7. наха̄насиккха̄падаван̣н̣ана̄

саттаме наха̄йеййа̄ти йо бхиккху маджджхимадесе наха̄надивасато пат̣т̣ха̄йа аддхама̄се апун̣н̣е ан̃н̃атра самайа̄ ‘‘наха̄йисса̄мӣ’’ти чун̣н̣ам̣ ва̄ маттикам̣ ва̄ абхисан̇кхароти, тасса тато пат̣т̣ха̄йа саббаппайогесу дуккат̣ам̣, наха̄напарийоса̄не па̄читтийам̣. самайесу паривен̣асаммаджджанаматтампи каммасамайо, аддхайоджанам̣ гантука̄масса, гаччхато, гатасса ва̄ аддха̄нагаманасамайо, сараджена ва̄тена окин̣н̣асса двӣсу ва̄ тӣсу ва̄ удакапхуситесу ка̄йе патитесу ва̄тавут̣т̣хисамайоти ведитаббо. сесам̣ утта̄намева.

ра̄джагахе самбахуле бхиккхӯ а̄раббха на маттам̣ джа̄нитва̄ наха̄йанаваттхусмим̣ пан̃н̃аттам̣, ‘‘ан̃н̃атра самайа̄’’ти айаметтха чхаббидха̄ анупан̃н̃атти, са̄дха̄ран̣апан̃н̃атти, ана̄н̣аттикам̣, тикапа̄читтийам̣, атирекаддхама̄се ӯнакасан̃н̃ино, вематикасса ва̄ дуккат̣ам̣. атирекасан̃н̃исса, самайе ва̄ наха̄йантасса, йо ва̄ надӣпа̄рам̣ гаччханто ва̄лукам̣ уккиритва̄ катаа̄ва̄т̣есупи наха̄йати, тасса, паччантиме джанападе саббесам̣, а̄пада̄су, умматтака̄дӣнан̃ча ана̄патти. маджджхимадесо, ӯнакаддхама̄се наха̄нам̣, самайа̄нам̣ ва̄ надӣпа̄рагаманасса ва̄ а̄пада̄нам̣ ва̄ абха̄воти има̄неттха тӣн̣и ан̇га̄ни. самут̣т̣ха̄на̄дӣни ел̣акаломасадиса̄нева̄ти.

наха̄насиккха̄падаван̣н̣ана̄ нит̣т̣хита̄.