3. пан̃хапуччхакаван̣н̣ана̄

сайам̣ джет̣т̣хакабха̄вена паваттанато чатта̄ро адхипатайо ан̃н̃аман̃н̃ам̣ гарум̣ на каронти. тасма̄ ‘‘чатта̄ро иддхипа̄да̄ на магга̄дхипатино’’ти вутта̄. тена̄ха ‘‘ан̃н̃аман̃н̃асса пана адхипатайо на бхавантӣ’’ти. етаматтханти ‘‘адхипатайо ан̃н̃аман̃н̃асса адхипатӣ на бхавантӣ’’ти етаматтхам̣. адхипатиноти адхипати бхавитум̣ саматтхасса. адхипатим̣ на каронтӣти адхипатим̣ катва̄ гарум̣ катва̄ наппаваттанти. адхипатӣнам̣ сахабха̄вети адхипатикиччакаран̣ена сахапаваттийам̣. ‘‘авӣмам̣са̄дхипатикасса маггасса абха̄ва̄’’ти идам̣ ‘‘адхипатита̄саматтха̄ дхамма̄ адхипатибха̄венева паваттеййу’’нти доса̄ропанавасена̄ха, на йатха̄дхигатавасена. адхипатидхамма̄нан̃хи пубба̄бхисан̇кха̄ре сати адхипатибха̄вена паватти, на ан̃н̃атха̄ти сахабха̄вепи тадабха̄вам̣ сандха̄йа висесанам̣ на каттаббам̣ сийа̄ти сакка̄ ваттум̣. ан̃н̃аман̃н̃а̄дхипатикаран̣абха̄вети ан̃н̃аман̃н̃ам̣ адхипатим̣ катва̄ паваттийам̣. вӣмам̣са̄дхипатикаттавачананти вӣмам̣са̄дхипатикабха̄васса вачанам̣. на ваттаббам̣ сийа̄ саббесампи адхипатӣнам̣ са̄дхипатикатта̄ти адхиппа̄йо. сахабха̄во пат̣иккхитто ева са̄дхипатибха̄васса анекам̣сиката̄вачанато.

пан̃хапуччхакаван̣н̣ана̄ нит̣т̣хита̄.

иддхипа̄давибхан̇гаван̣н̣ана̄ нит̣т̣хита̄.