5. сам̣сат̣т̣хава̄раван̣н̣ана̄

351-368. сам̣сат̣т̣хава̄ре паччанӣйе ‘‘навиппайутте пат̣исандхи наттхӣ’’ти идам̣ ваттхувирахита̄йа пат̣исандхийа̄ висум̣ ануддхаран̣ато вуттам̣. пат̣иччава̄ра̄дӣсу хи сахаджа̄тасса паччайабха̄вадассанаттхам̣ саваттхука̄ пат̣исандхи уддхат̣а̄, са̄ идха̄пи адхипатипуреджа̄та̄севанесу накамманавипа̄канаджха̄нанавиппайуттесу на лаббхати, ан̃н̃есу ча ануломато паччанӣйато ча лаббхама̄напаччайесу лаббхатӣти имасса висесасса дассанаттхам̣ уддхат̣а̄ти. сеса̄ тераса на лаббхантӣти еттха ‘‘сеса̄ чуддаса̄’’ти бхавитаббам̣. на джха̄не еканти ахетукапан̃чавин̃н̃а̄н̣авасена̄ти пан̃чавин̃н̃а̄н̣а̄нам̣ хетупаччайавирахитаматтадассанаттхам̣ ахетукаггахан̣ам̣ катанти дат̣т̣хаббам̣, ‘‘намагге еканти ахетукакирийавасена̄’’ти вуттам̣, ‘‘ахетукавипа̄какирийавасена̄’’ти бхавитаббам̣.

369-391. хет̣т̣ха̄ вуттанайенева̄ти пат̣иччава̄ре ануломапаччанӣйе вуттанайена. ‘‘нахетупаччайуппаннесу ахетукамохова джха̄намаггапаччайам̣ лабхати, сеса̄ на лабхантӣ’’ти вуттам̣, сесесу пана пан̃чавин̃н̃а̄н̣аваджджа̄хетукаккхандха̄ там̣самут̣т̣ха̄на̄ паччайуппаннадхамма̄ джха̄напаччайам̣ лабханти, на паччанӣйа̄нуломе двиннам̣ паччайа̄нам̣ ануломена саха йоджана̄ аттхӣти джха̄намаггапаччайам̣ сахитам̣ лабхатӣти ча на сакка̄ ваттум̣, тасма̄ ‘‘ахетукамохова маггапаччайам̣ лабхатӣ’’ти ваттаббам̣.

сам̣сат̣т̣хава̄раван̣н̣ана̄ нит̣т̣хита̄.