10. парин̣атасиккха̄падаван̣н̣ана̄

дасаме сан̇гхиканти сан̇гхасса сантакам̣. со хи сан̇гхасса парин̣ататта̄ хаттхе ана̄рул̣хопи екена парийа̄йена сан̇гхасантако хоти. ла̄бханти лабхитаббам̣ чӣвара̄диваттхум̣. парин̣атанти ‘‘дасса̄ма карисса̄ма̄’’ти вачӣбхедена ва̄ хаттхамудда̄йа ва̄ сан̇гхасса ниннам̣ хутва̄ т̣хитам̣. аттано парин̣а̄меййа̄ти ‘‘идам̣ майхам̣ детха̄’’тиа̄дӣни ваданто аттаниннам̣ кареййа. саче пана сан̇гхасса диннам̣ хоти, там̣ гахетум̣ на ват̣т̣ати, сан̇гхассева да̄таббам̣. парин̣атам̣ пана сахадхаммика̄нам̣ ва̄ гихӣнам̣ ва̄ антамасо ма̄тусантакампи аттано парин̣а̄ментасса пайоге дуккат̣ам̣, пат̣ила̄бхена ниссаггийам̣ хоти.

са̄ваттхийам̣ чхаббаггийе бхиккхӯ а̄раббха парин̣а̄манаваттхусмим̣ пан̃н̃аттам̣, са̄дха̄ран̣апан̃н̃атти, ана̄н̣аттикам̣, парин̣ате вематикасса, апарин̣ате парин̣атасан̃н̃ино чева вематикасса ча, сан̇гхачетийапуггалесу йасса кассачи парин̣атам̣ ан̃н̃асан̇гха̄дӣнам̣ парин̣а̄ментасса ча дуккат̣ам̣. апарин̣атасан̃н̃ино, ‘‘каттха дема̄’’ти пуччхите ‘‘йаттха тумха̄кам̣ читтам̣ пасӣдати, таттха детха, тумха̄кам̣ деййадхаммо парибхогам̣ ва̄ лабхеййа̄’’тиа̄дӣни вадантасса, умматтака̄дӣнан̃ча ана̄патти. сан̇гхе парин̣атабха̄во, там̣ н̃атва̄ аттано парин̣а̄манам̣, пат̣ила̄бхоти има̄неттха тӣн̣и ан̇га̄ни. самут̣т̣ха̄на̄дӣни адинна̄да̄насадиса̄нӣти.

парин̣атасиккха̄падаван̣н̣ана̄ нит̣т̣хита̄.

паттавагго татийо.

ити кан̇кха̄витаран̣ийа̄ па̄тимоккхаван̣н̣ана̄йа

ниссаггийапа̄читтийаван̣н̣ана̄ нит̣т̣хита̄.