7. саттаканиддесаван̣н̣ана̄

806. чхаббидхампи паччавеккхан̣ан̃а̄н̣анти ‘‘джа̄типаччайа̄ джара̄маран̣анти н̃а̄н̣а’’нтиа̄дина̄ (вибха. 806) вуттам̣ пат̣иччасамуппа̄дан̇га̄нам̣ паччавеккхан̣авасена паваттан̃а̄н̣ам̣. саха гахетва̄ти екаджджхам̣ гахетва̄ випассана̄рамман̣абха̄васа̄ман̃н̃ена екаттена гахетва̄. сан̇кхипитва̄ вуттена̄ти пуббе чхадха̄ вуттам̣ вийа дасситам̣ дхаммат̣т̣хитин̃а̄н̣анти евам̣ сан̇кхипитва̄ вуттена. ‘‘кхайадхамма’’нтиа̄дина̄ пака̄рена дассананти самбандхо. паваттан̃а̄н̣асса̄ти ‘‘джа̄типаччайа̄ джара̄маран̣а’’нтиа̄дина̄ паваттасса н̃а̄н̣асса, паватте ва̄ сам̣са̄рават̣т̣е н̃а̄н̣асса. н̃а̄н̣а̄рамман̣а̄ випассана̄ н̃а̄н̣авипассана̄. випассана̄ти ча ‘‘джа̄типаччайа̄ джара̄маран̣а’’нтиа̄дина̄ паччайапаччайуппаннадхамме вибха̄гена дассанато дхаммат̣т̣хитин̃а̄н̣ам̣ идха̄дхиппетам̣. тасса кхайадхаммата̄диджа̄нанам̣ пат̣ивипассана̄. тена̄ха ‘‘випассана̄пат̣ивипассана̄дассанаматта’’нти.

еваметтха ат̣т̣хакатха̄дхиппа̄йавасена па̄л̣ийа̄ аттхам̣ дассетва̄ ида̄ни аттано адхиппа̄йавасена дассетум̣ ‘‘па̄л̣ийам̣ пана̄’’тиа̄дима̄ха. саббаттха̄ти аддхаттайе паччайависесена паччайуппаннависесаниддха̄ран̣е. н̃а̄н̣авачанена̄ти ‘‘джа̄типаччайа̄ джара̄маран̣а’’нтиа̄дина̄ н̃а̄н̣асса гахан̣ена. ан̇га̄нанти саттасаттатийа̄ ан̇га̄нам̣. итисаддена̄ти ‘‘ниродхадхамма’’нти еттха вуттаитисаддена. пака̄сетва̄ти н̃а̄н̣асса паваттиа̄ка̄рам̣ джотетва̄. тена дхаммат̣т̣хитин̃а̄н̣ато ан̃н̃ам̣йева парийоса̄не вуттам̣ н̃а̄н̣анти дассети. тена̄ха ‘‘випассана̄н̃а̄н̣ам̣ саттамам̣ н̃а̄н̣а’’нти. айамева четтха аттхо йуттоти дассенто ‘‘на хӣ’’тиа̄дима̄ха. таттха ‘‘тампи н̃а̄н̣анти самбандхо на хотӣ’’ти евам̣ самбандхо на йутто ан̇гантарабха̄васса авибха̄ванатоти аттхо. тена вуттам̣ ‘‘там̣н̃а̄н̣а…пе… анадхиппетатта̄’’ти. на хи висум̣ висум̣ вуттамева екаджджхам̣ вачанаматтена аттхантарам̣ хотӣти. ‘‘кхайадхаммам̣…пе… ча̄’’ти имина̄ пуримасмим̣ паккхе упачайена досама̄ха.

саттаканиддесаван̣н̣ана̄ нит̣т̣хита̄.