2. ган̣абходжанасиккха̄падаван̣н̣ана̄

дутийе ган̣абходжанети ган̣асса бходжане. идха ча ган̣оти чатта̄ро ва̄ татуттари ва̄ бхиккхӯ, тесам̣ нимантанато ва̄ вин̃н̃аттито ва̄ ладдхе одана̄дӣнам̣ пан̃чаннам̣ бходжана̄нам̣ ан̃н̃атарабходжанети аттхо. таттха̄йам̣ виниччхайо – саче хи кочи чатта̄ро бхиккхӯ упасан̇камитва̄ йена кеначи вевачанена ва̄ бха̄сантарена ва̄ пан̃чаннам̣ бходжана̄нам̣ на̄мам̣ гахетва̄ ‘‘оданена нимантеми, оданам̣ ме ган̣хатха̄’’тиа̄дина̄ найена нимантети, те че евам̣ екато ва̄ на̄на̄то ва̄ нимантита̄ екато ва̄ на̄на̄то ва̄ гантва̄ екато ган̣ханти, паччха̄ екато ва̄ на̄на̄то ва̄ бхун̃джанти, ган̣абходжанам̣ хоти. пат̣иггахан̣амева хеттха пама̄н̣ам̣. саче одана̄дӣнам̣ на̄мам̣ гахетва̄ екато ва̄ на̄на̄то ва̄ вин̃н̃а̄петва̄ ча гантва̄ ча екато ган̣ханти, евампи ган̣абходжанамева. тасса дувидхасса̄пи евам̣ пат̣иггахан̣е дуккат̣ам̣, аджджхоха̄ре аджджхоха̄ре па̄читтийам̣. гила̄насамайа̄дӣсу йада̄ па̄да̄нампи пхалитатта̄ на сакка̄ пин̣д̣а̄йа чаритум̣, айам̣ гила̄насамайо. аттхатакатхина̄нам̣ пан̃ча ма̄са̄, итаресам̣ каттикама̄соти айам̣ чӣварада̄насамайо. йада̄ йо чӣваре карийама̄не кин̃чидева чӣваре каттаббам̣ каммам̣ кароти, айам̣ чӣварака̄расамайо. йада̄ аддхайоджанампи гантука̄мо ва̄ хоти гаччхати ва̄ гато ва̄, айам̣ аддха̄нагаманасамайо. на̄ва̄бхируханасамайепи есева найо. йада̄ гочарага̄ме чатта̄ро бхиккхӯ пин̣д̣а̄йа чаритва̄ на йа̄пенти, айам̣ маха̄самайо. йада̄ йокочи паббаджито бхаттена нимантети, айам̣ саман̣абхаттасамайо, етесу самайесу бхун̃джитум̣ ват̣т̣ати.

ра̄джагахе девадаттам̣ а̄раббха вин̃н̃а̄петва̄ бхун̃джанаваттхусмим̣ пан̃н̃аттам̣, ‘‘ан̃н̃атра самайа̄’’ти айаметтха саттавидха̄ анупан̃н̃атти, са̄дха̄ран̣апан̃н̃атти, ана̄н̣аттикам̣, тикапа̄читтийам̣, наган̣абходжане ган̣абходжанасан̃н̃исса вематикасса ва̄ дуккат̣ам̣. наган̣абходжанасан̃н̃исса пана, йе ча две тайо екато ган̣ханти, бахӯнам̣ пин̣д̣а̄йа чаритва̄ екато бхун̃джанта̄нам̣, ниччабхаттика̄дӣсу, пан̃ча бходжана̄ни т̣хапетва̄ саббаттха, умматтака̄дӣнан̃ча ана̄патти. ган̣абходжаната̄, самайа̄бха̄во, аджджхохаран̣анти има̄неттха тӣн̣и ан̇га̄ни. самут̣т̣ха̄на̄дӣни ел̣акаломасадиса̄нева̄ти.

ган̣абходжанасиккха̄падаван̣н̣ана̄ нит̣т̣хита̄.