8. дуббан̣н̣акаран̣асиккха̄падаван̣н̣ана̄

ат̣т̣хаме алабхӣти лабхо, лабхо ева ла̄бхо, ким̣ алабхи? чӣварам̣, кӣдисам̣? навам̣, ити ‘‘навачӣварала̄бхена̄’’ти ваттаббе ануна̄сикалопам̣ акатва̄ навам̣чӣварала̄бхена̄ти вуттам̣, пат̣иладдханавачӣварена̄ти аттхо. маджджхе т̣хитапададвайе пана̄ти нипа̄таматтам̣. бхиккхуна̄ти йена ладдхам̣, тасса нидассанам̣, сесам̣ падаттхато утта̄намева. айам̣ панеттха виниччхайо – нива̄санапа̄рупанупагам̣ чӣварам̣ лабхитва̄ тасса нит̣т̣хитараджанасса йасмим̣ ва̄ тасмим̣ ва̄ падесе кам̣санӣлена ва̄ паттанӣлена ва̄ каддамена ва̄ йена кеначи ка̄л̣акена ва̄ мораккхиман̣д̣аламан̇гулапит̣т̣хӣнам̣ ан̃н̃атараппама̄н̣ам̣ каппабиндум̣ а̄дийитва̄ там̣ чӣварам̣ парибхун̃джитаббам̣, ана̄дийитва̄ парибхун̃джантасса па̄читтийам̣.

са̄ваттхийам̣ самбахуле бхиккхӯ а̄раббха аттано чӣварааджа̄нанаваттхусмим̣ пан̃н̃аттам̣, са̄дха̄ран̣апан̃н̃атти, ана̄н̣аттикам̣, тикапа̄читтийам̣, а̄динне ана̄диннасан̃н̃ино, вематикасса ва̄ дуккат̣ам̣. а̄диннасан̃н̃исса, каппе нат̣т̣хе, каппакатока̄се джин̣н̣е, каппакатена акаппакате сам̣сиббите, паччха̄ а̄ропитесу аггал̣аанува̄тапарибхан̣д̣есу там̣ парибхун̃джантасса, умматтака̄дӣнан̃ча ана̄патти. вуттаппака̄расса чӣварасса акатакаппаката̄, на нат̣т̣хачӣвара̄дита̄, нива̄санам̣ ва̄ па̄рупанам̣ ва̄ти има̄неттха тӣн̣и ан̇га̄ни. самут̣т̣ха̄на̄дӣни ел̣акаломасадиса̄ни, идам̣ пана кирийа̄кирийанти.

дуббан̣н̣акаран̣асиккха̄падаван̣н̣ана̄ нит̣т̣хита̄.