7. маха̄песака̄расиккха̄падаван̣н̣ана̄

саттаме татра че со бхиккхӯти йатра га̄ме ва̄ нигаме ва̄ тантава̄йа̄, татра. пуббе аппава̄ритоти чӣвараса̄микехи аппава̄рито хутва̄. викаппам̣ а̄паджджеййа̄ти висит̣т̣хакаппам̣ адхикавидха̄нам̣ а̄паджджеййа. ида̄ни йена̄ка̄рена викаппам̣ а̄панно хоти, там̣ дассетум̣ идам̣ кхо, а̄вусотиа̄ди вуттам̣. таттха а̄йатанти дӣгхам̣. виттхатанти путхулам̣. аппитанти гханам̣. сувӣтанти сут̣т̣ху вӣтам̣, саббат̣т̣ха̄несу самам̣ катва̄ вӣтам̣. суппава̄йитанти сут̣т̣ху пава̄йитам̣, саббат̣т̣ха̄несу самам̣ катва̄ танте паса̄ритам̣. сувилекхитанти лекханийа̄ сут̣т̣ху вилекхитам̣. сувитаччхитанти коччхена сут̣т̣ху витаччхитам̣, сут̣т̣ху ниддхотанти аттхо. пин̣д̣апа̄таматтампӣти еттха ча на бхиккхуно пин̣д̣апа̄тада̄наматтена там̣ ниссаггийам̣ хоти, саче пана те тасса вачанена чӣвараса̄мика̄нам̣ хаттхато суттам̣ гахетва̄ ӣсакампи а̄йатам̣ ва̄ виттхатам̣ ва̄ аппитам̣ ва̄ каронти, атха тесам̣ пайоге бхиккхуно дуккат̣ам̣, пат̣ила̄бхена ниссаггийам̣ хоти.

са̄ваттхийам̣ упанандам̣ а̄раббха чӣваре викаппам̣ а̄паджджанаваттхусмим̣ пан̃н̃аттам̣, са̄дха̄ран̣апан̃н̃атти, ана̄н̣аттикам̣, тикапа̄читтийам̣, н̃а̄таке ан̃н̃а̄такасан̃н̃ино вематикасса ва̄ дуккат̣ам̣. н̃а̄такаппава̄рита̄нам̣ тантава̄йехи, ан̃н̃асса ва̄ аттха̄йа, аттано ва̄ дханена, махаггхам̣ ва̄йа̄петука̄мам̣ аппаггхам̣ ва̄йа̄пентасса, умматтака̄дӣнан̃ча ана̄патти. ан̃н̃а̄такааппава̄рита̄нам̣ тантава̄йе упасан̇камитва̄ викаппама̄паджджаната̄, чӣварасса аттуддесиката̄, тасса вачанена суттавад̣д̣ханам̣, чӣвараппат̣ила̄бхоти има̄неттха чатта̄ри ан̇га̄ни. самут̣т̣ха̄на̄дӣни дхова̄панасиккха̄паде вуттанайа̄нева̄ти.

маха̄песака̄расиккха̄падаван̣н̣ана̄ нит̣т̣хита̄.