вуттам̣ хоти. татха̄на̄ситантиеттха сам̣ва̄сана̄сана̄ лин̇гана̄сана̄ дан̣д̣акаммана̄сана̄ти тиссо на̄сана̄. таттха а̄паттийа̄ адассана̄дӣсу уккхепана̄ сам̣ва̄сана̄сана̄ на̄ма. дӯсако на̄сетаббо (па̄ра̄. 66), меттийам̣ бхиккхуним̣ на̄сетха̄ти (чӯл̣ава. 193; па̄ра̄. 384) айам̣ лин̇гана̄сана̄ на̄ма. ‘‘аджджатагге те, а̄вусо саман̣уддеса, на чева со бхагава̄ саттха̄ ападиситаббо’’ти (па̄чи. 429) айам̣ дан̣д̣акаммана̄сана̄ на̄ма, айам̣ идха̄дхиппета̄. тена вуттам̣ ‘‘татха̄на̄сита’’нти. упала̄пеййа̄ти ‘‘паттам̣ ва̄ чӣварам̣ ва̄ уддесам̣ ва̄ парипуччхам̣ ва̄ дасса̄мӣ’’ти сан̇ган̣хеййа. упат̣т̣ха̄пеййа̄ти чун̣н̣аматтика̄дӣни са̄дийанто тена аттано упат̣т̣ха̄нам̣ ка̄ра̄пеййа. самбхогасахасеййа̄ анантарасиккха̄паде вуттанайа̄ ева, тасма̄ а̄паттипариччхедопеттха тасмим̣ вуттанайенева ведитаббо.

са̄ваттхийам̣ чхаббаггийе бхиккхӯ а̄раббха кан̣т̣акасаман̣уддесаупала̄панаваттхусмим̣ пан̃н̃аттам̣, сесам̣ арит̣т̣хасиккха̄паде вуттасадисамева̄ти.

кан̣т̣акасиккха̄падаван̣н̣ана̄ нит̣т̣хита̄.

саппа̄н̣акавагго саттамо.