8. аччекачӣварасиккха̄падаван̣н̣ана̄

ат̣т̣хаме даса̄ха̄на̄гатанти даса аха̄ни даса̄хам̣, тена даса̄хена ана̄гата̄ даса̄ха̄на̄гата̄, даса̄хена асампатта̄ти аттхо, там̣ даса̄ха̄на̄гатам̣, аччантасам̣йогавасена бхумматтхе упайогавачанам̣. каттикатема̄сикапун̣н̣аманти пат̣хамакаттикапун̣н̣амам̣, идха̄пи пат̣хамападасса анупайогата̄ пуриманайенева бхумматтхе упайогавачанам̣. идам̣ вуттам̣ хоти – йато пат̣т̣ха̄йа пат̣хамаппава̄ран̣а̄ ‘‘даса̄ха̄на̄гата̄’’ти вуччати, сачепи та̄ни диваса̄ни аччантамева бхиккхуно аччекачӣварам̣ уппаджджеййа, ‘‘аччекам̣ ида’’нти джа̄нама̄нена бхиккхуна̄ саббампи пат̣иггахетаббанти. тена пава̄ран̣а̄ма̄сасса джун̣хапаккхапан̃чамито пат̣т̣ха̄йа уппаннасса чӣварасса нидха̄нака̄ло дассито хоти. ка̄ман̃чеса ‘‘даса̄хапарамам̣ атирекачӣварам̣ дха̄ретабба’’нтиимина̄ва сиддхо, ат̣т̣хуппаттивасена пана апуббам̣ вийа аттхам̣ дассетва̄ сиккха̄падам̣ т̣хапитам̣. аччекачӣваранти гамикагила̄нагаббхиниабхинавуппаннасаддха̄нам̣ пуггала̄нам̣ ан̃н̃атарена ‘‘васса̄ва̄сикам̣ дасса̄мӣ’’ти евам̣ а̄рочетва̄ диннам̣. саче там̣ пуре пава̄ран̣а̄йа вибхаджитам̣, йена гахитам̣, тена вассаччхедо на ка̄таббо, кароти че, там̣ чӣварам̣ сан̇гхикам̣ хоти. йа̄ва чӣварака̄ласамайанти анаттхате катхине йа̄ва васса̄насса паччхимо ма̄со, аттхате катхине йа̄ва пан̃ча ма̄са̄, та̄ва никкхипитаббам̣.

са̄ваттхийам̣ самбахуле бхиккхӯ а̄раббха аччекачӣварасса чӣварака̄ласамайам̣ атиккаманаваттхусмим̣ пан̃н̃аттам̣, сесаметтха чӣвараваггасса пат̣хамасиккха̄паде вуттанайенева ведитаббанти.

аччекачӣварасиккха̄падаван̣н̣ана̄ нит̣т̣хита̄.