10. кайавиккайасиккха̄падаван̣н̣ана̄

дасаме на̄наппака̄раканти чӣвара̄дӣнам̣ каппийабхан̣д̣а̄нам̣ васена анекавидхам̣. кайавиккайанти кайан̃чева виккайан̃ча. ‘‘имина̄ имам̣ дехи, имам̣ а̄хара, париваттехи, чета̄пехӣ’’ти имина̄ хи найена парасса каппийабхан̣д̣ам̣ ган̣ханто кайам̣ сама̄паджджати, аттано каппийабхан̣д̣ам̣ денто виккайам̣ сама̄паджджати. тасма̄ т̣хапетва̄ пан̃ча сахадхаммике йам̣ евам̣ аттано каппийабхан̣д̣ам̣ датва̄ ма̄ту сантакампи каппийабхан̣д̣ам̣ ган̣ха̄ти, там̣ ниссаггийам̣ хоти. вутталаккхан̣авасена сан̇гхаган̣апуггалесу йасса кассачи ниссаджджитаббам̣, ‘‘имам̣ бхун̃джитва̄ ва̄ гахетва̄ ва̄ идам̣ на̄ма а̄хара ва̄ карохи ва̄’’ти раджана̄дим̣ а̄хара̄петва̄ ва̄ дхамакаран̣а̄дипариккха̄рам̣ бхӯмисодхана̄дин̃ча навакаммам̣ ка̄ретва̄ ва̄ сантам̣ ваттху ниссаджджитаббам̣, асанте па̄читтийам̣ десетаббамева.

са̄ваттхийам̣ упанандам̣ а̄раббха кайавиккайаваттхусмим̣ пан̃н̃аттам̣, ‘‘идам̣ ким̣ аггхатӣ’’ти евам̣ аггхам̣ пуччхантасса, йасса хаттхато бхан̣д̣ам̣ ган̣хитука̄мо хоти, там̣ т̣хапетва̄ ан̃н̃ам̣ антамасо тассева путтабха̄тукампи каппийака̄ракам̣ катва̄ ‘‘имина̄ идам̣ на̄ма гахетва̄ дехӣ’’ти а̄чиккхантасса, ‘‘идам̣ амха̄кам̣ аттхи, амха̄кан̃ча имина̄ ча имина̄ ча аттхо’’ти евам̣ ватва̄ аттано дханена ладдхам̣ ган̣хантасса, сахадхаммикехи саддхим̣ кайавиккайам̣ каронтасса, умматтака̄дӣнан̃ча ана̄патти. йам̣ аттано дханена париваттети, йена ча париваттети, тесам̣ каппийаваттхута̄, асахадхаммиката̄, кайавиккайа̄паджджанан̃ча̄ти има̄неттха тӣн̣и ан̇га̄ни. сесам̣ рӯпийасам̣воха̄ре вуттанайамева̄ти.

кайавиккайасиккха̄падаван̣н̣ана̄ нит̣т̣хита̄.

ел̣акаломавагго дутийо.