1. а̄васатхасиккха̄падаван̣н̣ана̄

бходжанаваггасса пат̣хаме агила̄нена̄ти аддхайоджанампи гантум̣ саматтхена. екоти екадивасико. а̄васатхапин̣д̣оти ‘‘имесам̣ ва̄ еттака̄нам̣ ва̄’’ти екам̣ па̄сан̣д̣ам̣ ва̄, ‘‘еттакамева̄’’ти евам̣ бхаттам̣ ва̄ анодисса са̄ла̄дӣсу йаттха каттхачи пун̃н̃ака̄мехи пан̃н̃аттам̣ бходжанам̣. бхун̃джитабботи екакулена ва̄ на̄на̄кулехи ва̄ екато хутва̄ екасмим̣ ва̄ т̣ха̄не, на̄на̄т̣ха̄несу ва̄ ‘‘аджджа екасмим̣, све екасми’’нти евам̣ анийатат̣т̣ха̄не ва̄ пан̃н̃атто екасмим̣ т̣ха̄не екадивасамева бхун̃джитаббо. тато че уттарӣти дутийадивасато пат̣т̣ха̄йа тасмим̣ ва̄ т̣ха̄не ан̃н̃асмим̣ ва̄ т̣ха̄не тесам̣ сантакасса пат̣иггахан̣е дуккат̣ам̣, аджджхоха̄ре аджджхоха̄ре па̄читтийам̣.

са̄ваттхийам̣ чхаббаггийе бхиккхӯ а̄раббха ануваситва̄ а̄васатхапин̣д̣абхун̃джанаваттхусмим̣ пан̃н̃аттам̣, ‘‘агила̄нена̄’’ти айаметтха анупан̃н̃атти, са̄дха̄ран̣апан̃н̃атти, ана̄н̣аттикам̣, тикапа̄читтийам̣, гила̄насса агила̄насан̃н̃ино вематикасса ва̄ дуккат̣ам̣. гила̄насса гила̄насан̃н̃ино, йо ча саким̣ бхун̃джати, гаччханто ва̄ антара̄магге екадивасам̣, гатат̣т̣ха̄не екадивасам̣, пачча̄гантопи антара̄магге екадивасам̣, а̄гатат̣т̣ха̄не екадивасам̣, гамисса̄мӣ’ти ча бхун̃джитва̄ никкханто кеначи упаддавена ниваттитва̄ кхемабха̄вам̣ н̃атва̄ гаччханто пуна екадивасам̣ бхун̃джати, йасса ва̄ са̄мика̄ нимантетва̄ денти, йо ва̄ бхиккхӯнам̣йева уддисса пан̃н̃аттам̣, на йа̄вадаттхам̣ пан̃н̃аттам̣, т̣хапетва̄ ва̄ пан̃ча бходжана̄ни ан̃н̃ам̣ бхун̃джати, тасса ча, умматтака̄дӣнан̃ча ана̄патти. а̄васатхапин̣д̣ата̄, агила̄ната̄, ануваситва̄ парибходжананти има̄неттха тӣн̣и ан̇га̄ни. самут̣т̣ха̄на̄дӣни ел̣акаломасиккха̄падасадиса̄нӣти.

а̄васатхасиккха̄падаван̣н̣ана̄ нит̣т̣хита̄.