9. рӯпийасам̣воха̄расиккха̄падаван̣н̣ана̄

наваме на̄наппака̄раканти ката̄дивасена анекавидхам̣. рӯпийасам̣воха̄ранти джа̄тарӯпараджатапариваттанам̣. пуримасиккха̄падена хи ниссаггийаваттхудуккат̣аваттхӯнам̣ пат̣иггахан̣ам̣ ва̄ритам̣, имина̄ париваттанам̣. тасма̄ дуккат̣аваттхуна̄ дуккат̣аваттхукаппийаваттхӯни, каппийаваттхуна̄ ча дуккат̣аваттхум̣ париваттентасса дуккат̣ам̣. ниссаггийаваттхуна̄ пана ниссаггийаваттхум̣ ва̄ дуккат̣аваттхум̣ ва̄ каппийаваттхум̣ ва̄, дуккат̣аваттхукаппийаваттхӯхи ча ниссаггийаваттхум̣ париваттентасса ниссаггийам̣ хоти, там̣ пуриманайа̄нуса̄ренева сан̇гхамаджджхе ниссаджджитаббам̣, ниссат̣т̣хаваттхусмин̃ча таттха вуттанайенева пат̣ипаджджитаббам̣.

са̄ваттхийам̣ чхаббаггийе а̄раббха рӯпийасам̣воха̄раваттхусмим̣ пан̃н̃аттам̣, са̄дха̄ран̣апан̃н̃атти, ана̄н̣аттикам̣, йам̣ аттано дханена париваттети, тасса ва̄ дханасса ва̄ рӯпийабха̄во чева, париваттанан̃ча̄ти има̄неттха две ан̇га̄ни. кирийам̣, сесам̣ анантарасиккха̄паде вуттанайамева̄ти.

рӯпийасам̣воха̄расиккха̄падаван̣н̣ана̄ нит̣т̣хита̄.