10. апанидха̄насиккха̄падаван̣н̣ана̄

дасаме паттанти адхит̣т̣ха̄нупагам̣. чӣваранти викаппанупагам̣. нисӣданам̣ на̄ма садасам̣ вуччати. сӯчигхарам̣ на̄ма сасӯчикам̣ ва̄ асӯчикам̣ ва̄. ка̄йабандханам̣ на̄ма пат̣т̣ика̄ ва̄ сӯкарантакам̣ ва̄. апанидхеййа̄ти апанетва̄ нидахеййа. хаса̄пеккхоти хаса̄дхиппа̄йо. па̄читтийанти сайам̣ апанидхентасса па̄читтийам̣, ан̃н̃ам̣ а̄н̣а̄пентасса а̄н̣аттийа̄ дуккат̣ам̣, тена апанихите итарасса па̄читтийам̣.

са̄ваттхийам̣ чхаббаггийе а̄раббха апанидха̄наваттхусмим̣ пан̃н̃аттам̣, са̄дха̄ран̣апан̃н̃атти, са̄н̣аттикам̣, тикапа̄читтийам̣, анупасампанне тикадуккат̣ам̣, вуттаппака̄ра̄ни пана патта̄дӣни т̣хапетва̄ ан̃н̃ам̣ париккха̄рам̣ упасампаннасса ва̄ анупасампаннасса ва̄ сантакам̣ апанидхентасса дуккат̣амева. дунниккхиттам̣ пат̣иса̄ментасса, ‘‘дхаммакатхам̣ катва̄ дасса̄мӣ’’ти пат̣иса̄ментасса, умматтака̄дӣнан̃ча ана̄патти. упасампаннасса сантака̄нам̣ патта̄дӣнам̣ апанидха̄нам̣, вихесетука̄мата̄ ва̄ хаса̄дхиппа̄йата̄ ва̄ти има̄неттха две ан̇га̄ни. самут̣т̣ха̄на̄дӣни адинна̄да̄насадиса̄нӣти.

апанидха̄насиккха̄падаван̣н̣ана̄ нит̣т̣хита̄.

сура̄па̄навагго чхат̣т̣хо.